22 قاڭتار, 12:27 389 0 جاڭالىقتار اسىل تۇمار

ەلىمىزدىڭ «اقىلدى» قالالارى انىقتالدى

سۋرەت عالامتوردان الىندى
سۋرەت عالامتوردان الىندى

قازاقستاندا «اقىلدى» وڭىرلەردىڭ رەيتينگى جاسالدى. بۇل تۋرالى ەلىمىزدىڭ تسيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى حابارلادى.

زەرتتەۋگە 14 وبلىس ورتالىعى مەن رەسپۋبليكالىق ماڭىزى بار 3 قالا قاتىستى. باعالاۋ 11 ءتۇرلى باعىت پەن 80 كورسەتكىشتەن تۇراتىن «اقىلدى قالالار» ەتالوندىق ستاندارتى نەگىزىندە جۇرگىزىلدى: دەنساۋلىق ساقتاۋ، ءبىلىم بەرۋ، تۇرعىن ءۇي-كوممۋنالدىق شارۋاشىلىعى، كولىك، ەكولوگيا، الەۋمەتتىك جانە ت.ب. سالالاردى تسيفرلاندىرۋ باستامالارى.

بۇل ءتىزىمنىڭ ءبىرىنشى ورىنى نۇر-سۇلتان قالاسىنا بۇيىرسا، ەكىنشى ورىندى الماتى، ال ءۇشىنشىنى ورال قالاسى يەلەندى.

قر تسيفرلىق دامۋ، يننوۆاتسيالار جانە اەروعارىش ونەركاسىبى ۆيتسە-ءمينيسترى ابىلايحان وسپانوۆتىڭ ايتۋىنشا، بۇل كورسەتكىش وڭىرلەردە «تسيفرلىق» بەلسەندىلىكتى ارتتىرۋعا ىنتالاندىرۋ ءۇشىن قاجەت. اتاپ ايتقاندا، رەيتينگتى قۇرۋ كەزىندە اكىمدىكتەردىڭ مەملەكەتتىك قىزمەتتەردى اۆتوماتتاندىرۋى، تۇرعىن ۇيلەرگە «اقىلدى» ەسەپتەۋىش قۇرالدارىنىڭ ورناتىلۋى، تىركەلگەن ستارتاپتاردىڭ سانى، زياتكەرلىك كولىك جۇيەسىنىڭ ەنگىزىلۋى، قوعامدىق كولىكتىڭ باعىت-باعدارىن مونيتورينگتەۋ جانە ت.ب. قوسىمشالاردىڭ قولجەتىمدىلىگى نازارعا الىندى.

«تسيفرلىق قازاقستان» مەملەكەتتىك باعدارلاماسى ەكى جىل بۇرىن قابىلدانىپ، وڭىرلەردە بىرقاتار جوبا جۇزەگە اسىرىلدى. ارينە، ولاردىڭ كەيبىرى ءتيىمدى دەسەك، كەيبىرىنىڭ ناتيجەسى تومەن بولدى. تسيفرلاندىرۋ سالاسىنداعى جالپى جاعدايدى كورسەتۋ ءۇشىن وسى رەيتينگتى ازىرلەدىك. بۇل سونداي-اق وڭىرلەردىڭ «تسيفرلىق» دامۋىن ىنتالاندىرۋ ءۇشىن قاجەت»، – دەيدى ا.وسپانوۆ.

بۇل كورسەتكىش جىل سايىن جاڭارىپ تۇرادى. 2019 جىلعى رەيتينگ ناتيجەسىن https://egov.kz/cms/ru/smart-cities سىلتەمەسىنەن كورۋگە بولادى.

سوڭعى جاڭالىقتار