17 اقپان, 16:59 1365 0 قاۋىپسىزدىك انار لەپەسوۆا

دۇنگەندەر قاۋىمداستىعىنىڭ باسشىسى قورداي وقيعاسىنا كىم كىنالى ەكەنىن ايتتى

قازاقستان دۇنگەندەرى قاۋىمداستىعىنىڭ باسشىسى حۋسەي داۋروۆ قوردايدا بولعان وقيعالار بويىنشا مالىمدەمە جاسادى. 

Sputnik قازاقستان-نىڭ حابارلاۋىنشا، ۇيىم جەتەكشىسى ءوزىنىڭ Facebook پاراقشاسىندا قازىرگى قوردايدىڭ فوتوسىن جاريالاپ، كوپتەن كۇتكەن قاردىڭ تۇسكەنىن حابارلادى. بىراق ۇلپا قاردىڭ استىندا قايعىلى وقيعا ىزدەرىنىڭ جاتقانىن ەسكە سالدى. سول كەزدە 11 ادام قازا بولىپ، 200-دەن استامى جاراقات الدى.

وسى ورايدا دۇنگەندەردىڭ باسشىسى "كىناسى جوق بەيبىت ادامداردى نە ءۇشىن ءولتىردى؟", "قۇقىقتىق مەملەكەت بولىپ سانالاتىن قازىرگى قازاقستاندا ونداي مۇمكىن بە؟", "شىنىمەن دە، بۇنى ۇلى اباي، شوقان ءۋاليحانوۆ، قوجا احمەت ياسساۋي، ابىلاي حان، قاسىم حان، تولە بي مەن قازىبەك ءبيدىڭ ۇرپاقتارى جاسادى ما؟", "جەتى اتاسىن بىلەتىن ءارى باتىر بابالارىنىڭ ابىرويىن باعالايتىن، ۇلى وتان سوعىسى كەزىندە كەڭەس وداعىنىڭ تۇكپىر-تۇكپىرىنەن ەۆاكۋاتسيالانعان ميلليونداعان ادامعا پانا بەرگەن حالىقتىڭ ءىزباسارلارى ىستەدى مە؟",- دەگەن سۇراقتارعا جاۋاپ ىزدەيدى.

"بۇل حالىق كەزىندە تاياۋ شىعىس پەن كاۆكازدان دەپورتاتسيالانعان مىڭداعان ەتنوستى باۋىرىنا باسقان. جوق!!! مۇنى ىستەگەن قازاقتار ەمەس! مۇنى كسەنوفوبيا مەن ۇلتشىلدىق ۇراندارىنا سالىنعان قىلمىسكەرلەر مەن قاراقشىلار، وڭاي ولجاعا كوز الارتقان توناۋشىلار، بىزدەگى ۇلتارالىق كەلىسىم مەن تۇراقتىلىقتىڭ قارسىلاستارى جاسادى. ولارعا ءتۇرلى-ءتۇستى توڭكەرىستەر تەحنولوگياسىمەن شەتەلدىڭ ەميسسارلارى باسشىلىق ەتتى. ال قازاقتار ءبىزدى قۇتقاردى!", - دەپ جازدى داۋروۆ.

ونىڭ ايتۋىنشا، قوردايداعى جاپپاي تارتىپسىزدىكتەر كەزىندە قازاقتار دۇنگەن وتباسىلارىنا كومەك كورسەتىپ، قاۋىپ-قاتەردەن امان الىپ قالدى.

"قۋانىش دەگەن فەرمەر ءوز ۇيىندە دۇنگەندەردىڭ بىرنەشە وتباسىن جاسىردى. اينۇر، ازامات پەن سونيا دەگەن دارىگەرلەر دە تۋرا سولاي ىستەپ، بالالارى بار بىرنەشە وتباسىنى قۇتقاردى. ەگدە جاستاعى ءبىر ايەل ەكى جىگىتتى امان الىپ قالدى دا، ءوز ۇيىندە شاي بەردى. ونداي فاكتىلەر كوپ", - دەيدى داۋروۆ.

ۇيىم جەتەكشىسى قوردايداعى قاقتىعىستىڭ نەگىزگى سەبەپ-سالدارىن انىقتاۋ قاجەتتىگىن جەتكىزدى. سونداي-اق، داۋروۆ قازاقستان حالقى اسسامبلەياسىنىڭ جۇمىسىن جەتىلدىرۋ كەرەك دەپ سانايدى.

 

سوڭعى جاڭالىقتار