26 اقپان, 18:30 355 0 جاھان Túrkistan Gazeti

حاناۋ ميگرانتتارىن قاناۋعا جول بەرگەن كىم؟

گەرمانياداعى حاناۋ قالاسىنىڭ تۇرعىنى توبياس راتەن ەسىمدى 47 جاسار نەمىس ازاماتى ۇلتتىق جانە ءدىني الاۋىزدىق، جەككورۋشىلىك نەگىزىندە بەيبىت ادامدارعا وق جاۋدىرعان.

حاناۋ قالاسىنىڭ ورتالىعىندا ورنالاسقان ەكى كاليان بارعا كەزەكپەن-كەزەك باسا كوكتەپ كىرگەن توبياس راتەن توعىز ادامدى اتىپ ءولتىرىپ، التى ادامدى جارالاعان. بۇل قىلمىسىنان كەيىن ۇيىنە قايتىپ ورالعان ول 72 جاستاعى ءوز اناسىن ءولتىرىپ، ارتىنشا ءوز-وزىنە قول جۇمساپ، قايتىس بولعان. بەلگىلى بولعانداي، راديكالدى كوزقاراستى ۇستانعان توبياس قىلمىس جاسار الدىندا جەكە ۆەب-سايتىنا 24 بەتتىك مانيفەست جاريالاپ، جەلىگە ارنايى ۆيدەوۇندەۋ جۇكتەگەن. بۇل ماتەريالدارعا سايكەس، ول عالامدى ەتنيكالىق تازالاۋدىڭ جوسپارىن قۇرىپ، سونىڭ ىشىندە تاياۋ شىعىس ەلدەرىندەگى، سونداي-اق، ازياداعى بىرقاتار ايماقتاردى، سولتۇستىك افريكا، ورتالىق جانە وڭتۇستىك امەريكانى مەكەندەيتىن تۇرعىندار مەن «ارالاس» نەمىستەردى جويۋعا نيەتتى ەكەنىن بىلدىرگەن. گەرمانيانىڭ باس پروكۋرورى پەتەر فرانكتىڭ ايتۋىنشا، قازا تاپقان توعىزدىڭ تۇگەلى دەرلىك ميگرانتتار، سونىڭ ىشىندە بەس تۇرىك ازاماتى، ولاردىڭ اراسىندا ەتنيكالىق كۇرد ازاماتتارى دا بولعان. تۇركيا پرەزيدەنتى رەدجەپ ەردوعان گەرمانيا مەملەكەتىن يسلاموفوبياعا قارسى كۇرەستە ايتارلىقتاي كۇش سالماي جاتقاندىعىن سىنعا الىپ، بۇل قىلمىستى تۇرىك حالقىنا قارسى جاسالعان ناسىلشىلدىك شابۋىل دەپ باعالادى. وقيعا ورنىنا ارنايى كەلىپ، گۇل شوقتارىن قويعان گەرمانيا پرەزيدەنتى فرانك-ۆالتەر شتاينمايەر نەمىستەر مەن وزگە ۇلت وكىلدەرى ناسىلشىلدىكتى جەڭۋ جولىندا بىرىگۋ كەرەك ەكەنىن جەتكىزدى.

ءاليا تىلەۋجانقىزى

سوڭعى جاڭالىقتار