17 اقپان 2020, 20:39 540 0 كولىك انار لەپەسوۆا

دەمالىس كۇندەرى الماتىدا قالىڭ قاردان 82 كولىك اپاتى تىركەلدى

سۋرەت: sputniknews.kz
سۋرەت: sputniknews.kz

الماتىدا كوممۋنالدىق قىزمەت ماماندارى وتكەن دەمالىس كۇندەرى 15 مىڭ 956 تەكشە مەتر قار شىعاردى. ەكى كۇن ىشىندە قالادا 18 سم، ال تاۋلى ايماقتاردا 90 سانتيمەترگە دەيىن اق ۇلپا جاۋعان. تازالاۋ جۇمىستارى ارنايى كەزەكشىلىكپەن ورىندالىپ، وعان 600-دەن اسا ارنايى تەحنيكا جانە 2500-گە جۋىق ادام جۇمىلدىرىلدى، دەپ حابارلايدى "الماتى" ارناسى. 

«كوكتايعاقتىڭ الدىن-الۋ ماقساتىندا قار جاۋعان كەزدە جولدارعا، جول قيىلىستارىنا كوكتايعاققا قارسى 6900 توننا ماتەريال سەبىلدى. كوشەلەردى قاردان تازارتۋعا «الماتى تازالىق» مەكەمەسىنەن باسقا 13 مەردىگەر ۇيىم جۇمىلدىرىلدى»، – دەدى قالالىق جاسىل ەكونوميكا باسقارماسى باسشىسىنىڭ ورىنباسارى دياس احمەتقاليەۆ.

قار تازالايتىن ارنايى تەحنيكالاردىڭ كەدەرگىسىز ءجۇرۋى ءۇشىن بۇل ىسكە جول پوليتسيا پاترۋلدىك اۆتوكولىكتەرى دە تارتىلدى. قار قالىڭ جاۋعان 16-سى كۇنى قالادا بارلىعى 82 جول-كولىك اپاتى تىركەلىپتى.

«وتكەن تاۋلىكتە 82 جول اپاتى تىركەلدى. 17 ادام جاراقات الدى. سالىستىرار بولساق، 17 اقپان كۇنى 61 جول كولىك اپاتى تىركەلىپ، وندا 12 كىسى جاراقات العان. جول اپاتى 25 پايىزعا ءوستى»، - دەپ حابارلايدى قالالىق پد جەرگىلىكتى پوليتسيا قىزمەتى باسقارماسىنىڭ باستىعى تورەحان يسين.

قاردىڭ قالىڭ جاۋى سالدارىنان قالادا 136 اعاش قۇلاعان. ونىڭ 56 جاعدايىندا سىنعان اعاشتىڭ بۇتاقتارى اۆتوكولىكتەردى باسىپ قالعان.

«مۇنداي جايتتەر اسىرەسە، بوستاندىق جانە اۋەزوۆ اۋداندارىندا كوپ كەزدەستى. قۇلاعان اعاشتىڭ بۇتاقتارى اۆتوكولىكتەردى باسىپ قالعان. بۇگىنگى كۇنى 101 ءوتىنىم ورىندالدى. ونىڭ 54-ءى بۇگىن تاۋلىك بويى جاسالادى»، – دەدى قالالىق قۇتقارۋ قىزمەتىنىڭ باسشىسى دميتري چۋحونتسەۆ.

بۇل رەتتە قۇتقارۋ قىزمەتى قالا تۇرعىندارىن جۇرگىنشىلەر جولىنان وتەردە اباي بولۋعا شىقىردى. سونداي-اق، كولىكتەرىن اعاشتىڭ تۇبىنە قويماۋعا كەڭەس بەردى.

سوڭعى جاڭالىقتار