26 اقپان, 19:50 303 0 دەنساۋلىق Túrkistan Gazeti

ۆەتنامدا بۇرىن-سوڭدى بولماعان وتا جاسالدى

ۆەتنامنىڭ حانوە قالاسىنداعى ورتالىق اسكەري اۋرۋحانا دارىگەرلەرى الەمدە تۇڭعىش رەت ادامنىڭ قول بۋىنىنا ترانسپلانتاتسيا جاسادى.

ۆەتنامدىق دارىگەرلەر الەمدە تۇڭعىش رەت ءتىرى ادامنىڭ قول بۋىنىن ەكىنشى ناۋقاسقا تىگىپ، وتانى ءساتتى اياقتادى. 31 جاستاعى ۆەتنامدىق ازامات 2016 جىلى جۇمىس بارىسىندا ابايسىزدا اپاتقا ۇشىراپ، سول قولىن قاتتى زاقىمداپ العان. ناۋقاستى اۋرۋىنان ايىقتىرۋعا ابدەن تىرىسقان دارىگەرلەر اقىرىندا امپۋتاتسيا جاساۋ قاجەتتىلىگىن ءتۇسىندىرىپ، سول قولىنىڭ بۋىنىن كەسىپ تاستاعان.

ال ونىڭ دونورى بولعان ەكىنشى پاتسيەنت وسى جاڭا جىلدىڭ باسىندا اۋرۋحاناعا اۋىر حالدە تۇسكەن. ول دا وتانداسى سەكىلدى جۇمىس بارىسىندا زاقىمدانىپ، اقىرىندا سول قولىنىڭ شىنتاعىن قاتتى جاراقاتتاپ العان. ءۇش اپتا بويى قولىن امان الىپ قالۋعا تىرىسقان دارىگەرلەر گانگرەنا پايدا بولۋ سەبەبىنەن وعان دا امپۋتاتسيا جاساماسقا بولماستىعىن ايتىپ، شىنتاعىنان تومەن كەسۋگە ءماجبۇر بولعان. الايدا بۇل ەمدەلۋشىنىڭ سول قولىنىڭ شىنتاعىنا زاقىم كەلگەنىمەن، قول بۋىنى ساپ-ساۋ. مۇنى ءۇش جىل بۇرىن قولىنان ايىرىلعان ناۋقاستىڭ پايداسىنا جارار دەپ ساناعان اۋرۋحانا دارىگەرلەرى ەكى ەمدەلۋشى جانە ولاردىڭ وتباسى مۇشەلەرىمەن اقىلداسا كەلە، ەكى تاراپتان وتا جاساۋعا كەلىسىمىن العان. سەگىز ساعاتقا جالعاسقان بۇل ءساتتى وتادان كەيىنگى ءبىر اي ىشىندە ۆەتنامدىق وزگەنىڭ سول قولىنىڭ بۋىنىن وزىنىكىندەي سەزىپ، ەركىن قيمىلدايتىن بولعان.

ءاليا تىلەۋجانقىزى

سوڭعى جاڭالىقتار