6 اقپان, 19:34 1497 0 اتاجۇرت "تۇركىستان" گازەتىنىڭ اۆتورلارى

پرەزيدەنت «جانام دەگەن جۇرەككە» وت بەردى

پرەزيدەنت قاسىم-جومارت توقاەۆ «اباي جانە ءححى عاسىرداعى قازاقستان» اتتى ماقالاسىن جاريالاي سالىپ، كوپ وتپەي 13 مىڭ ادامنىڭ  ىشىنەن پرەزيدەنتتىك جاستار كادر رەزەرۆىنە ىرىكتەپ العان 300 ازاماتتى اقورداعا شاقىرىپ، اق تىلەگىن ايتىپ، ولاردى مەملەكەتتىك ورگاندار مەن ۇلتتىق كومپانيالارعا جاۋاپتى قىزمەتكە جىبەرەتىنىن جەتكىزدى. رەزەرۆكە وتكەن 55 ازاماتتى جاڭا قىزمەتكە تاعايىنداپ ۇلگەرگەنىن دە ايتتى.

ءسويتىپ، قازاقستاننىڭ ورىمدەي 300 قىز-جىگىتى پرەزيدەنتتىڭ اق باتاسىن الىپ، اقوردادان اۋىر مىندەت ارقالاپ شىقتى.

وتكەن عاسىردىڭ جەتپىسىنشى جىلدارىندا كەڭەستىك بيلىك قازاق جاستارىن «كومسومولمەن اۋىلعا!» دەگەن قىزىل ۇرانمەن مەكتەپ بىتىرە سالىسىمەن اۋىلعا قۋاتىنى ەسىمىزدە. ونى سول كەزدەگى «ازاتتىق» راديوسىنىڭ ءتىلشىسى، الاشتىڭ ارداقتى ۇلى، اسا كورنەكتى قوعام قايراتكەرى، مارقۇم حاسەن ورالتاي اعامىز ميۋنحەن قالاسىندا وتىرىپ، «كەڭەس وداعى قازاق جاستارىن جوعارى بىلىممەن سۋسىنداتپاي، ساۋاتسىز قالدىرىپ جاتىر!» دەپ كۇن قۇرعاتپاي سىنايتىن ەدى كەپ.

ال بۇگىن تاۋەلسىز قازاقستاننىڭ باسشىسى قازاق جاستارىن الەمنىڭ بەس قۇرلىعىنان وقىتىپ-توقىتىپ الىپ، مەملەكەتتىك بيلىككە جىبەرىپ وتىر.

بۇل – بۇرىن-سوڭدى بولماعان تاريحي وقيعا!

شىنىمدى ايتسام، ءوز باسىم وسى بىرەگەي باستامانىڭ اسەرىنەن ءالى شىعا الماي ءجۇرمىن. كوز الدىما اقورداداعى كەزدەسۋ ورالادى دا تۇرادى...

ارينە، ءۇش ءجۇز جاستىڭ بارىمەن كەزدەسىپ، سويلەسۋ مۇمكىن دە، شارت تا ەمەس. تەلەارنا جاڭالىقتارىن كورىپ وتىرىپ، سولاردىڭ قاتارىنان Jas Otan جاستار قاناتىنىڭ توراعاسى داۋلەت كارىبەكتى كوزىمىز شالىپ، قاتتى قۋاندىق.

داۋلەت جۇمابايۇلى – قازاقي ۇستانىمى بەرىك، سوزگە شەشەن، Nur Otan-نىڭ ۇلكەن مەكتەبىندە ءوزىن باپتاپ كەلە جاتقان جىگىت.

سوسىن، الىبەك ىدىرىسۇلىمەن كەزدەيسوق جولىعىپ، اڭگىمەلەسۋدىڭ ءساتى ءتۇستى. «ىرىكتەۋ جۇمىسى وتە قاتاڭ بولدى!» دەيدى ءا. ىدىرىسۇلى باسىن شايقاپ.

