22 قاڭتار, 10:41 717 0 جاڭالىقتار اسىل تۇمار

ءبىزدىڭ تۇلەكتەر شەتەلدىك جۇمىسشىلاردى الماستىرا المايدى

سۋرەت عالامتوردان الىندى
سۋرەت عالامتوردان الىندى

باتىس قازاقستان وبلىسىندا ارنايى قۇرىلعان كوميسسيا شەتەلدىك جۇمىس كۇشىن تارتىپ كەلگەن 95 كومپانيانىڭ قىزمەتىن تەكسەرىپ، مىڭعا تارتا زاڭبۇزۋشىلىقتى انىقتاعان. بۇل تۋرالى 24.kz حابارلادى.

سوندىقتان پرەزيدەنت قاسىم-جومارت توقاەۆ شەتەلدىك جۇمىسشىلارعا بەرىلەتىن كۆوتانى ەداۋىر قىسقارتۋ تۋرالى تاپسىرما بەرگەن ەدى.

بۇل ورايدا وبلىستىق جقۇاب باسقارماسى باسشىسىنىڭ ورىنباسارى سامات حانگەرەەۆ: «بيىلعى ەڭبەك مينيسترلىگىنىڭ بۇيرىعىنا سايكەس وبلىس بويىنشا 1440 بىرلىك كۆوتا بەلگىلەندى. بىلتىرعىمەن سالىستىرعاندا، 2 ەسەگە قىسقاردى»، – دەدى.

ورالداعى جوعارى مۇناي-گاز كوللەدجى دانەكەرلەۋشى، قۇبىر جانە ەلەكتر مونتاجداۋشى سەكىلدى ءتورتىنشى ساناتقا قاجەت بولاتىن ماماندار دايارلايدى. كوللەدج ديرەكتورى سەرىك مۇحامبەتاليەۆ: «تاپ بۇگىن بىتىرگەن تۇلەك شەتەلدىكتەردى الماستىرىپ، ناقتى جۇمىس ىستەيدى دەگەن ۇلكەن سەنىم جوق. ءبىز ءالى وعان دايىندالۋىمىز كەرەك. ول ءۇشىن بىرىنشىدەن، مۇعالىمدەردى تالىمگەرلىكتەن الىس-جاقىن شەتەلدەردەگى ءوندىرىستىڭ وزىندە 6 اي، 1 جىلعا جىبەرىپ مۇعالىمدەردى تالىمدەمەدەن وتكىزۋىمىز كەرەك. ەكىنشىدەن، ماتەريالدىق-تەحنيكالىق بازامىزدى سول وندىرىسكە جاقىنداتۋىمىز كەرەك»، – دەيدى.

شەتەلدەن كەلەتىن جۇمىسشىلار، نەگىزىنەن، اسا دالدىكتى تالاپ ەتەتىن جوعارى تەحنولوگيالىق جوبالاردا جۇمىس ىستەيدى. ساراپشىلاردىڭ ايتۋىنشا، ماسەلەن، قۇبىرلاردى بايلانىستىرۋشى، ناقتى ستاندارتتارعا ساي دانەكەرلەۋشى ماماندار دەگەندەي. ەندىگى مىندەت – قازاقستاندىق كادرلاردى سول ورىندارعا تارتۋ.

مۇنى ايماق باسشىلارى دا ايتىپ وتىر. «ول ءۇشىن حالىقارالىق دەڭگەيدەگى وقۋ ورىندارىن اشۋ، بىلىكتى وقىتۋشىلار قۇرامىن جاساقتاۋ باستى مىندەت»، – دەيدى.

سوڭعى جاڭالىقتار