21 قاڭتار, 20:13 330 0 جاڭالىقتار اسىل تۇمار

شەتەلدىك نومىرمەن جۇرگەن كولىك يەلەرى Nur Otan پارتياسىنان كومەك سۇرادى

سۋرەت دەرەككوزدەن الىندى
سۋرەت دەرەككوزدەن الىندى

شەتەلدىك نومىرمەن جۇرگەن اۆتوكولىك يەلەرى Nur Otan پارتياسىنا بايلانىسقا شىقتى.

Nur Otan پارتياسىنىڭ الماتى قالاسىنداعى فيليالىنا ارمەنيا مەن قىرعىزستاننىڭ نومىرىمەن جۇرگەن اۆتوكولىك يەلەرى كەلدى. جۇرگىزۋشىلەر شەتەلدىك ءنومىرى بار اۆتوكولىكتەردى تىركەۋدىڭ جاڭا ەرەجەلەرىنە نارازىلىق ءبىلدىردى، – دەپ جازدى ازاتتىق رۋحى.

كولىك يەلەرىنىڭ شاعىمىنان كەيىن Nur Otan بارلىق مۇددەلى تاراپتاردى دوڭگەلەك ۇستەلگە جينادى. پىكىرتالاسقا پوليتسيا، مەملەكەتتىك كىرىستەر دەپارتامەنتتەرى، پروكۋراتۋرا جانە اكىمدىك وكىلدەرى قاتىستى.

پارتيا قابىلداۋىنا كەلگەن جۇرگىزۋشىلەردىڭ ايتۋىنشا، اۆتوكولىكتەردى تىركەۋگە قاجەتتى سوما بىرنەشە ميلليون تەڭگەگە جەتەدى جانە ءتىپتى ءاۆتوموبيلدىڭ وزىندىك قۇنىنان دا اسىپ كەتەدى.

«نەگە ءبىز تىركەۋسىز جۇرە المايمىز؟ ارمەنياعا، قىرعىزستانعا باردىق، سوڭعى اقشامىزعا كولىك ايداپ كەلدىك. ەاەو-نىڭ كەدەن كودەكسى نەلىكتەن ەسكەرىلمەيدى؟ ۋتيليزاتسيانىڭ جالپى جيىنتىعى ميلليون تەڭگەگە دەيىن جەتەدى. تىركەۋگە قويۋعا ميلليون تەڭگەدەن دە كوپ قارجى كەرەك. ەرا-گلوناسس پەن SOS باتىرمالارىن قوسۋ – 300 مىڭ تەڭگە. كولىكتىڭ جالپى وفورملەنيە جاساۋعا 3 ميلليون تەڭگەدەن اسا اقشا كەتەدى. بۇل كولىكتىڭ جالپى قۇنىنان اسىپ كەتەدى»، – دەپ نارازىلىق ءبىلدىردى اۆتوكولىك يەلەرى.

اتاپ ايتقاندا، اۆتوكولىك يەلەرى تىركەۋ جارنالارىن تومەندەتۋدى، اۆتوكولىكتىڭ تەحنيكالىق توزۋىنا دەيىن پايدالانۋعا مۇمكىندىك بەرۋدى سۇرادى.

«ءبىز ازاماتتاردى تىڭدادىق، ويتكەنى تۇرعىندار كوتەرەتىن ءار ماسەلە ءبىز ءۇشىن ماڭىزدى. اۆتوكولىك يەلەرى تاراپىنان 10-عا جۋىق ۇسىنىس-تىلەك ايتىلدى، ولاردىڭ بارلىعىن جازىپ الدىق. ازاماتتار پارتياعا سەنىم ءبىلدىرىپ، كەزەك كۇتتىرمەيتىن ماسەلەلەرمەن كەلگەنىنە ريزامىز»، – دەدى «ازاتتىق رۋحى» اگەنتتىگىنە بەرگەن سۇحباتىندا Nur Otan پارتياسى الماتى قالالىق فيليالى توراعاسىنىڭ ءبىرىنشى ورىنباسارى ستانيسلاۆ كانكۋروۆ.

پارتيا مۇددەلى تاراپتارعا ساراپشىلاردى تارتا وتىرىپ، وسى ماسەلەنى تالقىلاۋ مۇمكىندىگىن بەرۋگە دايىن ەكەنىن سەندىردى.

ايتا كەتەيىك، بۇعان دەيىن ىشكى ىستەر مينيسترلىگى قازاقستاندىقتاردى شەتەلدىك تىركەلگەن كولىك قۇرالدارىن تىركەۋگە شاقىرعان بولاتىن. ەگەر تىركەمەسە، مۇنداي كولىكتەردىڭ يەلەرىنە ايىپپۇل سالىنادى، ال كولىكتەر وزدەرى تۇراققا ورنالاستىرىلادى.

زاڭعا سايكەس، قازاقستاننان تىس جەرلەردە ساتىپ الىنعان كولىك قۇرالدارى 10 كۇن ىشىندە تىركەلۋى كەرەك. مەنشىك يەسى الىمدار مەن باجداردى تولەۋگە جاۋاپتى. ۆەدومستۆو بۇل شارانى ەاەو تالاپتارىنا سايكەس تۇسىندىرەدى.

ءىىم-ءنىڭ مالىمەتىنشە، ەلگە ارمەنيا، قىرعىزستان، بەلارۋس جانە رەسەيدە تىركەلگەن 170 مىڭ كولىك اكەلىنگەن.

سوڭعى جاڭالىقتار