الىبەك قىتاي حالىق رەس­پۋب­ليكاسىنىڭ كۇنەس اۋدانىنىڭ تۋماسى ەكەن.  2005 جىلى اتا­جۇرتقا ورالىپتى. سول جىلى ءال-فارابي اتىنداعى قازۇۋ-دىڭ دايىندىق كۋرسىنا وقۋ­عا ءتۇسىپ، كەيىن وسى ۋنيۆەرسيتەتتىڭ بيولوگيا مامان­دى­عىن ۇزدىك ناتيجەمەن اياقتاپتى. گەو­بوتانيكا ماماندىعى بويىنشا وقۋىن ما­گيستراتۋراعا، ودان عىلىمي جۇ­مى­سىن دوكتورانتۋرادا جال­عاس­تىر­ىپتى. قازىر قازۇۋ-دە عىلىمي جانە وقى­تۋشىلىق قىزمەتتە ەكەن.

كادرلىق رەزەرۆكە وتكەننەن كەيىن الىبەك ىدىرىسۇلىنا كوپ­تەگەن ۇسىنىس ءتۇسىپتى. ولاردىڭ باسىم كوپشىلىگى اۋدان اكىمىنىڭ ورىنباسارى، قا­لالارداعى باسقارما باسشىسى، ءتىپتى مينيسترلىكتەگى دەپارتامەنت ديرەكتورى، سىندى قىزمەتتەر ەكەن. ءالى دە شاقىرۋلار ءتۇسىپ جاتقان كورىنەدى.

وسىدان تۋرا ءبىر عاسىر، ناقتىلاپ ايتساق، 104 جىل بۇرىن «قازاق باسقارماسىنىڭ باسپاحانا تۋرالى جازعان سوزىنە ءىشىمىز ەرىپ، قىتاي قول استىنداعى كۇنەس ەلىنىڭ قازاقتارى «ازامات» سەرىكتىگىنە 600 سوم جىبەردىك. الاش ۇراندى قازاق بالاسى «اھ!» دەسىپ قولعا العان ىسىنەن ءبىز دە قۇر قالمالىق دەدىك. الاش تۋىنىڭ استىندا ءبىز دە قوسىلدىق. قاراڭعى ءبىر شەت جەردەن بىزدەر قوسىلعاندا باسقا كوزى اشىق، كوڭىلى سەرگەك قاي قازاق قاراپ قالار دەيمىز. ءبۇتىن التى الاش بولىپ ءبىر باسپاحاناعا يە بولا الماسا، قانشا نوعايعا كۇلكى بولمايمىز با؟ باياعىدان بەرى تەلمىرگەنىمىز از با؟ ەگەر قازاقتىڭ ءبىر باسپاحاناسى بولسا، ءارتۇرلى گازەت، جۋرنال باسىلىپ، قازاقشا مەكتەپ كىتاپتارى كوبەيىپ، كوزىمىز اشىلار ەدى» دەپ حات جازىپ، وعان ماقسۇت ءتايجى ساسانۇلى، مولدا نۇربەكۇلى، قۇسبولات بايبولاتۇلى، جايىربەك ساسانۇلى، راقىم اقىلبەكۇلى، جيەنالى مەيىرمانۇلى قول قويىپ، الاش كوسەمدەرى اشقان «قازاق» باسقارماسىنىڭ «ازامات» سەرىكتىگىنە 600 سوم جىبەرگەنى بار («قازاق» گازەتى. 1916 جىل، 17 مارت. №222).

مىنە، قىزىق! الىبەك ىدىرىسۇلى باۋىرىمىز – وسىندا التى ادامنىڭ ىشىندە ەسىمى ەكى جەردە اتالعان سول ساسان ءبيدىڭ تىكە ۇرپاعى.

شىنى كەرەك، مەملەكەتتىك بيلىكتە تاۋەلسىزدىك جىلدارى شەتتەن ورالعان قانداستارىمىز جوقتىڭ قاسى. جوق.

