14 اقپان 2020, 18:46 611 0 ادەبيەت ارايلىم بيمەنديەۆا

قازاق ادەبيەتى انتولوگيالارى بۇۇ-نىڭ 6 تىلىنە اۋدارىلدى

الماتى قالاسىندا «جاھانداعى زاماناۋي قازاقستاندىق مادەنيەت» جوباسى اياسىندا بۇۇ-نىڭ 6 تىلىنە اۋدارىلعان قازاق ادەبيەتى انتولوگيالارىنىڭ تانىستىرىلىمى ءوتتى.

اتالعان جوبا قازاقستان رەسپۋبليكاسىنىڭ تۇڭعىش پرەزيدەنتى – ەلباسى ن.نازارباەۆتىڭ باستاماسىمەن جۇزەگە اسىپ جاتقان «رۋحاني جاڭعىرۋ» باعدارلاماسى باعىتتارىنىڭ ءبىرى. تۇتاستاي العاندا، ول تاۋەلسىزدىك جىلدارىنداعى قازاق ادەبيەتى مەن مادەنيەتىن، مۋزىكاسى مەن بەينەلەۋ ونەرىن، حورەوگرافيا، كينو جانە تەاتر سالاسىنداعى جەتىستىكتەرىن الەمگە تانىتۋدى ماقسات تۇتادى. جوبا قر مادەنيەت جانە سپورت مينيسترلىگىنىڭ تاپسىرىسى بويىنشا «ۇلتتىق اۋدارما بيۋروسى» قوعامدىق قورىنىڭ ۇيلەستىرۋىمەن جۇزەگە اسىرىلدى.

جيىنعا شىعارمالارى الەم تىلدەرىنە اۋدارىلعان اۆتورلار مەن اۋدارماشىلار، قر مەملەكەتتىك حاتشىسى، «رۋحاني جاڭعىرۋ» باعدارلاماسىن ىسكە اسىرۋ جونىندەگى ۇلتتىق كوميسسيانىڭ توراعاسى قىرىمبەك كوشەرباەۆ، الماتى قالاسىنىڭ اكىمى باقىتجان ساعىنتاەۆ، مادەنيەت جانە سپورت ءمينيسترى اقتوتى رايىمقۇلوۆا قاتىستى. باسقوسۋدا اۋدارما جۇمىسى قورىتىندىلانىپ، اۆتورلارعا التى تىلدە جارىق كورگەن شىعارمالارىنىڭ جيناقتارى تاپسىرىلدى.

مەملەكەتتىك حاتشى قىرىمبەك كوشەرباەۆ قازاق ادەبيەتىنىڭ ۇزدىك ۇلگىلەرىن بۇۇ-نىڭ 6 تىلىنە اۋدارۋ جانە ونى وسىنداي كەڭ كولەمدە تاراتۋ – بۇرىن-سوڭدى ءبىزدىڭ تاريحىمىزدا بولماعانىن ايتتى. «بۇل جوبانى ۇيىمداستىرۋ جانە ۇيلەستىرۋ جۇيەسى دە بۇرىنعىدان وزگەشە بولدى. ونداعى باستى ماقسات – كوركەم اۋدارمانىڭ جوعارى ساپاسىن قامتاماسىز ەتۋ ەدى. ول ءۇشىن ەڭ الدىمەن، جوبانى جۇزەگە اسىرۋعا 6 ەلدەگى كوركەم اۋدارما سالاسىندا تاجىريبەسى مول، بەدەلدى دەگەن باسپالار تاڭدالدى. 60 اۆتوردىڭ ۇزدىك تۋىندىلارى ەنگەن انتولوگيالار دۇنيەجۇزىنىڭ 5 قۇرلىعىنداعى 93 مەملەكەتتىڭ ءىرى كىتاپحانالارى، ىرگەلى وقۋ ورىندارى، مادەنيەت پەن ادەبيەتكە ماماندانعان عىلىمي ورتالىقتارىنا تاراتىلادى»، – دەدى قىرىمبەك كوشەرباەۆ.

قازاق ادەبيەتى جيناقتارىنىڭ اعىلشىن تىلىندەگى نۇسقاسىن كەمبريدج ۋنيۆەرسيتەتىنىڭ باسپاسى، اراب تىلىندەگى باسىلىمىن مىسىردىڭ ۇلتتىق ءبىلىم جانە مادەنيەت ورتالىعى، يسپان تىلىندەگى جيناقتاردى سەرۆانتەس ينستيتۋتى، ورىس تىلىندەگى انتولوگيالاردى م.لومونوسوۆ اتىنداعى ماسكەۋ مەملەكەتتىك ۋنيۆەرسيتەتىنىڭ باسپا ءۇيى، قىتاي تىلىندەگى جيناقتاردى بەيجىڭدەگى ۇلتتار باسپاسى، فرانتسۋز تىلىندەگى باسىلىمدى ءپاريجدىڭ مادەني بىرلەستىگى دايىندادى. اتالعان سەرىكتەس-ۇيىمدار اۋدارما، باسىپ شىعارۋ، تاراتۋ-ناسيحاتتاۋ جۇمىستارىنا 300-گە جۋىق مامان جۇمىلدىردى.

جوبا اياسىندا اۋدارما ەرەكشەلىگىن تالقىلاپ، ءوزارا اڭگىمەلەسۋ ءۇشىن شەتەلدىك اۋدارماشىلار مەن باسپاگەرلەردىڭ قازاقستاندىق اۆتورلارمەن كەزدەسۋى وتكىزىلدى. بۇل اۋدارمانى تۇپنۇسقا ماتىنگە مەيلىنشە جاقىنداتۋعا ءارى ونىڭ كوركەمدىك ساپاسىن قامتاماسىز ەتۋگە مۇمكىندىك بەردى.

ءار انتولوگيانىڭ تارالىمى – 10 مىڭ دانادان. جالپى سانى 120 مىڭ جيناق الەمدەگى 23 مىڭنان اسا ءىرى كىتاپحانا، وقۋ ورىندارى مەن عىلىمي ورتالىقتارعا جەتكىزىلدى. ونىڭ ىشىندە اعىلشىن ءتىلدى باسىلىمدار اعىلشىن ءتىلى رەسمي مارتەبەگە يە 18 مەملەكەتكە، اراب تىلىندەگى جيناقتار تاياۋ شىعىس پەن افريكاداعى 22 مەملەكەتكە، يسپان تىلىندەگى باسىلىمدار يسپانيامەن قاتار لاتىن امەريكاسىنىڭ 20 ەلىنە، قىتاي تىلىندەگى باسىلىمدار ەلدىڭ بارلىق ايماقتارىنا، ورىس تىلىندەگى جيناقتار 14 مەملەكەتكە، فرانتسۋز تىلىندەگى تارالىم ەۋروپا مەن افريكانىڭ 17 ەلىنە تارالدى.

سونداي-اق، قازاق ادەبيەتىنىڭ انتولوگيالارى ءىرى كىتاپحانا قورلارى مەن ونداعى ەرەكشە كىتاپتاردى ەسەپكە الاتىن WorldCat حالىقارالىق بيبليوگرافيالىق جۇيەسىنە ەندى. انتولوگيالاردى العان ەلدەر مەن ۇيىمداردان 100-دەن اسا العىس حات كەلگەن. ولاردىڭ قاتارىندا فرانتسيا پرەزيدەنتى ەممانۋەل ماكرون، ۇلىبريتانيا ءبىلىم ءمينيسترى گەۆين ۋيليامسوننىڭ العىس حاتى بار.   

سوڭعى جاڭالىقتار