24 اقپان, 15:41 33520 0 قاۋىپسىزدىك انار لەپەسوۆا

بۇدان بىلاي پوليتسەيلەر كۇزەت قىزمەتىن اتقارمايدى – تۇرعىمباەۆ

بۇدان بىلاي سپورتتىق جانە مادەني-بۇقارالىق ءىس-شارالاردىڭ قاۋىپسىزدىگىن قامتاماسىز ەتۋگە ىشكى ىستەر ورگاندارىنىڭ بولىمدەرىن جاپپاي تارتۋ توقتاتىلادى. بۇقارالىق شارالاردى ۇيىمداستىرۋشىلار جەكە كۇزەت قۇرىلىمدارىنىڭ جۇمىسكەرلەرىن تارتادى نەمەسە  ەرىكتىلەردىڭ كومەگىنە سۇيەنەدى. 

بۇل تۋرالى ىشكى ىستەر ءمينيسترى ەرلان تۇرعىمباەۆ مالىمدەدى. 

«سوت، پروكۋراتۋرا، سالىق ورگاندارى سەكىلدى مەملەكەتتىك نىسانداردا 12 مىڭ پوليتسەي تەكتەن-تەك كۇزەتشىلەردىڭ جۇمىسىن اتقارىپ،  قور بولىپ ءجۇر. سول سەبەپتى بۇل فۋنكتسيا ليتسەنزياسى بار جەكە كۇزەت فيرمالارىنا بەرىلمەك. بۇگىنگى تاڭدا پوليتسيا قۇرامى 11 پايىزعا قىسقارتىلعان. 1500-گە جۋىق باسشىلىق لاۋازىم تاراتىلىپتى. جول-پاترۋلدىك پوليتسياسى پاترۋلدىك بولىپ قايتا اۋىستىرىلعان. شتاتتى وڭتايلاندىرۋ ناتيجەسىندە 16 ملرد.تەڭگە ۇنەمدەلگەن. وسىلايشا قىزمەتكەرلەردىڭ جالاقىسىن ارتتىرامىز»، – دەيدى مينيستر.

سونداي-اق، مينيستر بۇدان كەيىن ىشكى ىستەر سالاسىنداعى مەملەكەتتىك قىزمەتكەرلەردى  تۇرعىن ۇيمەن قامتاماسىز ەتۋ ماسەلەسىن قوزعادى.

 «تۇرعىن ءۇيدى جالعا الۋ وتەماقىسىن الاتىن قىزمەتكەرلەردىڭ سانىن كوبەيتتىك. جەدەل تەرگەۋ بولىمدەرىمەن مۇنداي قۇقىق ۋچاسكەلىك قىزمەتكەرلەرگە، كامەلەتكە تولماعاندار ىستەرى جونىندەگى ينسپەكتورلارعا، پاترۋلدىك پوليتسەيلەرگە دە بەرىلدى. قازىر وتەماقىنى 15500-دەن استام تۇرعىن ۇيگە مۇقتاج قىزمەتكەرلەر الادى. ءالى دە 17 مىڭ قىزمەتكەر باسپانا كەزەگىندە. بۇگىندە ىشكى ىستەر مينيسترلىگى عانا قىزمەتكەرلەرىن تولىق ۇيمەن قامتاماسىز ەتپەگەن ورگان بولىپ تۇر»، – دەيدى قر ىشكى ىستەر ءمينيسترى ەرلان تۇرعىمباەۆ. 

ءمينيستردىڭ ايتۋىنشا، ۆەدومستۆولىق ءبىلىم بەرۋ جۇيەسى دە وڭتايلاندىرىلعان. پوليتسەيلەردى دايارلايتىن 12 وقۋ ورنىنان  ۇزدىك 5-ءۋى عانا قالعان. ياعني ىشكى ىستەر مينيسترلىگى باكالاۆريات باعدارلاماسى بويىنشا مامان دايارلاۋدان تۇبەگەيلى باس تارتىپ وتىر. دەگەنمەن، ۆەدومستۆو جۇزەگە اسىرىپ جاتقان كەيبىر جاڭاشىلدىقتار سەنات دەپۋتاتتارىنىڭ كوڭىلىنەن شىقپادى. ولار ارنايى وقۋ ورىندارىنىڭ قىسقارتىلعانى، كەيبىر قۇرىلىمداردىڭ بىرىكتىرىلگەنى بۇرىس دەپ ەسەپتەيدى. 

 

سوڭعى جاڭالىقتار