22 اقپان, 17:07 946 0 جاھان انار لەپەسوۆا

قىزمەتكەرلەرىنىڭ ءبىرى كوروناۆيرۋس جۇقتىرعانى ءۇشىن Samsung ءوز زاۋىتىن جاپتى

قىزمەتكەرلەرىنىڭ ءبىرى كوروناۆيرۋس جۇقتىرۋىنا بايلانىستى Samsung Electronics كومپانياسى وڭتۇستىك كورەيانىڭ كيونسان-پۋكتو پروۆينتسياسىنداعى كۋمي قالاسىندا ورنالاسقان زاۋىتىن ەكى كۇنگە جاپتى.  YTN ارناسىنىڭ حابارلاۋىنشا، ءوندىرىس ورنىندا زالالسىزداندىرۋ جۇمىستارى جۇرگىزىلەدى.

تەلەارنانىڭ دەرەگىنە سۇيەنسەك، Samsung Electronics كومپانياسىنىڭ كۋميداعى زاۋىتىندا جۇمىس ىستەيتىن 28 جاستاعى قىز قاۋىپتى ىندەتكە شالدىققان. ول ۆيرۋستى 9 جانە 16 اقپاندا "سينچحونچجي" سەكتاسىنىڭ شىركەۋدەگى جيىنىنا بارعان جىگىتىنەن جۇقتىرعان دەگەن بولجام بار.

بۇگىن، 22 اقپاندا زاۋىت قىزمەتكەرلەرىنە 24 اقپانعا دەيىن جۇمىس بولمايتىنى جونىندە حابارلاما تاراتىلعان. 25 اقپانعا دەيىن كوروناۆيرۋس جۇقتىرعان قىز جۇمىس ىستەيتىن قاباتقا كوتەرىلۋگە تىيىم سالىنىپ وتىر. سونداي-اق، زاۋىت اكىمشىلىگى جۇمىسشىلارعا ادام كوپ جينالاتىن قوعامدىق ورىندارعا بارماۋعا، بەتپەردە كيۋگە جانە تازالىق شارالارىنا مۇقيات كوڭىل بولۋگە كەڭەس بەرگەن.

ايتا كەتەيىك، بۇعان دەيىن ەل بيلىگى كيونسان-پۋكتو پروۆينتسياسىن نەگىزگى ەپيدەميولوگيالىق باقىلاۋ ايماعى دەپ جاريالاۋ تۋرالى شەشىم قابىلداعان.

بۇگىنگى تاڭدا كوروناۆيرۋس جۇقتىرۋدىڭ 231 دەرەگى  "سينچحونچجي" سەكتاسىمەن بايلانىستى بولىپ وتىر. تەگۋ قالاسىنداعى شىركەۋگە بارعان 61 جاستاعى ايەلدەن تاراعان دەگەن بولجام بار. ول قىتايعا ەشۋاقىتتا بارماعانىن ايتىپ، كوروناۆيرۋس سىناعىنان وتۋدەن باس تارتقان. اۋىرىپ جۇرگەن شاعىنىڭ وزىندە  شىركەۋگە بارۋدى توقتاتپاعان. شامامەن مىڭعا جۋىق ادام ونىمەن بايلانىسقا ءتۇسىپ ۇلگەرگەن. وڭتۇستىك كورەيا بيلىگى سەكتانىڭ 9336 سەنۋشىسىن ءۇي كارانتينىنە جاتقىزدى، ونىڭ ىشىندە 544-ىندە كوروناۆيرۋستىڭ بەلگىلەرى بىلىنە باستاعان.

ريونحاپ اگەنتتىگىنىڭ حابارلاۋىنشا، "سينچحونچجي"  سەكتاسىنىڭ سەنۋشىلەرى ۋاعىز كەزىندە ءبىر-بىرىنە وتە جاقىن وتىرادى. ءبىر-ءبىرىن قۇشاقتاپ ءان ايتادى. بۇل كوروناۆيرۋستىڭ تارالۋى جىلدامدىعىن ارتتىرادى. جەرگىلىكتى بيلىك ەندى تەگۋداعى شىركەۋگە سەكتانىڭ شەتەلدەگى فيليالدارىنىڭ مۇشەلەرى كەلگەن-كەلمەگەنىن انىقتاماق.

اتاۋى "جاڭا اسپان جانە جاڭا جەر" دەپ اۋدارىلاتىن "سينچحونچجي" ءدىني اعىمىنىڭ نەگىزىن 1984 جىلى پاستور لي مان حي قالاعان. سەكتا سەنۋشىلەرىنىڭ قاتارى الەمدە 200 مىڭنان اسىپ جىعىلادى.

 

 

سوڭعى جاڭالىقتار