دەمەك، 300-ءدىڭ قاتارىندا قاراكوكتىڭ تۇقىمى، تەكتىنىڭ تۇياعى از ەمەس دەپ ويلايمىن! كوپ بولسا ەكەن دەپ تىلەيىك!

«قوعام وكىلدەرى بيلىكتىڭ ءىس-ارەكەتىمەن كەلىسپەگەن جاعدايدا پىكىرىن ەركىن ايتۋعا مۇمكىندىگى بولۋى قاجەت» – دەدى مەملەكەت باسشىسى كەزدەسۋدە.

بۇل – قوعام وكىلدەرى عانا ەمەس، جاس كادرلاردىڭ دا جادىندا بولاتىن ءسوز.

ەسكى جۇيەگە ەتى ۇيرەنىپ العان اعا بۋىن باسشىلاردىڭ وكشەسىن باسىپ كەلە جاتقان جاستاردى بىردەن تىڭداي قويۋى، قابىلداي سالۋى قيىن، ارينە. جاستار ەبىن تاۋىپ، ءبىلىمى مەن بىلىگى ارقىلى وزدەرىن ولارعا تىڭداتا ءبىلۋ كەرەك!

وسى جەردە كوشى-قون ساياساتى مەن Nur Otan پارتياسى تۋرالى از-كەم توقتالا كەتكەنىم ارتىق بولماس دەپ ويلايمىن.

ەلباسى نۇرسۇلتان نازارباەۆ ەرتە جولعا قويعان كوشى-قون ساياساتى بۇل كۇندە ءوز جەمىسىن بەردى. وكىنىشكە قاراي، اتالعان ساياساتتىڭ 2011 جىلدان باستاپ ءتورت-بەس جىل داعدارىسقا ۇشىراعانى بەلگىلى.

كوشى-قون – وتە كۇردەلى ساياسات. وعان قارسى ىشكى جانە سىرتقى جاۋلار جەتەرلىك. ەكى بۇيىرىمىزدە وتىرعان قۇداي قوسقان الىپ كورشىلەرىمىز قازاقتىڭ كوبەيىپ، ۇلتتىق مەملەكەت قۇرۋىمىزدى ۇناتىپ وتىرماعىنى جاسىرىن ەمەس. وزگە ەلدە تۋىپ، ءوز وتانىنا كەلگەن اعايىنداردىڭ جاڭا ورتانىڭ قىرى مەن سىرىن، زاڭى مەن قاعيداسىن بىردەن ءبىلىپ، ۇيلەسىپ كەتۋى – تىپتەن قيىن شارۋا. كوڭىل مەن نيەت قانشا جەردەن ءتۇزۋ بولعانىمەن، ءوز باسىنان وتپەگەن سوڭ، جەرگىلىكتى بيلىك وكىلدەرىنىڭ كوبى ولاردىڭ پروبلەمالارىن تولىق تۇسىنە بەرمەيتىنى تاعى انىق.

ادىلەت ءۇشىن ايتۋىمىز كەرەك، كوشى-قون ساياساتىن تۋىنداعان بارلىق داعدارىستان ۇلت كوشباسشىسى نۇرسۇلتان نازارباەۆتىڭ ءوزى شىعارىپ الىپ، وڭ باعىتقا بۇرىپ وتىردى.

مىنە، جاڭا پرەزيدەنت قاسىم-جومارت توقاەۆ سول ساباقتاستىقتى جالعاپ، «دۇنيەجۇزىندەگى قانداستارىمىزدىڭ باسىن تۋعان جەردە بىرىكتىرۋ – ءبىزدىڭ قاسيەتتى پارىزىمىز» دەپ، بيىك ماقسات قويدى.

