16 قاڭتار, 11:57 1654 0 ونەر انار لەپەسوۆا

ارىپتەستەرى مەيرامبەك بەسباەۆتى جاۋاپتى قىزمەتكە سايلادى

قازاقتىڭ بەلگىلى ءانشىسى، "مۇزارت" توبىنىڭ مۇشەسى مەيرامبەك بەسباەۆ قازاقستان ورىنداۋشىلار وداعىنىڭ باسقارما توراعاسى بولىپ سايلاندى. بۇل تۋرالى ءانشى ءوزىنىڭ Instagram جەلىسىندەگى پاراقشاسىندا ءبولىستى.

"بۇگىن ونەردە جۇرگەن بارشا ارىپتەستەرىم ۇسىنىس جاساپ، ءبىراۋىزدان داۋىستارىن بەرىپ، مەنى قازاقستان ورىنداۋشىلار وداعى (كوۋپيس) باسقارما توراعاسى ەتىپ سايلادى.

ءبىراز جۇرت بىلەدى، قازىرگى تاڭدا بۇل قوعامدىق ۇيىمنىڭ قارجىلىق جاعدايى ناشار، ءبىراز قۇرىلىمداردىڭ الدىندا قارىزى بار، انشىلەر مەن ءان وندەۋشىلەردىڭ الدىندا بەدەلى دە تومەندەپ كەتكەن.

بىرلەستىك تاريحىنداعى وسىنداي اۋىر كەزەڭىندە ارىپتەس-دوستارىم مەنى باسشى قىپ سايلاپ وتىرعانى - ماعان سەنگەنىنەن دەپ قابىداپ وتىرمىن.

ارينە، مۇنداي ۇيىمعا جەتەكشىلىك ەتۋ ماعان ۇلكەن جاۋاپكەرشىلىك ارتاتىنىن مەن جان-دۇنيەممەن جاقسى سەزىنىپ ءارى ءتۇسىنىپ وتىرمىن.

مەن ەشقاشان باسشىلىق قىزمەتكە ۇمتىلعان ادام ەمەسپىن. مۇنى ءبىر ساحنادا جۇرگەن ارىپتەستەرىم مەن قادىرلى تىڭدارماندارىم دا جاقسى بىلەدى.

مەنىڭ ماقساتىم - ۇيىمنىڭ جۇمىسىن جاقسارتۋ ارقىلى قازاقتىڭ ءتول ونەرىن دامىتۋ، ونەردە جۇرگەن انشىلەردىڭ قۇقىقتارىن قورعاپ، ءتيىستى شارۋالارىن شەشۋ بوپ وتىر.

ماعان سەنىم بىلدىرگەن ارىپتەستەرىمە مىڭ العىس ايتا وتىرىپ، بولاشاقتىڭ الدىندا ءجۇزىمىز جارىق بولۋ ءۇشىن، بىرلەسە جۇمىس جاساۋعا شاقىرامىن!

بىرلىك بار جەردە، الىنبايتىن اسۋ جوق، شەشىلمەيتىن ماسەلە جوق. سول سەبەپتەن، قازاق ونەرىنىڭ دامۋى ءۇشىن تىزە قوسىپ، بىرلەسە قىزمەت ەتەيىك دەمەكپىن", - دەيدى ول ءوز جازباسىندا.

تانىمال ءانشىنىڭ بىرقاتار ارىپتەسى عانا ەمەس، تىڭدارمان قاۋىم دا بىردەن قولداۋ ءبىلدىردى.

ولار مەيرامبەكتىڭ مۇنداي جاۋاپتى جۇمىسقا لايىقتى ەكەنىن العا تارتىپ، الداعى جۇمىستارىنا ساتتىلىك تەلەدى.

سوڭعى جاڭالىقتار