27 اقپان 2020, 18:40 879 0 مادەنيەت ارايلىم بيمەنديەۆا

فلوبەردىڭ سيقىرلى الەمى

م.اۋەزوۆ اتىنداعى قازاق مەملەكەتتىك اكادەميالىق دراما تەاترىندا قازاقستان رەسپۋبليكاسىنىڭ ەڭبەك سىڭىرگەن ونەر قايراتكەرى، قازاقستانداعى انيماتسيالىق كينونىڭ نەگىزىن سالۋشىلاردىڭ ءبىرى،  ساحنا كوركەمدەۋدىڭ ۇزدىك شەبەرى فلوبەر تەمىرعاليۇلىنا ارنالعان «تەاتر ساحناسىنداعى سيقىرلى الەم» اتتى كورمە ءوتتى.  

«تەاتر ساحناسىنداعى سيقىرلى الەم» كورمەسىنە گوبەلەن سۋرەتشىسى،  فلوبەر مۇقانوۆتىڭ ۇلى ماليك مۇقانوۆ پەن جارى، رەجيسسەر-مۋلتيپليكاتور تامارا مۇقانوۆا، دوستارى سۋرەتشى، كەسكىندەمەشى سۆەتلانا شكلياەۆا مەن مەلدەحان قاسىمبەكوۆ، م.اۋەزوۆ اتىنداعى قازاق مەملەكەتتىك اكادەميالىق دراما تەاترىنىڭ سۋرەتشى-ستسەنوگرافى مۇرات ساپاروۆ قاتىستى.

قازاقستان رەسپۋبليكاسىنىڭ ەڭبەك سىڭىرگەن  ونەر قايراتكەرى،  قازاقستانداعى انيماتسيالىق كينونىڭ نەگىزىن سالۋشىلاردىڭ ءبىرى، ساحنا كوركەمدەۋدىڭ ۇزدىك شەبەرى، سۋرەتشى – فلوبەر مۇقانوۆ 1939 جىلى 14 جەلتوقساندا سەمەي قالاسىندا دۇنيەگە  كەلگەن.

1960 جىلى الماتى كوركەمسۋرەت ۋچيليششەسىنە وقۋعا تۇسەدى. 1978 جىلى ماسكەۋدەگى محات ستۋدياسىنىڭ قويۋشى-سۋرەتشىلىك ءبولىمىن بىتىرگەن. سول جىلدان باستاپ م.اۋەزوۆ اتىنداعى قازاق مەملەكەتتىك اكادەميالىق دراما تەاترىنا سۋرەتشى بولىپ جۇمىسقا قابىلدانادى.

فلوبەر تەمىرعاليۇلى «مايرا» ء(ا.تاجىباەۆ), «شىڭعىسحان» (يران-عايىپ), «اباي»  ( م.اۋەزوۆ), «قوزى كورپەش–بايان سۇلۋ، «اقان سەرى–اقتوقتى» (ع.مۇسىرەپوۆ), ت.ب. سپەكتاكلدەرىنىڭ دەكوراتسياسىن جاسادى. ول قازاقستاننىڭ  وزگە دە تەاترلارىندا جۇمىس جاساپ، كوپتەگەن حالىقارالىق دەڭگەيدەگى كورمەلەردىڭ  قويۋشى-سۋرەتشىسى بولدى. سونىمەن قاتار ول پەيزاج جانرىندا وزىندىك قولتاڭباسى بار سۋرەتشى رەتىندە دە تانىمال. قازاق ستسەنوگرافيا ونەرىنىڭ دامۋىنا مول ۇلەس قوسقان فلوبەر مۇقانوۆتىڭ  گرافيكا، اكۆارەل، تەمپەرا تەحنيكاسىندا سالعان شىعارمالارى مەملەكەتتىك جانە جەكە قورلاردا ساقتاۋلى.

ستسەنوگراف-سۋرەتشىلەر ساحنانىڭ سۇلۋلىعىن، ەستەتيكاسىن، ونىڭ تۇتاستاي اتموسفەراسىن ءتۇزۋشى ماماندار. تەاتر سۋرەتشىسىنىڭ جۇمىسى ساحنانى ارلەندىرۋ جانە قويىلىممەن ۇندەستىگىنە قاراپ باعالايدى. كورمەنىڭ ماقساتى – ءبىر قاراعاندا قاراپايىمداۋ كورىنەتىن جۇمىستىڭ استارىندا قانشاما سىر مەن وي جاتقانىن جاس ۇرپاققا، ونەرسۇيەر كوپشىلىككە، تەاتر تاريحىنا قىزىعاتىن ىزدەنۋشىلەرگە ناسيحاتتاۋ، سونىمەن قاتار تەاتر الەمى تەك رەجيسسەرمەن نەمەسە اكتەرلەرمەن  شەكتەلمەيتىنىن كورسەتۋ.

كورمە بارىسىندا سۋرەتشى ف.مۇقانوۆتىڭ ەڭبەكتەرى  ەكسپوزيتسيادا كەزەڭ-كەزەڭمەن كورسەتىلدى. ونەر قايراتكەرىنىڭ ۇمىت بولا باستاعان بەينەسى كورەرمەن جادىندا قايتا جاڭعىردى.

ارايلىم جولداسبەكقىزى

سوڭعى جاڭالىقتار