مەن بۇل ساياساتقا سول 2010 جىلى كەلىپ قوسىلدىم. ەڭ الدىمەن ءوزىم بايقاعان كىلتيپانداردى ءتىزىپ، قۇزىرلى مەكەمەلەرگە حات جازىپ، جاۋاپ الىپ كوردىم. شىنىن ايتايىن، ول جاۋاپتار مەنى قاناعاتتاندىرمادى. باعامداي كەلە، بار ماسەلەنىڭ «حالىقتىڭ كوشى-قونى تۋرالى» زاڭىندا ەكەنىنە كوز جەتكىزدىم. ءسويتىپ، 2012 جىلى قاڭتار ايىندا الماتىنى تاستاپ، ءبىر جولاتا  ەلورداعا قونىس اۋداردىم. جەرلەس اعامىز ايدىن ورازانبايۇلىنىڭ ۇيىندە تۇرىپ جاتتىم. قازاقتىڭ كورنەكتى اقىنى نەسىپبەك ايتۇلى جۇمىسقا الدى.

تۇزەتۋ بىلاي تۇرسىن، 2013 جىلدىڭ سوڭىندا «حالىقتىڭ كوشى-قونى تۋرالى» زاڭى ءتورت جىلسىز ازاماتتىق بەرىلمەيتىن ەتىلىپ، قايتا قابىلدانىپ كەتتى. ەندى ەلباسىنىڭ اتىنا تىكە حات جازۋعا تۋرا كەلدى. جان ۇشىرىپ، «ناعاشىما حاتتى» جازىپ، جاريالادىق. حات مەملەكەت باسشىسىنا جەتتى. پرەزيدەنت كەڭسەسىنىڭ سول كەزدەگى باسشىسى، ۇلكەن جۇرەكتى ازامات  ماحمۇت قاسىمبەكوۆ اعامىز اقورداعا شاقىرىپ، حاتتى نۇرسۇلتان ءابىشۇلىنىڭ وقىعانىن، زاڭنىڭ قايتا قالپىنا كەلەتىنىن جەتكىزدى. قۋانعانىمنان اقوردادان جىلاپ شىقتىم. كوپ وتپەي، پرەزيدەنت جارلىق شىعارىپ، 2015 جىلى اتالعان زاڭ پارلامەنتتە قايتا قارالدى. كوشى-قون پروتسەسىن باستان باستان كەشكەن ازامات رەتىندە، سودان بەرى ماجىلىستەگى جۇمىس توبىنا قاتىسىپ كەلەمىن.

بىراق، ماسەلە مۇنىمەن دە تولىق شەشىلىپ كەتە قويعان جوق. ەندى اتالعان سالانى وڭ باعىتقا بۇرۋ، جابىلعان جالا مەن جاعىلعان كۇيەدەن تازارتىپ، بەدەلىن تىكتەۋ ءۇشىن مۇمكىندىك الاڭىن ىزدەي باستادىم. ول مۇمكىندىكتىڭ Nur Otan پارتياسىندا ەكەنىنە كوزىم انىق جەتتى.

نە كەرەك، ءوتىنىش جازىپ، سول كەزدەگى كەڭەسشى بەرىك ءۋاليدىڭ كومەگىمەن پارتيا توراعاسىنىڭ ءبىرىنشى ورىنباسارى اسقار مىرزاحمەتوۆتىڭ ءوز قولىنان پارتيا بيلەتىن الدىم.

ارادا Nur Otan پارتياسى توراعاسىنىڭ ءبىرىنشى ورىنباسارى بولىپ،  مۇحتار قۇل-مۇحاممەد كەلدى.

Nur Otan – ەلباسىنىڭ پارتياسى. كوشى-قون – ەلباسى ەرتە جولعا قويعان ۇلى ساياسات. شىن مانىندە، ەكەۋىنىڭ ءبىر انانىڭ ەگىز بالاسى سەكىلدى ەكەنىن مۇحاڭا ايتىپ، پارتيادا قىزمەت ەتكىم كەلەتىنىن جەتكىزدىم.

