24 اقپان 2020, 20:35 513 0 نۇر وتان انار لەپەسوۆا

باۋىرجان بايبەك شىمكەنتتىكتەردى الاڭداتقان ماسەلەلەرمەن تانىستى (ۆيدەو)

«Nur Otan» پارتياسى باسشىلىعىنىڭ ايماقتارعا ساپارى وسى اپتادا ەلىمىزدىڭ وڭتۇستىك وڭىرلەرىندە جالعاستى. پارتيا توراعاسىنىڭ ءبىرىنشى ورىنباسارى باۋىرجان بايبەك الدىمەن شىمكەنتكە ات باسىن تىرەپ، قالاداعى بىرقاتار پروبلەمالىق نىسانداردى ارالادى. سونداي-اق بۇگىن كەزەكتەن تىس كونفەرەنتسيادا قالا اكىمى مۇرات ايتەنوۆ قالالىق فيليال توراعاسى بولىپ سايلاندى.

ول جۇمىس ساپارىن قالا اكىمىمەن بىرگە شىمكەنتتىڭ اباي اۋدانىنداعى م. ۆودوپيانوۆ كوشەسىنىڭ وتكەن جىلى ۇيلەرى ورتەنگەن تۇرعىندارىمەن كەزدەسۋدەن باستادى. بۇل پروبلەمالىق نىسان پارتيا توراعاسى ءبىرىنشى ورىنباسارىنىڭ الدىڭعى ساپارىنىڭ قورىتىندىسى بويىنشا قىركۇيەكتە پارتيالىق باقىلاۋعا الىنعان بولاتىن. قازىرگى ۋاقىتتا «وتاۋ ستروي» قۇرىلىس كومپانياسى تۇرعىن ءۇيدىڭ ىرگەتاسىن قالاپ، ەكىنشى قاباتىنا قۇرىلىس-مونتاج جۇمىستارىن جۇرگىزۋدە.

«ەلباسى ايتقانداي، «Nur Otan» – ناقتى ىستەردىڭ پارتياسى. سوندىقتان وسى ماسەلەنى باقىلاۋدا ۇستاپ، ارنايى كەلىپ، وزدەرىڭىزبەن كەزدەسىپ وتىرمىز. وزدەرىڭىز كورىپ وتىرسىزدار، كومپانيا بار، قاراجات بولىنگەن، قۇرىلىس ءجۇرىپ جاتىر. بۇل ماسەلە پارتيانىڭ باقىلاۋىنا الىنعان. بىزبەن بىرگە قالا اكىمىنىڭ ءوزى كەلىپ وتىر. «جۇمىلا كوتەرگەن جۇك جەڭىل» دەگەن. ءبارى زاڭ شەڭبەرىندە شەشىلەدى»، – دەدى باۋىرجان بايبەك.

جەرگىلىكتى بيلىكتىڭ مالىمەتىنە قاراعاندا، 5 قاباتتى تۇرعىن ءۇيدىڭ قۇرىلىسىنا جۋىردا بيۋدجەتتى ناقتىلاۋ كەزىندە قاجەتتى قاراجات بولىنەدى. تۇرعىن ءۇي جىل سوڭىنا قاراي پايدالانۋعا بەرىلەدى.

سودان سوڭ باۋىرجان بايبەك قالاعا بۇدان بەس جىل بۇرىن قالاعا قوسىلعان «تاسكەن» ىقشام اۋدانىنا باردى. مۇندا 2 مىڭداي ءۇي مەن بىرقاتار الەۋمەتتىك نىسان ەلەكتر ەنەرگياسىنىڭ اۋىق-اۋىق ءۇزىلىپ قالۋىنان قيىندىق كورىپ وتىر.

«وسى شاعىن اۋداندا تيىسىنشە جۇمىستار ءجۇرىپ جاتىر. 2000 ءۇي دەگەن ول ۇلكەن شارۋا. گاز شەشىلۋدە، سۋ شەشىلىپ جاتىر. قالعان ماسەلەلەر دە رەتىمەن شەشىلەدى. قىركۇيەك ايىنا دەيىن جەرگىلىكتى مونوپوليست «وڭتۇستىك جارىق ترانزيت» 270 ميلليون تەڭگەگە 39 كم جاڭا جەلى تارتۋدى جانە 9 ترانسفورماتور ورناتۋدى جوسپارلاپ وتىر. تاريفتەردىڭ اشىقتىعى مەن كوممۋنالدىق قىزمەتتەردىڭ ساپاسىن قامتاماسىز ەتۋ ماقساتىندا «Nur Otan» باستاماشىلىق ەتكەن «ايقىن تاريف» جوباسىنىڭ اياسىندا ءبىز بۇل ماسەلەنى پارتيالىق جانە قوعامدىق باقىلاۋدا ۇستايمىز، - دەدى باۋىرجان بايبەك.

