12 ناۋرىز, 20:44 336 0 مادەنيەت ارايلىم بيمەنديەۆا

ماسكەۋدە ەلباسى كورمەسى اشىلدى

م.لومونوسوۆ اتىنداعى ماسكەۋ مەملەكەتتىك ۋنيۆەرسيتەتىندە «ن.نازارباەۆ – ەۋرازيا ينتەگراتسياسىنىڭ ساۋلەتشىسى» كوشپەلى كورمەسى اشىلدى. كورمە تۇڭعىش پرەزيدەنت نۇرسۇلتان نازارباەۆتىڭ ماسكەۋگە جۇمىس ساپارى اياسىندا ءوتتى.

كورمەنىڭ نەگىزگى ماقساتى – قازاقستان رەسپۋبليكاسىنىڭ تۇڭعىش پرەزيدەنتى – ەلباسى ن.نازارباەۆتىڭ ءرولىن، سونداي-اق جاڭا جاھاندىق ولشەمدە وسى يدەيانىڭ پەرسپەكتيۆالىق دامۋىن جان-جاقتى كورسەتۋ.

– كورمە تۇڭعىش رەت قازاقستان-رەسەي ىنتىماقتاستىعى تاريحىندا ەرەكشە ورىن الاتىن ماسكەۋ مەملەكەتتىك ۋنيۆەرسيتەتىندە ءوتىپ جاتىر. 1994 جىلى ءدال وسى عيماراتتا ن.نازارباەۆ العاش رەت ءوزىنىڭ ەۋرازيالىق ينتەگراتسيا يدەياسىن رەسەيلىك عىلىمي قوعامداستىق الدىندا ايتقان بولاتىن. «ن.نازارباەۆ – ەۋرازيا ينتەگراتسياسىنىڭ ساۋلەتشىسى» كورمەسىندە ەلباسىنىڭ جەكە مۇراعاتىنان الىنعان بىرەگەي قۇجاتتار، ونىڭ قولجازبالارى، ەۋرازيالىق ينتەگراتسيانى جۇزەگە اسىرۋ تاريحى مەن كەزەڭدەرىن كورسەتەتىن مەملەكەتتىك قىزمەت بارىسىندا جاساعان جازبالارى ۇسىنىلعان. كورمەدە ەلباسىنىڭ مەملەكەتتىك ماراپاتتارى ەرەكشە ورىن الادى. بۇل قازاقستان مەن رەسەي حالىقتارى اراسىنداعى دوستىق پەن ىنتىماقتاستىقتى دامىتۋداعى ەڭبەگىن جوعارى باعالاۋدىڭ نىشانى، – دەپ اتاپ ءوتتى ەلباسى كىتاپحاناسىنىڭ ديرەكتورى، ساياسي عىلىمدار دوكتورى، پروفەسسور ءامىرحان راحىمجانوۆ.

قازاقستان رەسپۋبليكاسىنىڭ تۇڭعىش پرەزيدەنتى – ەلباسى كىتاپحاناسىنىڭ جيناعىندا جيناقتالعان جانە جۇيەلەنگەن ارحيۆتىك، كىتاپ، زاتتىق كەشەندەر قازاقستان مەن رەسەي ەكىجاقتى قاتىناستار تاريحى، ەۋرازيالىق ينتەگراتسيا يدەياسىنىڭ دۇنيەگە كەلۋى، سونداي-اق ءبىلىم جانە عىلىم سالاسىنداعى ەكى ەل ىنتىماقتاستىعى جونىندە بىرەگەي زەرتتەۋشىلىك، تالدامالىق، مادەني-اعارتۋشىلىق، ءبىلىم بەرۋ، اقپاراتتىق الاڭىن جاساقتايدى.

سوڭعى جاڭالىقتار