بولمىسى بولەك جىگىت قوي، ەكى سوزگە كەلگەن جوق، مۇحتار ابىرارۇلى مەنى پارتيانىڭ رەسپۋبليكالىق قوعامدىق قابىلداۋ بولمەسىنە كەڭەسشى ەتىپ، جۇمىسقا الدى. ورتالىق اپپاراتتا بوس ورىن بولماعاندىقتان، شتاتتى پارتيانىڭ شارۋاشىلىق بولىمىنەن بەردى.

نەگىزى شارۋاشىلىق ءبولىم قىزمەتكەرلەرىنىڭ مىندەتى – قار كۇرەۋ، ەدەن جۋ، ءسونىپ قالعان شامداردى جاعۋ. قازاقشا ايتقاندا، ونداعىلار «قارا جۇمىسشى» دەپ اتالادى. وعان قاراپ جاتقان مەن جوق، جۇمىسقا بىلەك ءتۇرىپ، كىرىستىم دە كەتتىم.

مينيسترلەر مەن ولاردىڭ ورىنباسارلارى، باس روكۋراتۋرانىڭ جاۋاپتى تۇلعالارى، ءماجىلىس دەپۋتاتتارى، پارتيا توراعسىنىڭ ءبىرىنشى ورىنباسارى مەن حاتشىلارى رەسپۋبليكالىق قوعامدىق قابىلداۋ بولمەسىنە رەت-رەتىمەن كەلىپ، ازاماتتارمەن قابىلداۋ وتكىزەدى ەكەن. كوشى-قون ماسەلەلەرىن شەشۋگە بۇدان ارتىق قانداي وراي كەرەك؟! مىنە، مەن ىزدەگەن مۇمكىندىكتىڭ كوكەسى – ءدال وسى جەر ەمەس پە؟!

ءسويتىپ، ءبىرىنشى كەزەكتە ىشكى ىستەر ءمينيسترى، اتاقتى قالمۇحانبەت قاسىموۆتىڭ قابىلداۋىنا كىردىم. كەلەسى دە ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆاعا. كوشى-قوننىڭ ەڭ كۇيىپ تۇرعان پروبلەماسى وسى ەكى مينيسترلىككە قاتىستى. ارى قاراي، دەپۋتاتتار... شىنىن ايتايىن، پارتيا قىزمەتكەرلەرىندە مۇنداي «قۇقىق» بۇرىن بولماعان ەكەن. ءوزىم عانا كىرىپ قويماي، ماسەلەسى شەشىلمەي كەلە جاتقان قانداستارىمدا دا جازدىرىپ، توپىرلاتىپ قوسا ەرتىپ كىرەم. الىس ايماقتاعىلار وبلىستىق، قالالىق فيليالدارعا كەلىپ، بەينەبايلانىس ارقىلى ارىز-شاعىمى ايتادى.  ونىمەن دە شەكتەلىپ قالماي، ەكى-ءۇش اي وتكەن سوڭ، قۇزىرلى ورگان باسشىلارىن قاتىستىرا وتىرىپ، قانداستارىمىزدىڭ كۇن تارتىبىندەگى ماسەلەسىن شەشۋدى جانە بيلىككە جەتكىزۋدى ماقسات ەتكەن «كوش ولىكتى بولسىن!» دەگەن ارنايى تۇجىرىمداما جاساپ، مەڭگەرۋشىم جۇماجان جۇكەنوۆكە ۇسىندىم. جۇماجان قامكەنۇلى تۇجىرىمدامانى وتە جىلى قابىلداپ، پارتيانىڭ رەسپۋبليكالىق جىلدىق جەلىلىك كەستەسىنە ەنگىزىلۋگە ىقپال ەتتى. ءسويتىپ، وسى تۇجىرىمداما نەگىزىندە ماناعى مينيسترلىكتەر مەن ونىڭ دەپارتامەنتتەرىنىڭ جاۋاپتى باسشىلارىن، مەملەكەتتىك ەمەس ۇيىمداردىڭ جەتەكشىلەرىن شاقىرىپ، Nur Otan پارتياسىنىڭ ايماقتىق، اۋماقتىق فيليالدارىندا ءتورت مارتە اكتسيا وتكىزدىك. وعان ورتالىقتان باستاپ، وڭىرلەردەگى ءوتىنىشى بار قانداستارىمىز تۇگەل قاتىسىپ وتىردى.

