12 ناۋرىز, 18:49 334 0 رۋحانيات ارايلىم بيمەنديەۆا

«التىن ادام» ءۇندىستاندا

ۇلتتىق مۋزەي 18 ناۋرىزدا نيۋ-دەلي قالاسىنداعى ءۇندىستان ۇلتتىق مۋزەيىندە «ۇلى دالا: ۋاقىت. كەڭىستىك. مادەنيەت» كورمەسىن اشادى.

قازاقستاننىڭ ازاتتىق سيمۆو­لىنا اينالعان باستى ءجا­دىگەرى – «التىن ادام». ول قازاق­ستان تاريحىنداعى ەڭ تانىمال ارحەولوگيالىق سەنساتسيا. «التىن ادام» 1969 جىلى الماتى ماڭايىنداعى ەسىك قورعانىندا ار­حەولوگ كەمال اقىشەۆتىڭ جە­تەكشىلىگىمەن جۇرگىزىلگەن ار­حەولوگيالىق جۇمىستار ناتيجە­سىندە تابىلدى. التىن ادام كيىمى 4 مىڭعا جۋىق التىن اشەكەيلەر­مەن بەزەندىرىلگەن.

ءۇندىستان ۇلتتىق مۋزەيىنە ۇسى­نىلعان كورمەدەن كيىمى التىن جاپسىرمالى جانە جەبە، قار بارىسى، ارقار، جىلقى جانە قۇس تۇرىندەگى التىن تىلىمشەلەر اشە­كەيلەپ تۇرعان  كونۋس ءپىشىندى ەرەكشە باس كيىمدى «التىن ادام­نىڭ» رەكونسترۋكتسياسىن جانە اقسۇيەك ساق جاۋىنگەرىمەن بىرگە جەرلەنگەن ەرتە تەمىر عاسىرى­نىڭ ارحەولوگيالىق ولجالارى­نىڭ توپتاماسىن تاماشالاۋعا بولادى.

حالىقارالىق كورمە جوبا­سى­نىڭ اياسىندا «التىن ادام» الەم­نىڭ 12 مۋزەيىندە ۇسىنىلدى.  كور­مە وسىعان دەيىن بەلارۋس، رە­سەي، ءازىربايجان، قىتاي، پولشا، وڭتۇستىك كورەيا، وزبەكستان، سول­تۇستىك ماكەدونيا، تۇركيا، ما­­لايزيا جانە گرەتسيادا ۇلكەن جە­تىستىكپەن ءوتتى.

كورمەدە تاقساي (باتىس قازاقستان وبلىسى), تالدى-2 (قارا­عاندى وبلىسى) جانە بەرەل (شىعىس قازاقستان وبلىسى) سىن­دى ساق قورعاندارىنان تا­بىل­عان ارحەولوگيالىق تاڭداۋلى ول­جالار دا كورسەتىلەتىن بولادى.

سونىمەن قاتار كورمەگە باتىس قازاقستان وبلىستىق تاريح جانە ارحەولوگيا ورتالىعىنىڭ ار­حەولوگيالىق وتريادى 2012 جىل­دىڭ ساۋىرىندە قازبا جۇمىس­تارى كەزىندە تابىلعان «تاقساي حان­شايىمى» ۇسىنىلادى. تاق­ساي قورىمىندا جەرلەنگەن 35-40 جاستاعى ايەلدىڭ جانىنان ىدىستار، ءساندى باس كيىمنىڭ اشەكەي­لەرى جانە كوپتەگەن التىن بۇيىم­دار تابىلدى. عالىمدار شاي­قاستاردىڭ كورىنىستەرىن بەي­نەلەيتىن اعاش تاراقتى ەرەكشە ارتەفاكت دەپ سانايدى.

جالپى، كورمەگە قازاقستان ۇلت­تىق مۋزەيىنىڭ قورلارىنان بار­لىعى 292 زات ۇسىنىلادى.

سوڭعى جاڭالىقتار