16 قاڭتار, 20:36 1928 0 زاڭ انار لەپەسوۆا

پويىز بيلەتىن الىپ ساتۋشىلارعا 1,3 ملن تەڭگەگە دەيىن ايىپپۇل سالىنادى

تەمىرجول بيلەتتەرىنىڭ الىپساتارلارىنا 500 ايلىق ەسەپتىك كورسەتكىشكە دەيىن ايىپپۇل سالىنادى. بۇل تۋرالى يندۋستريا جانە ينفراقۇرىلىمدىق دامۋ مينيسترلىگى كولىك كوميتەتى تەمىرجول كولىگىندەگى باقىلاۋ باسقارماسىنىڭ باسشىسى ەلدوس نەستاي مالىمدەدى.

ول ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتى بارىسىندا «قر كەيبىر زاڭنامالىق اكتىلەرىنە تەمىرجول كولىگى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭىن ءتۇسىندىرىپ بەردى، دەپ حابارلايدى قازاقپارات.

«قازىرگى تاڭدا تەمىر جولمەن جولاۋشىلار تاسىمالداۋ شىعىستارى مەملەكەتتىك بيۋدجەت تاراپىنان سۋبسيديالانادى. بۇل: ۆاگونداردى جالعا الۋ، كۇتىپ ۇستاۋ، ساتىپ الۋ، ۆوكزال شارۋاشىلىعى، لوكوماتيۆتىك تارتۋ جانە ماگيسترالدىق جەلى قىزمەتتەرى. شىعىستىڭ باسقا ءبىر بولىگىن «قازاقستان تەمىر جولى« جۇك تاسىمالى كىرىستەرى ەسەبىنەن كورسەتىلەتىن قىزمەتتەرگە تومەن تاريف بەلگىلەۋ ارقىلى جابادى. بۇل ىشكى كروسس سۋبسيديالاۋ دەپ اتالادى. اتالعان سىزبادا اقشا اعىمدارىنىڭ ءبىر ورتالىققا باعىنۋى جانە اشىقتىعى جوق ەدى. جۇيەنى اشىق ەتۋ ءۇشىن زاڭ جوباسىمەن جولاۋشىلار لوكوماتيۆتەرى اتتى جولاۋشىلار قوزعالىسىنداعى لوكوموتيۆتىك تارتۋدىڭ جەكە وپەراتورىن قۇرۋ نورمالارى انىقتالعان. بۇل زاڭدى تۇلعا لوكوماتيۆتىك تارتۋ قىزمەتتەرىن وتەۋگە ارنالعان سۋبسيديالاردىڭ تىكەلەي الۋشىسى بولادى. سونداي-اق بيۋدجەتتەن قوسىمشا قاراجاتتى قاراستىرماي كروسس سۋبسيديالاۋدان باس تارتۋ ءۇشىن جولاۋشىلار تاسىمالداۋشىلارىن قولداۋعا جۇك تاسىمالداۋشىنىڭ تەگەرىمدەۋشى، ياعني بالاستىق تولەم ەنگىزىلەدى. بۇل جولاۋشىلار تاسىمالىنىڭ ناقتى شىعىندارىن كورۋگە مۇمكىندىك بەرەدى»، - دەدى ول.

ە.نەستايدىڭ ايتۋىنشا، ناتيجەسىندە سۋبسيديالاردى اكىمشىلەۋ جاقسارادى. لوكوماتيۆتىك تارتۋ قىزمەتتەرىنە ارنالعان شىعىستاردى ەسەپكە الۋدىڭ اشىقتىعى ارتادى. وسىلايشا، جولاۋشىلاردى تاسىمالىن سۋبسيديالاۋ تەتىگى بىرىڭعاي ستاندارتقا كەلەدى.

«جۇك تاسىمالداۋ كەزىندە ىشكى، يمپورتتىق، ەكسپورتتىق جانە ترانزيتتىك تاريفتار بار. قازىرگى ۋاقىتتا «جاسىرىن» ترانزيت سىزباسى قازاقستان اۋماعىنا يمپورتتىق رەجيمدە جۇكتى اكەلىپ، ودان ارى ءۇشىنشى ەلگە ەكسپورتتىق رەجىيدە جۇكتى قايتا جىبەرۋ ارقىلى جۇزەگە اسىرىلىپ وتىر. اتالعان سىزبا جۇك جونەلتۋشىلەرگە ەكسپورتتىق-يمپورتتىق تاريف دەڭگەيىنەن 4 ەسە جوعارى بولىپ سانالاتىن ترانزيتتىك تولەمنەن جالتارۋعا مۇمكىندىك بەرەدى. «قازاقستان تەمىر جولى« جىل سايىن وسى ءتاسىلدىڭ سەبەبىنەن 16 ملرد تەڭگەگە جۋىق كىرىسىن جوعالتىپ وتىر. وسىعان وراي جۇك جولدارى بويىندا جۇكتى قايتا تيەۋ، اۋىستىرىپ تيەۋ جانە كولىك ءتۇرىن اۋىستىرۋدى قاراستىراتىن «جۇك ءترانزيتى» دەگەن تۇسىنىك ەنگىزىپ وتىرمىز. سونداي-اق، تاسىمالداۋشى جۇككە ارنالعان ىلەسپە قۇجاتتاردى قاراۋ قۇقىعىنا يە بولادى. جاڭا نورمالار جۇك جونەلتۋشىگە ترانزيتتىك تاريف تولەمىنەن قۇتىلۋعا جول بەرمەيدى»، - دەدى باسقارما باسشىسى.

مۇنان بولەك، ول تۇتىنۋشىلاردىڭ قۇقىقتارىن قورعاۋ ماقساتىندا كىرمە جولداردىڭ قىزمەتتەرىن ۇسىنۋ جانە باعاسىن بەلگىلەۋ ءتارتىبى جەتىلدىرىلەتىندىگىن ايتتى.

«سوڭعى ماسەلە، قازىرگى تاڭدا تەمىر جول بيلەتتەرىن ساتۋ، قايتا ساتۋ فاكتىلەرى بويىنشا ءتيىستى شارالار كۇشەيتىلەدى. ياعني، زاڭمەن جەكە جانە زاڭدى تۇلعالارعا جول ءجۇرۋ بيلەتتەرىن زاڭسىز ساتۋ جانە قايتا ساتقانى ءۇشىن 100-دەن 500 اەك-كە دەيىن اكىمشىلىك جاۋاپكەرشىلىك كوزدەلەدى»، - دەدى ە.نەستاي.

 

سوڭعى جاڭالىقتار