16 اقپان, 12:23 1209 0 الەۋمەت انار لەپەسوۆا

مينيستر قايتىس بولعان ادامنىڭ اعزاسى دونورلىققا قانداي جاعدايدا الىناتىنىن ايتتى

قايتىس بولعان ادامنىڭ ازعاسى رۇقساتسىز دونورلىققا الىنبايتىن بولدى. قىزۋ تالقىلانعان نورماعا قاتىستى دەنساۋلىق ساقتاۋ ءمينيسترى وسىنداي شەشىم قابىلدانعانىن ايتتى. بۇل رەتتە دۇنيەجۇزىلىك دەنساۋلىق ساقتاۋ ۇيىمىنىڭ ۇسىنىستارى ەسكەرىلگەن. ەڭ باستىسى مۇنداي قادامعا بارۋعا ازاماتتاردىڭ جازعان مىڭداعان پىكىرى سەبەپ بولىپتى.

بۇل تۋرالى  31 ارنانىڭ "ينفورمبيۋرو" جاڭالىقتار باعدارلاماسى حابارلادى. 

وسىمەن 7-ءشى رەت وتكەن قوعامدىق كەڭەستىڭ وتىرىسىنا دەنساۋلىق كودەكسى تۋرالى پىكىر ايتىپ جۇرگەن مۇرات ابەنوۆ تە قاتىستى. كودەكسكە ەنگىزىلەدى دەگەن نورمالاردىڭ ىشىندە قىزۋ تالقىعا تۇسكەن ماسەلەلەر ەكپە جانە اعزا دونورلىعى بولاتىن. ازاماتتاردىڭ پىكىرىن سارالاعان مينيسترلىك تارابى تۇجىرىمداما جوباسىنا بىرقاتار وزگەرىستەر ەنگىزىپتى.

"ەڭ ءبىر ماڭىزدى ماسەلە - ول قايتىس بولعان ادامنىڭ مۇشەلەرىنىڭ دونورلىققا الىنۋى. ەگەر مارقۇم بۇل جاعدايعا بايلانىستى ءتىرى كەزىندە ەشنارسە ايتپاسا، ال ونىڭ تۋىستارى كەلىسىم بەرسە، ىشكى مۇشەلەردى دونولىققا پايدالانۋ قاراستىرىلعان. ال ەگەر رۇقسات بولماسا، ورگانداردى الۋعا تىيىم سالىنادى", - دەدى دەنساۋلىق ساقتاۋ ءمينيسترى ەلجان ءبىرتانوۆ.

ەلجان ءبىرتانوۆ ۆاكتسينا ماسەلەسىندە دە بىرقاتار وزگەرىستەر بار دەدى. بۇل رەتتە ەكپە پرەپاراتتارىنىڭ ساپاسىنا، ونى جەتكىزۋشى كومپانيالاردىڭ جاۋاپكەرشىلىگى دە زاڭدا بەكىتىلەدى دەپ وتىر. ۆاكتسيناعا قاتىستى ۇسىنىستار بويىنشا قازاقستانعا ارنايى كەلگەن ددسۇ وكىلى حانس كليۋگە باستامالارعا وڭ باعاسىن بەرىپتى. سونداي-اق جارتى الەمنىڭ ۇيقىسىن قاشىرعان ىندەتتىڭ جاپپاي تارالۋىنا قارسى ەلىمىزدىڭ اتقارىلىپ جاتقان شارالارىنا كوڭىلى تولاتىنىن ايتىپ، العىسىن جەتكىزگەن.

"دۇنيەجۇزىلىك دەنساۋلىق ساقتاۋ ۇيىمى وسى ىندەتكە قارسى كەمشىلىكتەردى جويۋعا جانە توتەنشە جاعدايلارعا بايلانىستى ءىس-قيمىلداردى رەتتەۋگە الەمنىڭ بارلىق ەلىنە قولىنان كەلگەن بار مۇمكىندىكتى ايامايدى. ونىڭ ىشىندە قازاقستانعا ەرەكشە كوڭىل بولەمىز. ناۋقاستاردى قاداعالاۋ، ەمدى ىزدەۋ، ىندەتتىڭ الدىن الۋعا ەلدى دايىنداۋ باعىتىندا بىرلەسە جۇمىس ىستەيتىن بولامىز", - دەدى ددسۇ وكىلى.

دۇنيەجۇزىلىك دەنساۋلىق ساقتاۋ ۇيىمى مەن قازاقستاننىڭ دەنساۋلىق ساقتاۋ مينيسترلىگى اراسىندا ەكى جىلعا ارنالعان كەلىسىمگە قول قويىلعان. وسى قۇجاتقا سايكەس ەلدەگى جۇقپالى جانە جۇقپالى ەمەس ىندەتتەردى الدىن الۋ باعىتىندا كومەك كورسەتىلمەك.

سوڭعى جاڭالىقتار