Қазақстанда азық-түлік бағасы шілде айында былтырғы жылмен салыстырғанда 15,9 пайызға өскен деп хабарлайды ұлттық экономика министрлігінің статистика жөніндегі комитеті.
Ресми мәлімет бойынша, қант бағасы 65,4 пайызға көтерілген, жарма – 40,4 пайызға, нан - 27,1 пайызға, көкөніс пен жеміс – 16,7 пайызға, ұн – 12,4 пайызға өскен.
Комитет сонымен бірге коммуналдық қызметтерге де тариф бағасының өскенін атап өтеді. Соңғы жеті айда кәріз 25,3 пайызға, суық су – 12,4 пайызға, қоқыс шығару – 11,8 пайызға, жылыту жүйесі – 7,3 пайызға өскен.
Дүниежүзілік банктің өткен айда жариялаған «Қазақстан. Қалпына келудегі ұзақ жол» деп аталатын баяндамасында эксперттер тауар және қызмет көрсету бағасының бірден өскеніне алаңдаушылық білдірген. Дүниежүзілік банктің сарапшылары Қазақстан тұрғындарының 14 пайызы кедейшілікте өмір сүреді дейді (Күніне бес АҚШ долларына өмір сүреді).