16 ناۋرىز, 17:16 443 0 ەكونوميكا انار لەپەسوۆا

قازاقستان قارجى ايىرباستاۋ ورىندارى قاۋىمداستىعى مالىمدەمە جاسادى

ەلىمىزدىڭ ءىرى قالالارىنداعى اقشا ايىرباستاۋ ورىندارىندا شەتەلدىك ۆاليۋتا جەتكىلىكتى دەڭگەيدە، دۇربەلەڭ تۋدىرۋعا نەگىز جوق.

بۇل تۋرالى قازاقستان قارجى ايىرباستاۋ ورىندارى قاۋىمداستىعىنىڭ پرەزيدەنتى ارشىن عالىمباەۆ الماتىدا وتكەن ءباسپاسوز ءماجىلىسى كەزىندە ايتتى، دەپ جازادى Baq.kz.

ونىڭ ايتۋىنشا، ەلىمىزدەگى قازاقستان قور بيرجاسى استانا ۋاقىتىمەن ساعات 10.15 كەزىندە جۇمىسىن باستاعان. بۇل كەزدە دوللار باعامى 410 تەڭگە ماڭايىندا بولعان. ال، العاشقى كەلىسىم ساعات 12 شاماسىندا جاسالعان. ياعني وسى ارالىقتا ەلىمىزدىڭ اقشا ايىرباستاۋ ورىندارىندا دوللار قانشاعا وسەتىنى تۋرالى ناقتى تۇسىنىك بولماعان.

"قازاقستان قور بيرجاسىنداعى العاشقى كەلىسىم 435 تەڭگە كولەمىندە جاسالدى. بۇل بانكتەر اراسىندا وسىنداي باعامدا كەلىسىمدەر جاسالعانىن كورسەتەدى. قازىر جاعداي تۇراقتى، بارلىق اقشا ايىرباستاۋ ورىندارىندا شەتەلدىك ۆاليۋتا جەتكىلىكتى دەڭگەيدە بار. ياعني قارجى نارىعىندا ەشقانداي دۇربەلەڭ جوق. جەلىدە دوللار كۋرسى 502 تەڭگەگە دەيىن كوتەرىلەدى دەگەن جالعان اقپاراتتار دا تارادى. ونى كىم تاراتقانى جانە قانداي ماقساتتى كوزدەگەنى بەلگىسىز. وسىنداي فەيك اقپارات تاراتاتىنداردى قر ءىىم-گى باقىلاۋىنا الۋىن وتىنەمىز",-دەدى ول.

ا. عالىمباەۆ مۇنداي كەزدە كۋرستىڭ كوتەرىلۋىنە اقشا ايىرباستاۋ ورىندارىن كىنالاۋ قيسىنسىز ەكەنىن ايتادى. ويتكەنى اقشا ايىرباستاۋ ورىندارىنىڭ بارلىعى قازاقستان قور بيرجاسىنىڭ مالىمەتىنە سۇيەنىپ جۇمىس ىستەيتىن كورىنەدى.

"قازىر قازاقستان قور بيرجاسىندا ساۋدا جۇرگىزىلىپ جاتىر، دوللار باعامى 435 تەڭگە ماڭايىندا. سوندىقتان دۇربەلەڭ تۋعىزاتىنداي نەگىز جوق، ءبىز قارجى نارىعىن شەتەلدىك جانە ۇلتتىق ۆاليۋتامەن قاماتاماسىز ەتە الامىز",-دەيدى قاۋىمداستىق پرەزيدەنتى.

سونداي-اق ول، مۇنداي كەزدە تەڭگەنى دوللارعا اۋىستىرۋعا اسىقپاۋعا شاقىردى.

"وسىنداي ۋاقىتشا ۇردىستەن كەيىن كەيدە دوللار باعاسى ءتۇسىپ جاتادى. سوندىقتان جاعداي تۇراقتالعانشا سابىرلىق ساقتاعان ءجون",-دەدى ول.

سوڭعى جاڭالىقتار