16 قاڭتار, 15:31 450 0 اتاجۇرت Túrkistan Gazeti

قازاق ەسىمدى انا قازاق ەلىنەن جاردەم سۇرايدى

يران ەلىنىڭ گورگان قالاسىنان اتاجۇرتقا قونىس اۋدارعان قان­داستاردىڭ ءبىرى – ءابدىراحمان بابىق پەن ونىڭ وتباسىنىڭ جاعدايى تۋرالى بۇعان دەيىن دە ءباسپاسوز بەتتەرىندە ايتىلعان. بۇل وتباسىنا بارىنشا قولۇشىن سوزىپ، ماسەلەسىمەن اينالىسىپ جۇرگەن الماتىلىق قۇقىق قورعاۋشى مارجان اسپاندياروۆانىڭ ايتۋىنا قاراعاندا، ءابدىراحمان بابىق وتباسىنا الەۋمەتتىك كومەك قاجەت ەكەن.

«بۇل وتباسى يراندا جاقسى تۇرعان ەدى. بولاشاق ۇرپاق ءوز ەلىندە ءوسسىن دەپ ماڭعىستاۋعا كوشىپ كەلدى. بىراق ەلگە كەلگەلى باستارىنان ءبىراز قيىندىقتار ءوتتى. باسپانا جانە جەر ماسەلەسى شەشىلگەن جوق. وتاعاسى ءابدىراحمان بابىقتىڭ كوزىنە وپەراتسيا جاسالعان. ەكى كوزى دۇرىس كورمەيدى. تاعى دا جاساتۋ قاجەت. وعان قاراجات جوق. جەرگىلىكتى كلينيكا ەكىنشى توپتاعى مۇگەدەك ەكەنىن انىق­تايىن قۇجاتتى دا بەرمەي جاتىر. كىشكەنتاي قىزى بار، ونىڭ دا دەنساۋلىعى جاقسى ەمەس. قازاق ءنوسراتبيبى – وسى ءۇيدىڭ اناسى. شىرىلداپ قاقپاعان ەسىگى جوق. سوندىقتان جان-جاقتان ەل بولىپ، قوعام بولىپ كومەكتەسىپ جىبەرسەك جاقسى بولار ەدى»، – دەيدى مارجان اسپاندياروۆا.

قازاق ءنوسراتبيبى: «كەلگەنىمىزگە 10 شاقتى جىلدان استى، ءۇيىمىز جوق. قازىر تۇرىپ جاتقان «الەۋ­مەتتىك جاتاقحانادان» شىعىڭدار دەپ جاتىر»، –  دەيدى.

اقتاۋ قالاسىنداعى 2010 جىلى سالىنعان «ورالمانداردى بەيىمدەۋ جانە ىقپال­داستىرۋ ورتالىعى» 2016 جىلدىڭ جەلتوق­سانىنان باستاپ اتى وزگەرىپ، «الەۋمەتتىك جاتاقحانا» كوممۋنالدىق مەملەكەتتىك مەكەمەسىنە اينالىپتى. بىراق قازاق­ستاننىڭ كوشى-قون تۋرالى زاڭىندا ورالمانداردى بەيىمدەۋ جانە ۋاقىت­شا ورنالاستىرۋ ورتالىقتارى قىزمە­تىن ايماقتارداعى جەرگىلىكتى بيلىك ۇيىم­داستىراتىنى جازىلعان. وندا ورال­مانداردىڭ «تۇرعىن ءۇيى بولماعان كەزدە بەيىمدەۋ نە ۋاقىتشا ورنالاستىرۋ ورتالىق­تارىندا ءبىر جىلدان اسپايتىن مەرزىمگە تىركەلۋگە قۇقىعى بار» ەكەنى كورسەتىلگەن.

باقىتبەك قادىر

سوڭعى جاڭالىقتار