24 اقپان, 17:10 302 0 زاڭ انار لەپەسوۆا

«گارانت 24 لومبارد»: جارناما جاساپ، حالىقتى اداستىرعان ارتىستەر جايلى ارىپتەستەرى نە دەيدى؟

ەلىمىزدىڭ ءار ايماعىنان «گارانت 24 لومبارد» جانە «Estate لومبارد»  كومپانيالارىنىڭ فيليالدارىن باسقارعان تۇلعالاردى ۇستاۋ وپەراتسيالارى جالعاسۋدا. پوليتسيا وتكەن ەكى تاۋلىكتە «گارانت-24 لومبارد» جشس-ءنىڭ اتىراۋ، تاراز، پاۆلودار، قاراعاندى، اقتاۋ جانە باتىس قازاقستان وبلىسىنداعى ديرەكتورلارىن قاماۋعا الدى. 

قوعامدا اتالعان كومپانيانىڭ يەلەرىنەن بولەك، مەكەمەنى جارنامالاۋعا قاتىسقان، حالىققا تانىمال ازاماتتاردى ايىپتاۋ بەلەڭ الدى. «گارانت 24 لومبارد» جانە «Estate لومبارد» قارجىلىق ۇيىمدارىنىڭ جۇمىسىن جارنامالادى دەلىنگەن بىرنەشە ەسترادا ءانشىسى مەن اكتەرلەر الەۋمەتتىك جەلى ارقىلى حالىققا ۇندەۋ جاساپ تا ۇلگەردى.  

Azattyq Rýhy اقپارات اگەنتتىگى ونەر يەلەرىنەن ارىپتەستەرىنىڭ كۇماندى قارجى ۇيىمىن جاپپاي جارنامالاۋىنا قاتىستى پىكىرىن ءبىلىپتى.  ءانشى مەرۋەرت تۇسىپباەۆانىڭ پىكىرىنشە، جارناما ارقىلى حالىقتى قارجى سالۋعا ۇگىتتەگەن ارتىستەر «كەشىرىم سۇراپ»،  جاۋاپكەرشىلىكتەن قۇتىلىپ كەتپەۋى كەرەك.

«قازاقتا ءسوز بار: باق پەن تاقتى سالماقتى ادام عانا كوتەرەدى دەيدى. مىناۋ ينستاگرام  جوق كەزدە دە حالىق  ارتىستەردى، اكتەرلەردى تانيتىن. ۆاينەرلەر، بلوگەرلەر دە شىقتى، ولار شەشىنسە دە جۇلدىز، كيىنسە دە جۇلدىز، وسى  حالىققا كەسىرىن تيگىزىپ جاتىر. ينستادا مىڭداعان جازىلۋشىلارىم بار دەگەنى «سوبلازن»-دى كوبەيتىپ، مۇمكىندىك اشىلىپ كەتتى دەپ ويلايدى. مۇندا مەملەكەتتىڭ زاڭىنىڭ دۇرىس جۇمىس ىستەمەۋىن اتاپ ايتار ەدىم.  مادەنيەت ءمينيسترىنىڭ ءوزى لوتەرەيا تۋرالى  مىنبەردەن شەتىن ايتتى دا، قويا سالدى»،- دەيدى م. تۇسىپباەۆا.

ول «گارانت 24 لومبارد» قارجى ۇيىمىنا قاتىستى جارنامالىق روليكتەرگە تۇسكەن ءانشى، اكتەرلەردى قىلمىستىق جاۋاپكەرشىلىككە تارتۋ كەرەك دەپ ەسەپتەيدى. قر قك 274 بابىندا كورسەتىلگەندەي مۇندا كورىنەۋ جالعان اقپارات تاراتۋ بەلگىلەرى بار. ارتىستەر ءوزى تولىق زەرتتەپ، كوزى جەتپەگەن ءونىمدى جارنامالاۋدىڭ ءوزى قاتەلىك. جاساعان سوڭ، جاۋاپكەرشىلىكتى موينىنا الۋ دا ازاماتتىق، دەيدى ەستارادا ءانشىسى.

«ايقىن، اسىلحان سوسىن تاعى ۆاينەر (مەيىرجان تورەباەۆ- اۆتور) دەپ شىعىپ جۇرگەن جىگىتتىڭ ۇشەۋىڭ دە ۇيات دەپ ايتا سالعانى اقتالۋعا جاتپايدى. ولاردا جاۋاپكەرشىلىك بولۋى كەرەك. ولاردىڭ بىرەۋى اناۋ اكتەر بار عوي تولەپوۆ (اسىلحان تولەپوۆ- اۆتور), 13 ملن تەڭگە قۇيدى ما، قۇيمادى ما بىلمەيمىن. بىراق وسىلاي جارناما جاسادىڭدار ما، حالىقتى تارتتىڭدار ما، ولاردىڭ اداسۋىنا سەبەپكەر بولدىڭدار ما، بايقۇس، ساۋاتى جەتە بەرمەيتىن قاراپايىم ادامداردىڭ اداسۋىنا تۇرتكى بولدىڭدار ما، ەندى زاڭ جۇزىندە جاۋاپ بەرىڭدەر. بىزدە الاياقتىق، اداستىرۋ دەگەن سياقتى باپتار بار زاڭدا. سول تارماقتار بويىنشا ءىس قوزعالۋى كەرەك دەپ ويلايمىن»،- دەيدى سۇقباتىندا مەرۋەرت تۇسىپباەۆا.

سوڭعى جاڭالىقتار