كەزدەسۋ كەزىندە تۇرعىندار باسقا دا تۇيىتكىلدەردى، سونىڭ ىشىندە شاعىن اۋدانداعى جولداردىڭ ساپاسىنا قاتىستى ماسەلەلەردى ورتاعا سالدى. جەرگىلىكتى بيلىكتىڭ ايتۋىنشا، كوكتەمدە وسىنداعى بىرنەشە كوشەنى جوندەۋ جۇمىستارى باستالادى.

سونىمەن قاتار «Nur Otan» پارتياسى توراعاسىنىڭ ءبىرىنشى ورىنباسارى جۇمىس ساپارى بارىسىندا شىمكەنت قالاسىنىڭ بەلسەندى تۇرعىندارىمەن، زيالى قاۋىممەن، جاستارمەن جانە ۇكىمەتتىك ەمەس ۇيىم وكىلدەرىمەن بىرنەشە كەزدەسۋ ۇيىمداستىرىپ، قالانىڭ وزەكتى ماسەلەلەرىن بىرلەسە تالقىلادى. ولاردىڭ قاتارىندا قالانىڭ دامۋى، ينجەنەرلىك جانە جول ينفراقۇرىلىمى، دەنساۋلىق ساقتاۋ، مادەني-الەۋمەتتىك جاعدايى، يدەولوگيا سالاسى، رۋحانيات جايى بار. باۋىرجان بايبەك جۇرتشىلىق كوتەرىپ وتىرعان ماسەلەلەردىڭ بارلىعى ازىرلەنىپ جاتقان قالانى دامىتۋدىڭ 5 جىلدىق باعدارلاماسىنا ەنەتىنىن اتاپ ءوتتى.

باس قوسۋدا زيالىلار مەن ەل اعالارى دا ءوز ساۋالدارىن قويىپ، ويلارىن ورتاعا سالدى. اسىرەسە، ەلدە يدەولوگيالىق جۇمىستاردى جولعا قويۋ، تەلەارنالاردى ارزانقول، تاتىمسىز حابارلاردان ارىلتىپ، پايدالى اقپاراتپەن تولتىرۋ، مەديتسينا قىزمەتكەرلەرىنىڭ مارتەبەسىن كوتەرۋ، توتەنشە جاعداي، جول پوليتسياسى، ت.ب. سالا قىزمەتكەرلەرىنە العاشقى مەديتسينالىق كومەك كورسەتۋ تاسىلدەرىن ۇيرەتۋ سەكىلدى ۇسىنىستار بەرىلدى.

«ەلباسى، پارتيا توراعاسىنىڭ تاپسىرماسى بويىنشا، ءبىز بارلىق وڭىرلەردەگى وسىنداي «ءالسىز تۇستاردى» ورتالىق جانە جەرگىلىكتى اتقارۋشى ورگاندارمەن بىرلەسىپ جۇيەلى شەشۋ ءۇشىن انىقتايمىز. بۇل ماسەلەدە حالىق بەلسەندىلىك تانىتادى دەپ ۇمىتتەنەمىز. ءبىز بىرگە، ديالوگ جانە ءوزارا سەنىم ارقىلى عانا ەل پرەزيدەنتى ۇسىنعان «حالىق ۇنىنە قۇلاق اساتىن مەملەكەت» تۇجىرىمداماسىن ىسكە اسىرا الامىز»، – دەدى باۋىرجان بايبەك.

ەسكە سالا كەتەيىك، ەلباسى تاپسىرماسى بويىنشا «Nur Otan» پارتياسى بىرنەشە ايدان بەرى ۇكىمەتپەن جانە وڭىرلىك فيليالدارمەن بىرلەسە وتىرىپ، الداعى 5 جىلعا اۋدانداردى، قالالاردى جانە وبلىستاردى دامىتۋدىڭ جاڭا باعدارلاماسىن ازىرلەۋ جۇمىستارىن جۇرگىزىپ جاتىر. اتالعان باعدارلامالاردا ءاربىر جەكەلەگەن ءوڭىردىڭ جەرگىلىكتى ەرەكشەلىكتەرى ەسكەرىلىپ، ازاماتتاردىڭ ناقتى قاجەتتىلىكتەرى كورىنىس تاباتىن بولادى. وسى جۇمىستاردىڭ اياسىندا «Nur Otan» پارتياسىنىڭ باسشىلىعى ەلىمىزدىڭ بارلىق ءوڭىرىن، ءتىپتى شالعاي ەلدى مەكەندەرىنە دەيىن ارالاپ شىعادى. بۇگىنگى شارالار بىتە سالىسىمەن باۋىرجان بايبەك تۇركىستان وبلىسىنا جۇمىس ساپارىمەن جول تارتتى.

 

سوڭعى جاڭالىقتار