16 قاڭتار, 14:46 420 0 ايماق انار لەپەسوۆا

"كەشىرىم سۇراعاندارىڭىزدى قالايمىن": پاۆلودار وبلىسى اكىمىنىڭ ورىنباسارى جەلىدەگى قاۋەسەتكە قاتىستى مالىمدەمە جاسادى

پاۆلودار وبلىسى اكىمىنىڭ ورىنباسارى ارىستانبەك قابىكەنوۆ ءوڭىر باسشىسى ۇستالدى دەگەن قاۋەسەتكە پىكىر ءبىلدىرىپ، جۋرناليستەرگە رەسمي مالىمدەمە جاسادى. 

بۇل تۋرالى  Tengrinews.kz حابارلادى.

جەلىدە وبلىس اكىمى بولات باقاۋوۆتىڭ ۇستالعانى تۋرالى حابارلاما تارادى. سونداي-اق حابارلامادا قابىكەنوۆتىڭ دا ەسىمى اتالعان. شەنەۋنىكتىڭ سوزىنشە، ول بولعان جاعدايدان سوڭ قاتتى ەسەڭگىرەپ قالعان.

"شىنىن ايتۋ كەرەك، مەن قاتتى ەسەڭگىرەپ قالدىم. "باق تۋرالى" زاڭدى پايدالانىپ، سىزدەردىڭ اقپاراتتى تەرىسكە شىعارىپ، ادامشا كەشىرىم سۇراعاندارىڭىزدى قالايمىن. ايتپەسە، مەن تۋرالى دا جازىپتى. شىنىمدى ايتسام، مەن قاتتى ەسەڭگىرەپ وتىرمىن.

مىنە، مەنى كورىپ وتىرسىزدار، جۇمىس ىستەپ وتىرمىن. مۇندا بىردەڭە بولاتىنداي ەشتەڭە، ءتىپتى ويدا دا بولعان جوق. شىنىن ايتسام، اكەم حابارلاسىپ، نە بولىپ جاتقانىنا تاڭ قالدى. مەن وعان جۇمىستا وتىرعانىمدى ايتتىم", - دەدى ارىستانبەك قابىكەنوۆ.

سونداي-اق ءوڭىر اكىمىنىڭ ورىنباسارى ءوزى عانا ەمەس، بۇكىل اكىمدىكتىڭ شتاتتى رەجيمدە جۇمىس ىستەپ وتىرعانىن اتاپ ءوتتى. قابىكەنوۆتىڭ سوزىنشە، باقاۋوۆ تا جۇمىس ورنىندا.

شەنەۋنىكتىڭ ايتۋىنشا، ەگەر ءىستى جالا رەتىندە قاراستىراتىن بولسا، وندا ول ءوز ءيميدجىن قورعاۋ ءۇشىن زاڭگەردىڭ كومەگىنە جۇگىنۋگە دايىن.

ەسكە سالا كەتسەك، جەلىدە پاۆلودار وبلىسى اكىمى بولات باقاۋوۆتىڭ ۇستالعانى جايلى اقپارات تارادى. جەلىدەگى مالىمەتتەرگە سايكەس اكىممەن قوسا، ونىڭ كومەكشىسى دە ۇستالعان.

سوڭعى جاڭالىقتار