21 قاڭتار 2020, 14:30 734 0 جاڭالىقتار اسىل تۇمار

Bek Air-ءدىڭ بۇزىلعان ۇشاقتارعا جاڭا سايمان سالۋعا قارجىسى بولماعان – ازاماتتىق اۆياتسيا كوميتەتى

سۋرەت عالامتوردان الىندى
سۋرەت عالامتوردان الىندى

وتاندىق اۋە تاسىمالداۋشى سانى بىرەۋگە ازايدى. قازاقستاننىڭ اۆياتسيالىق اكىمشىلىگى Bek Air-ءدىڭ ازاماتتىق اۋە كەمەلەرىن پايدالانۋشى سەرتيفيكاتىنىڭ جانە ۇشۋعا جارامدىلىق سەرتيفيكاتىنىڭ كۇشىن ۋاقىتشا توقتاتتى. سەبەبى ونىڭ جۇمىسىندا قاپتاعان جونسىزدىكتەر انىقتالدى. مىسالى، ول سىنعان ۇشاعىن ەسكى-قۇسقى ۇشاق بولشەكتەرىمەن جوندەپ كەلگەن. بۇل تۋرالى aikyn.kz جازدى.

اۆياتسيالىق باقىلاۋ ورگانى 2019 جىلعى 27 جەلتوقساندا الماتى ماڭىندا بولعان ۇشاق اپاتىنان كەيىن Bek Air-ءدىڭ بار دۇنيەسىن اۋدارىپ-ءتوڭ­كەرىپ، كەڭ اۋقىمدى تەكسەرۋگە كىرىستى.

«Bek Air اق-ىندا قاۋىپسىزدىككە قاتىستى سالماقتى ماسەلەلەردىڭ جيىلىگى اۋە تاسىمالداۋشىسى ءۇشىن رۇقسات ەتىل­گەن دەڭگەيدەن ايتارلىقتاي اسىپ كەتتى. وسى سەبەپتى سەرتيفيكاتتار ۋاقىت­شا توقتاتىلدى، اۋە كومپانيانى مۇقيات تەكسەرۋگە باستاماشى بولدىق. ونىڭ بارىسىندا بىرقاتار بۇزۋشىلىقتار انىقتالدى»، – دەپ حابارلادى ازاماتتىق اۆياتسيا كوميتەتى.

Bek Air ۇشاق سىنسا، اقاۋلى قوزعالت­قىشى مەن اگرەگاتى جاڭاسىمەن ەمەس، كونەرگەن باسقا ۇشاقتىڭ جابدىقتارىمەن الماستىرا سالىنادى ەكەن.

«Bek Air بۇل پروتسەستى ۇدايى پايدالا­ناتىنى ءمالىم بولدى. ياعني، ءبىر ۇشاقتىڭ قۇرامداس بولىگى تۇسىرىلەدى دە، باسقا ۇشاققا ورناتىلادى. بۇل ارەكەتتەر سۇراق تۋدىرادى. ويتكەنى مۇنداي جاعدايدا ۇشاق كومپونەنتتەرىنىڭ قولدانىلۋ مەرزىمى قالاي تىركەلىپ، ەسەپكە الىنادى؟ سونداي-اق بۇل Bek Air اق قارجىسىنىڭ جەتكىلىكسىزدىگى سالدارىنان زاپاس ءبول­شەكتەردى ساتىپ الۋعا قابىلەتسىز ەكەنىن كۋالاندىرادى. ونىڭ ۇستىنە فوككەر سەكىلدى ەسكى ۇشاقتاردىڭ زاپاس بولشەك­تەرىن تابۋ قيىن»، – دەپ قاتاڭ سىن ايتتى ۆەدومستۆو.

بەتى اشىلعان سوراقى ىستەردىڭ تاعى ءبىر پاراسىنا توقتالساق، اۋە كومپانيا ۇشاق قوزعالتقىشتارىنىڭ جۇقا تاقتاي­شالارىن الىپ تاستايتىن بولعان. ال ول تاقتايشادا قوزعالتقىشتىڭ سەريا­لىق ءنومىرى جازىلادى. ونسىز قۇزىر­لى ورگاندار ونىڭ قانشا ۋاقىتتان بەرى پايدالانىلعانىن جانە وتكىزگەن تسيكلدەرىن قاداعالاي المايدى. كەسىرى­نەن، Bek Air بىرنەشە ۇشاعىنىڭ قوزعالتقىشىن يدەنتيفيكاتسيالاۋ مۇمكىن بولماپتى.

Fokker-100 ءۇشىن قوزعالتقىش ءوندىر­گەن Rolls Royce وسى ۇشاقتار قازاقستان­دا پايدالانىلا باستاعالى ولاردىڭ كۇردەلى جوندەلمەگەنىن ءمالىم ەتتى. كومپانيا قوزعالتقىشتاردىڭ تەمىر تاقتايشالارىن الىپ تاستاۋعا تىيىم سالىناتىنىن، وعان رۇقسات بەرمەگەنىن راستادى.

باسقا بۇزۋشىلىقتارى دا باستان اسادى: جۇك بولىكتەرىن ورتتەن قورعاۋ قۇرىلعىلارى، قۇتقارۋ جيلەتتەرى، اپات­تىق راديوماياق جەتىسپەيدى.

اۋە كومپانياسىنىڭ ۇشاق پاركىنىڭ جاعدايى «قاناعاتتانعىسىز» دەپ تا­نىل­دى. مىسالى، بەينەجاز­با­لاردى زەرتتەۋ كەزىندە Bek Air ەكيپاجدارى ۇشاق­تى دايارلاۋ بارىسىندا شولۋ جاسامايتىنى، قاناتتارىن تەكسەر­مەيتىنى، جۋرنال تولتىرۋعا ءجۇردىم-باردىم قارايتىنى انىقتالدى. ەگەر Bek Air بارلىق جونسىزدىكتەرىن 6 اي ىشىندە جويماسا، سەرتيفيكات­تارىنان تۇپكىلىكتى ايىرىلادى.

ءوز كەزەگىندە اۋەتاسىمالداۋشى بۇعان دەيىن جوسپارلانعان بارلىق رەيستەرىن الىپ تاستادى. بۇدان بولەك، 18 قاڭتاردا IATA قاۋىمداستىعى Bek Air بەلگىلەۋ كودىن كەرى قايتارىپ الدى.

سوڭعى جاڭالىقتار