19 قاڭتار, 18:09 746 0 جاھان انار لەپەسوۆا

ۇلىبريتانيا پاتشايىمى حانزادا گارري مەن مەگان ماركلگە قاتىستى جاڭا ءتارتىپتى بەكىتتى

كورولدىك وتباسىنداعى وكىلەتتەرىنەن باس تارتقان ۇلىبريتانيا حانزاداسى گارري مەن ونىڭ جۇبايى مەگان ماركل بۇدان بىلاي پاتشا اۋلەتىنە ءتان لاۋازىمدارىن پايدالانبايدى جانە مەملەكەت قازىناسىنان اقشا المايدى. بۇل تۋرالى بۋكينگەم سارايى مالىمدەدى.

جاڭا ءتارتىپ بيىل كوكتەمنەن باستاپ كۇشىنە ەنبەك. وسىلايشا پاتشايىم ەليزاۆەتا ەكىنشىنىڭ اۋلەتى قوس جۇپتىڭ ءوتىنىشىن قاناعاتتاندىردى. بىراق گارري مەن مەگان ماركل «ساسسەكس گەرتسوگى جانە گەرتسوگينياسى» دەگەن اتاقتارىن ساقتاپ قالادى.

ايتا كەتەيىك، حانزادا مەن ونىڭ ايەلى كورولدىك وتباسىنداعى وكىلەتتەرىنەن باس تارتاتىنى تۋرالى وتكەن اپتادا مالىمدەگەن. ولار بۇل باستامالارىن ەليزاۆەتا ەكىنشى پاتشايىمعا قولداۋ بىلدىرە وتىرىپ، ۇلىبريتانيا مەن كانادا اراسىندا دەربەس ءومىر سۇرۋگە نيەتتى ەكەندىكتەرىمەن تۇسىندىرگەن ەدى.

سوڭعى جاڭالىقتار