21 قاڭتار, 10:33 538 0 جاڭالىقتار اسىل تۇمار

ورىس كينوسىنىڭ «ۇيات تىزىمىنە» ەندىم – «ايكا» ءفيلمىنىڭ رەجيسسەرى اعىنان جارىلدى

سۋرەت عالامتوردان الىندى
سۋرەت عالامتوردان الىندى

«ايكا» ءفيلمىنىڭ رەجيسسەرى سەرگەي دۆورتسەۆوي Meduza پورتالىنا بەرگەن سۇحباتىندا ءوزىنىڭ حالىقارالىق ماراپاتتارعا يە بولعان «ايكا» ءفيلمىنىڭ مادەنيەت مينيسترلىگىنىڭ بورىشكەرلەر تىزىمىنە ەنۋ سەبەبىن تۇسىندىرگەن.

ءتىزىم 2019 جىلدىڭ كۇزىندە شىقتى. وعان سايكەس، سەرگەي دۆورتسەۆوي ءوندىرىس مەرزىمىن بۇزعانى ءۇشىن مادەنيەت مينيسترلىگىنە جەتى ميلليون رۋبلدەن (42 ميلليون تەڭگە) ارتىق تولەم جاساۋى كەرەك. «ايكانىڭ» جالپى بيۋدجەتى شامامەن ءجۇز ميلليون (ونىڭ ىشىندە مەملەكەتتىك قولداۋ 28 ميلليون) رۋبل.

رەجيسسەردىڭ ايتۋىنشا، ءتۇسىرىلىم ەكى جىلدىڭ ورنىنا التى جىلعا سوزىلعان، ويتكەنى كارتيناعا قارى قالىڭ قىس قاجەت بولعان. ال كارتينادا جاساندى قاردى قولدانۋ مۇمكىن بولماپتى.

«قازىر مەن شىنىمەن مادەنيەت مينيسترلىگى دايىنداعان سول ءبىر «ۇيات تىزىمىنە» كىردىم. ماعان جاقىندا چەحيادا وتكەن دەرەكتى فيلمدەر فەستيۆالىندە الەمدىك كينەماتوگرافياعا قوسقان ۇلەسى ءۇشىن دەگەن سىيلىق بەردى. مەن ولارعا: «قايداعى الەمدىك كينەماتوگرافيا؟ مەن ورىس كينوسىنىڭ «ۇيات تىزىمىنە» ەندىم، تۇسىنەسىزدەر مە؟» دەيمىن، ولار كۇلەدى. بىراق، بۇل شىندىق»، – دەدى دۆورتسەۆوي.

سونداي-اق، رەجيسسەر ايىپپۇلدى تولەي المايتىنىن اتاپ ءوتتى، ويتكەنى ول ءۇشىن 7 ميلليون تۇرماق 20 مىڭ ءرۋبلدىڭ ءوزى ۇلكەن سوما، اقشاسى تاماعىنا ازەر جەتىپ وتىر. مادەنيەت مينيسترلىگىنەن عانا ەمەس، شەتەلدىك ينۆەستورلاردان تۇسكەن قاراجاتتىڭ بارلىعى ءفيلمدى شىعارۋعا جانە تۇسىرىلىمگە قاتىسقانداردىڭ جالاقىسىنا جۇمسالعان.

«ەگەر اقشا تولەۋگە ماجبۇرلەسە، بۇل مەنى ساتسىزدىككە ۇشىراتارى انىق، سەبەبى ولار تالاپ ەتىپ وتىرعان اقشا مەندە تۋعالى بولماعان»، – دەپ اعىنان جارىلادى رەجيسسەر.

دۆورتسەۆوي بۇدان ءارى نە ىستەۋ كەرەكتىگىن بىلمەيتىنىن ايتتى.

سوڭعى جاڭالىقتار