21 ناۋرىز, 19:34 461 0 ايماق ارايلىم بيمەنديەۆا

وتاندىق كاسىپورىن 13 توننا قۇرعاق تۇيە ءسۇتىن ەكسپورتتادى

تۇركىستان وبلىسى تۇيە شارۋاشىلىعى ونىمدەرىنىڭ ەكسپورتتىق الەۋەتىن ارتتىرۋدا جانە تۇيە شارۋاشىلىعىن دامىتۋ بويىنشا ءىس-شارالار جوسپارىن ناتيجەلى جۇزەگە اسىرىپ كەلەدى.

2018 جىلى قىتاي حالىق رەسپۋبليكاسى مەن قازاقستان رەسپۋبليكاسىنىڭ ىنتىماقتاستىق مەموراندۋم شەڭبەرىندە يندۋستريالدى-يننوۆاتسيالىق دامۋ باعدارلاماسى اياسىندا قۇنى 6,9 ملرد.تەڭگەنى قۇرايتىن GOLDEN CAMEL GROUP LTD جشس-ءنىڭ «تۇيە ءسۇتىن قايتا وڭدەۋ زاۋىتى» ينۆەستيتسيالىق جوباسى جۇزەگە اسىرىلعان بولاتىن.

قازىرگى تاڭدا كاسىپورىن 5 ءسۇت قابىلداۋ بەكەتى (سوزاق ورداباسى، وتىرار اۋداندارى مەن تۇركىستان قالاسى) ارقىلى 20 شارۋا قوجالىعىمەن كەلىسىم شارت جاساپ، تاۋلىگىنە  5 توننا تۇيە ءسۇتىن قابىلداپ وتىر. ال تۇيە ءسۇتىن قابىلداۋ باعاسى 1000 تەڭگە. بۇل تۇيە شارۋاشىلىقتارىمەن جانە وسى سالامەن اينالىسۋعا نيەتى بار اۋىل تۇرعىندارىنىڭ ۇلكەن قىزىعۋشىلىعىن تۋدىرىپ وتىر.

وسى ماقساتتا وبلىس اكىمى ومىرزاق شوكەەۆتىڭ تىكەلەي باستاماسىمەن «تۇركىستان وبلىسىندا تۇيە شارۋاشىلىعىن دامىتۋدىڭ 2020-2022 جىلدارعا ارنالعان كەشەندى ءىس-شارا جوسپارى» قابىلداندى. ناتيجەسىندە بيىلعى جىلدىڭ وزىندە  ارىس، كەنتاۋ قالالارى، وتىرار، ورداباسى، سوزاق، شاردارا اۋداندارىندا قوسىمشا 3 962 انالىق باس تۇيە ساتىپ الىنىپ، ءسۇتتىڭ كولەمىن 14 250  تونناعا،  ياعني كاسىپورىننىڭ قۋاتتىلىعىن 15%-عا ۇلعايتۋعا كوزدەلىپ وتىر.

وسى ورايدا «قاراپايىم زاتتار ەكونوميكاسى» باعدارلاماسى اياسىندا تۇيە شارۋاشىلىعىن كەڭەيتۋ جوباسىندا جىلدىق 6%-بەن نەسيەلەندىرۋ جولدارى قاراستىرىلعان. جوبانىڭ ءوزىن-ءوزى اقتاۋ ۋاقىتى 8-9 اي كولەمدى قۇرايدى.

بۇگىنگى كۇنى تۇيە شارۋاشىلىعىن دامىتۋعا نيەتتەنگەن 80 ءاشتو-ءى انىقتالدى، ساتىپ الىناتىن انالىق تۇيە سانى 3 070 باستى قۇرايدى. ونىڭ ىشىندە قارجى ۇيىمىنان قۇنى – 1 ملرد 115 ملن. تەڭگەنى قۇرايتىن 3 جوبا ماقۇلداندى.

سونداي-اق، كاسىپورىننىڭ باستاماسىمەن «1000 باسقا ارنالعان ساۋىندى تۇيە كەشەنىن سالۋ» جوباسى ىسكە اسىرىلا باستادى. جوبانى جۇزەگە اسىرۋعا كەنتاۋ قالاسى، بايدىبەك، سوزاق، وتىرار اۋداندارىنان جەر تەلىمدەرى قاراستىرىلىپ وتىر.

جۋىردا GOLDEN CAMEL GROUP LTD جشس-ءنىڭ قىتاي حالىق رەسپۋبليكاسىنا تۇيە سۇتىنەن دايىندالعان 13 توننا دايىن ۇنتاق ءونىمىن العاش رەت ەكسپورتقا شىعاردى.

سوڭعى جاڭالىقتار