Оралда төтенше жағдай жарияланды
Облыс орталығында 20 тұрғын үй, үш әлеуметтік нысан мен бес көпқабатты үйдің жертөлелері су басқан.
Орал қаласында қызыл су басып, төтенше жағдай жарияланды, деп хабарлайды Батыс Қазақстан облысының баспасөз қызметі.
Орал қаласында жергілікті ауқымдағы табиғи сипаттағы ТЖ режимі жарияланды.
Кәріз желілеріндегі апаттардың алдын алу және іргелес ғимараттарды су басудан сақтау үшін коммуналдық қызметтер үйлерге берілетін су қысымын төмендетті.
Батыс Қазақстан облысының әкімі Нариман Төреғалиев Орал қаласының Зачаганск кентіндегі су басқан шағын аудандарды, Саратов тас жолындағы су арнасы жүйесін, сондай-ақ Орал қаласының ескі орталығының көшелерін аралады.
Өңір басшысы облыстық төтенше жағдайлар департаментіне, қала әкімдігіне және коммуналдық қызметтер саласының мамандарына еріген қар мен жаңбыр суын дер кезінде сорып алуды, құм салынған қаптарды төсеуді, сондай-ақ су арналары мен құбырларды тазалауды тапсырды.
Жалпы су тасқынына қарсы жұмыстар БҚО-ның барлық аудандарында күшейтілген режимде жүріп жатыр.