سونىڭ ارقاسىندا، جەكەلەگەن تۇلعالاردىڭ ماسەلەسى شەشىلىپ قانا قويماي، قازاق كوشىنىڭ ەڭ وزەكتى ماسەلەلەرىنە اتقارۋشى بيلىك پەن زاڭ شىعارۋشى ورگاننىڭ كوزى ابدەن جەتتى. ءسويتىپ «حالىقتىڭ كوشى-قونى تۋرالى» زاڭىنا ايتارلىقتاي وزگەرتۋلەر مەن تولىقتىرۋلار ەنگىزىلدى. ەنىپ تە جاتىر...

زاڭعا وزگەرىس ەنگىزە الۋ – مەملەكەتكە ىقپال ەتۋ دەگەن ءسوز. مىنە، Nur Otan پارتياسى سوعان مۇرىندىق بولدى.

جۇرت بيلىك پەن بيلىك پارتياسىن ۇنەمى سىناپ جاتادى. بيلىك جانە پارتيا دەگەنىڭىز جالپىلاما اتاۋ. ماسەلە وندا ەمەس، وندا وتىرعان جەكەلەگەن جاۋاپتى تۇلعالاردا.

داۋ جوق، Nur Otan پارتياسى – وتانىنا، ۇلتىنا قىزمەت ەتەم دەگەن ءاربىر سانالى ازامات ءۇشىن تەڭدەسى از مۇمكىندىك الاڭى. مەن پارتيانىڭ بار قۇزىرەتىن شامام كەلگەنشە پايدالانىپ، ءوزىم كىرىسكەن سالانىڭ زاڭى مەن ساياساتىن دۇرىستاۋعا مول مۇمكىندىك الدىم.

جۇرت جاقسى بىلەدى، كۇن قۇرعاتپاي ماقالا، اشىق حاتتار جازىپ، باق-تا جاريالاپ وتىرام. ماقسات – كوشى-قون ساياساتىن كۇنتارتىپتەن تۇسىرمەۋ، تۋىنداعان پروبلەمالاردى ءوز ۋاعىندا ايتۋ، بيلىككە جەتكىزۋ جانە وڭتايلى شەشۋ.

جاسىراتىنى جوق، كەيدە اششى ايتۋعا، بيلىك باسىنداعى جەكەلەگەن تۇلعالاردى قاتتى سىناۋعا تۋرا كەلەدى. سىنادىق، سىناپ تا جاتىرمىز. سونىڭ كەسىرىنەن جۇمىسسىز قالعان كەزدەرىمىز دە از بولعان جوق...

قاتتى ريزا بولاتىنىم، توراعانىڭ بۇرىنعى ورىنباسارى بولعان مۇحتار قۇل-مۇحامەد پەن ماۋلەن اشىمباەۆ تا، بۇگىنگى باسشىم باۋىرجان بايبەك تە ءبىر رەت قاباق شىتىپ كورگەن ەمەس، قايتا بارىنە تۇسىنىكستىكپەن قاراپ، ىشتەي قولداپ كەلەدى. كەزىندە مۇحتار ابىرارۇلى مەن ماۋلەن ساعاتحانۇلىنىڭ كابينەتىنە شاقىرىپ، جەكە سويلەسكەن كەزدەرى بولدى. بىراق، شەكتەۋ قويعان جوق. اقىل-كەڭەسىن ايتىپ، ارقادان قاعىپ شىعارىپ سالىپ وتىردى. بۇرىنعى مەڭگەرۋشىلەرىم جۇماجان جۇكەنوۆ پەن باقىت تەمىروۆا دا،  قازىرگى ساقتاعان سادۋاقاسوۆ تا، ولاردىڭ ورىنباسارى بولعان ارىستانعالي سانسىزباەۆ تا سولاي!

