5 ناۋرىز, 09:38 478 0 رۋحانيات Túrkistan Gazeti

انكارادا اباي  جىلى باستالدى

انكارادا قازاقستاننىڭ تۇركياداعى ەلشى­لى­گىنىڭ ۇيىمداستىرۋىمەن اباي قۇنان­بايۇلىنىڭ 175 جىلدىق مەرەيتويىنا وراي سال­تاناتتى ءىس-شارا ءوتتى.

اتالعان ءىس-شارا انكارا حادجى بايرام ءۋالي ۋني­ۆەرسيتەتىنىڭ قولداۋىمەن ءارى قازاقستان ۇلت­تىق اكا­دەميالىق كىتاپحاناسىنىڭ جانە تۇركيا ءما­دەنيەت جانە تۋريزم مينيسترلىگى كوركەمونەر تو­بى­نىڭ قاتىسۋىمەن جۇزەگە اسىرىلدى.

باسقوسۋعا كەلگەن قوناقتاردى قازاقستاندىق ستۋ­­دەنت­تەر قارا جورعا بيىمەن قارسى الدى.

قازاقستاننىڭ تۇركياداعى ەلشىسى ابزال سا­پار­بەك­ۇلى العىسوزىندە ابايدىڭ  قازاق حالقىنىڭ رۋحا­نياتى ءۇشىن تاريحي تۇلعالىعى توڭىرەگىندە ءسوز ءور­بىت­تى. «ونىڭ شىعارمالارىندا ۇلتتىق بولمىسىمىز، ءومىرىمىز، دۇنيەتانىمىمىز، مىنەزىمىز، ءتىلىمىز، ءدىنىمىز جانە رۋحىمىز كورىنىس تاپ­قان» دەپ ءسوزىن جالعاستىرعان ەلشى ا.ساپاربەكۇلى پرەزيدەنت ق.توقاەۆتىڭ ينتەللەكتۋالدىق ۇلت بولۋ ابايدان باستالادى دەگەن وي-پىكىرلەرى مەم­لەكەتىمىزدىڭ باستى مۇرات-ماقساتى بولىپ وتىر­عانىن جەتكىزدى. سونداي-اق بيىل جىل بويى ءتۇر­كيانىڭ باسقا دا ۋنيۆەرسيتەتتەرىنىڭ قولداۋىمەن اباي جىلىنا وراي ءىس-شارالار جالعاسىن تابا­تىنى­نا ءۇمىت ارتتى.

سالتاناتتى جيىن ستۋدەنتتەر اراسىندا اقىن­نىڭ ءومىرى مەن شىعارماشىلىعىنا قاتىستى ءبى­لىم­پازدار سايىسىمەن جالعاسىن تاپتى. سايىسقا قاتىسۋشىلار اباي تاقىرىبى بويىنشا تانىم­دىق دەڭگەيىن كورسەتىپ، جۇلدەگەرلەر سىيلىقتارمەن ماراپاتتالدى. ايتا كەتەلىك، جارىستا ءبىرىنشى بو­لىپ، وزىپ شىققان ۋنيۆەرسيتەتتىڭ 4-كۋرس ستۋدەن­تى ەليف اتلىعا قازاقستانعا ساياحات تۋرى تابىستالدى.

جيىن بارىسىندا تۇركيا مادەنيەت جانە تۋ­ريزم مينيسترلىگى انكارا مەملەكەتتىك تۇركى الەمى شىعارماشىلىق توبى كونتسەرتتىك باعدارلاماسىن ۇسىنىپ، زالعا جينالعان 800-گە جۋىق كورەرمەن اباي­دىڭ حالىق اراسىندا سۇيىكتى اندەرگە اينال­عان «كوزىمنىڭ قاراسى»، «ايتتىم سالەم، قالامقاس»، «جەلسىز تۇندە جارىق اي» جانە ت.ب. اسەم اندەرىن ونەر­پازدارمەن بىرگە شىرقادى.

يگى شارا عىلىمي كونفەرەنتسياعا ۇلاسىپ، تا­نىمال عالىمدار اباي شىعارماشىلىعىنا قا­تىستى باياندامالار جاسادى.

ە.تۇرسىن

انكارا قالاسى، تۇركيا

 

سوڭعى جاڭالىقتار