23 اقپان 2020, 15:55 952 0 سپورت انار لەپەسوۆا

مەملەكەت باسشىلارى سپورتتىڭ قاي تۇرىمەن شۇعىلدانادى؟

رەسەي پرەزيدەنتى ۆلاديمير پۋتين كۇن سايىن سپورتپەن شۇعىلدانادى جانە سامبو كۇرەسىنىڭ جاتتىعۋلارىن قالدىرمايدى. پرەزيدەنتتىڭ سپورتتىڭ بۇدان وزگە قاي تۇرلەرىمەن شۇعىلداناتىنىن ءباسپاسوز حاتشىسى دميتري پەسكوۆ ايتىپ بەردى.

– پرەزيدەنتتىڭ جەكە سپورتتىق ارسەنالدارىنىڭ قاتارىنا حوككەي قوسىلدى. سونداي-اق، ول جۇزۋمەن تۇراقتى اينالىسادى، سامبو كۇرەسىنىڭ جاتتىعۋلارىن ۇزبەيدى. ال جالپى فيتنەستى كۇندەلىكتى تاجىريبەگە  اينالدىرعان، – دەدى پەسكوۆ «پەرۆىي كانالعا» بەرگەن سۇحباتىندا.

رەسەي پرەزيدەنتىنىڭ سالاۋاتتى ءومىر سالتىن ۇستانىپ، سپورتپەن بەلسەندى تۇردە شۇعىلداناتىنى جايلى رەسەيلىك باق ءجيى جازادى. ول 11 جاستان باستاپ شىعىس جەكپە-جەگىمەن اينالىسادى، پۋتين  — دزيۋدو مەن سامبودان سپورت شەبەرى.

ءپۋتيننىڭ وزگە ارىپتەستەرى دە سپورتتان الىس ەمەس.

قازاقستاننىڭ تۇڭعىش پرەزيدەنتى نۇرسۇلتان نازارباەۆ ۇلكەن تەننيس پەن تاۋ شاڭعىسى سپورتىنا باسىمدىق بەرگەنى ءمالىم. ال ەلىمىزدىڭ قازىرگى باسشىسى قاسىم-جومارت توقاەۆ ۇستەل تەننيسىن شەبەر وينايدى.

اقش پرەزيدەنتى دونالد ترامپ ورتا مەكتەپتە بەيسبول جانە فۋتبولمەن اينالىسقان. ال قازىر گولف ويناۋعا قۇمار.

بەلارۋس پرەزيدەنتى الەكساندر لۋكاشەنكو دا بىرنەشە سپورت تۇرىمەن شۇعىلدانادى. اتاپ ايتقاندا، حوككەي، تەننيس، شاڭعى جارىسى جانە ۆەلوسپورتتى جاقسى كورەدى.

فرانتسيا كوشباسشىسى ەممانۋەل ماكرون بوس ۋاقىتىندا ۇلكەن تەننيس وينايدى.

ال گەرمانيا كانتسلەرى انگەلا مەركەل سكاندينالىق سەرۋەنگە اۋەس.

سوڭعى جاڭالىقتار