بۇل – Nur Otan پارتياسىنداعى جاۋاپتى تۇلعالاردىڭ قازاق كوشىنە، قانداستارىمىزدىڭ وتانىنا ورالۋىنا دەگەن زور قولداۋى مەن قامقورلىعى، ەلىمىزدەگى ءسوز ەركىندىگىنە بولعان بيىك قۇرمەتى، ساياسي مادەنيەتىنىڭ جوعارىلىعى دەپ بىلەمىن!

ەندى اۋەلگى سوزىمىزگە ورالساق، «سىزدەردىڭ ارقايسىسىڭىز جوعارى كاسىبي بىلىكتىلىكتەرىڭىزدى كورسەتىپ، مەملەكەت يگىلىگى ءۇشىن ادال قىزمەت ەتۋگە نيەتتى ەكەندەرىڭىزدى دالەلدەدىڭىزدەر. سوندىقتان سىزدەرمەن كەزدەسىپ، ەلىمىزدەگى وزەكتى ماسەلەلەر بويىنشا پىكىرلەرىڭىزدى تىڭداپ، كادر رەزەرۆىنە ەنگەن ازاماتتاردىڭ الدىندا تۇرعان مىندەتتەر جونىندە ءوز ويىمدى ءبىلدىرۋ ءۇشىن بارشاڭىزدى «اقورداعا» ارنايى شاقىرىپ وتىرمىن»، – دەپ باستاپتى ءسوزىن پرەزيدەنت.

اقوردا – قاسيەتتى قارا شاڭىراق!

وندا ۇلتتىڭ، مەملەكەتتىڭ تاعدىرىنا تىكەلەي قاتىستى ۇلى شەشىمدەر قابىلدانادى. ادىلەتتىلىك پەن تازالىق وسى ۇيدەن باستاۋ الادى. ادالدىق مەن جارقىن ۇلگىنىڭ دە نۇر شاشىپ الاۋلاپ تۇراتىن جەرى – وسى اقوردا. تازالىق پەن تاتۋلىق تا ءبىرىنشى بولىپ، وسىندا سالتانات قۇرادى. قىسقاسى، اقوردانىڭ سىرتى قانداي اق بولسا، ءىشى دە ءاۋ باستان سونداي كىرشىكسىز، كىرپياز. سول ءۇشىن، وندا كىلەڭ ارى تازا، جۇرەگى اق، ءبىلىمى مەن بىلىگى جوعارى، ماقساتى بيىك، ەڭ باستىسى شەتىنەن مەملەكەتشىل تۇلعالار وتىرۋى شارت.

«حالىق ۇنىنە قۇلاق اساتىن مەملەكەت» تۇجىرىمداماسى جولعا قويىلعان  بۇگىنگى تاڭدا، پرەزيدەنت قاسىم-جومارت كەمەلۇلىنىڭ   جاس كادرلاردى اقورداعا شاقىرىپ، ۇلكەن كەزدەسۋ وتكىزۋىنىڭ وزگەشە ءمانى دە وسىندا بولسا كەرەك.

قاسىم-جومارت كەمەلۇلىنىڭ اتالعان كەزدەسۋدەگى سوزىندە «حالىققا جاقىن بولۋ كەرەك»، «شەنەۋنىكتەر قولجەتىمدى بولۋى قاجەت»، «تۋعان ەلىڭدى شەكسىز قادىرلەۋ جانە وعان ادال قىزمەت ەتۋ» دەگەن سوزدەرگە بارىنشا سالماق ءتۇسىرىپ ايتقانى كورىنىپ تۇر. اسىرەسە، مەملەكەت باسشىسىنىڭ «ءبىز ەلدىك مۇددەگە قاتىستى ءاربىر ىسىمىزدە ۇلى اقىننىڭ ەڭبەكتەرىنە جۇگىنۋىمىز كەرەك» دەپ  جاستارعا اباي الەمىنە قاراي جول سىلتەۋى، الاش ارداقتىسى ءاليحان بوكەيحاننىڭ «ۇلتقا قىزمەت ەتۋ بىلىمنەن ەمەس، مىنەزدەن» دەگەن ءسوزىن تىلگە تيەك ەتۋى تىپتەن تەگىن ەمەس.

ابايدى وقۋ، جاتتاۋ جانە ءبىلۋ ءوز الدىنا، «كەيىپكەرىنىڭ» كەبىن كيىپ قالۋدان ساقتانۋ – باستى ماقسات بولعانى ءجون. قۇداي «ارسىز بولماي اتاق جوق، الدامشى بولماي باق قايدا؟!» دەيتىندەردەن ساقتاسىن. ەسەسىنە، «پاڭسىماي، جايداقسىماي، ءىرى جۇرمەك» كەرەك!

قىرعىز حالقى بۇگىننىڭ وزىندە «ۇلتتىق ليدەر» دەپ باعالاعان ومىربەك تەكەباەۆتىڭ ءۇش جىلدىڭ الدىندا «قىرعىزستاندا مەندەي تازا شەنەۋنىك جوق. شەنەۋنىك بولساڭ وسىنداي بول دەپ، المازبەك اتامباەۆ پەن يليم قارىپبەكوۆ مەنى بۇكىل ەلگە ۇلگى عىپ كوسەتۋى كەرەك!» دەگەنى بار.

مۇنداي ءسوزدى جوعارى بيلىكتە جۇرگەن ەكى باسشىنىڭ ءبىرى ايتا المايدى.

دەمەك، الەكەڭنىڭ ايتىپ وتىرعانى – اتتان مەن ايعاي ەمەس، وسىنداي ارى مەن قولى تازا تۇلعانىڭ مىنەزى! بۇل جەردە تامنان اتتاساڭ دا، زاڭنان اتتاماۋىڭ كەرەك!

جالپى، ايتۋ مەن سىناۋ ونشا قيىن شارۋا بولماسا كەرەك. ەڭ ماڭىزدىسى، ءوزىڭ قولعا العان شارۋانى وڭ باعىتقا ەركىن بۇرا الاتىن تۇلعالىق  كاررەرا قالىپتاستىرا ءبىلۋ.

باسشى بولۋ – بيلىك باسپالداعىنا اياق باسقان اركىمنىڭ قولىنان كەلۋى مۇمكىن. ال تۇلعالىق كەز كەلگەن ادامنىڭ ماڭدايىنا بۇيىرا بەرمەيدى. مەملەكەتتىك بيلىكتە تۇلعالار كوپ بولعاندا عانا ءىس وڭعا باسادى.

قورىتا كەلگەندە، پرەزيدەنت قاسىم-جومارت كەمەلۇلى «جانام دەگەن جۇرەككە» وت بەردى!

ەندى، جانۋ مەن جاندىرا ءبىلۋ – جاس كادرلاردىڭ ءوز قولىندا.

مەملەكەت باسشىسىنىڭ سوزىمەن قورىتىندىلاساق، ءححى عاسىرداعى قازاقستاندى بيىك بەلەستەرگە بىلىمى وزىق، ويى ۇشقىر وسى جاستار باستاۋى كەرەك.

 

اۋىت مۇقيبەك،

پرەزيدەنت جانىنداعى

ۇلتتىق قوعامدىق سەنىم كەڭەسىنىڭ مۇشەسى

نۇر-سۇلتان قالاسى

سوڭعى جاڭالىقتار