16 قاڭتار, 08:38 641 0 قوعام انار لەپەسوۆا

مەملەكەتتىك باسقارۋدىڭ جاڭا مودەلى

ەلدىڭ كەلەشەگى بۇگىنگى جاستاردىڭ بەت الار باعىتى مەن تۋ ەتەر ۇستانىمىنا تاۋەلدى. سوندىقتان مەملەكەت جاس بۋىننىڭ كەمەل ءبىلىم الىپ، تولىمدى تاجىريبە جيناۋىنا ۇنە­مى قولداۋ كورسەتىپ كەلەدى. بولاشاعىنان ۇلكەن ءۇمىت كۇتتىرەتىن ازا­ماتتاردىڭ ىستە شىڭدالىپ، كۇش-جىگەرى مەن وزىق يدەيالارىن قو­عام يگىلىگىنە جۇمىلدىرۋىنا باعىت-باعدار بەرۋدىڭ ماڭىزى زور. ەلىمىزدە پرەزيدەنتتىك جاستار كادر رەزەرۆىن قۇرۋداعى ماق­سات تا وسى. الداعى ۋاقىتتا ەل باسقارۋ ىسىنە ارالاساتىن تاڭ­داۋ­لى 300 جاسپەن كەزدەس­كەن مەملەكەت باسشىسى قاسىم-جومارت توقاەۆ ولارعا ارتىلعان جاۋاپكەرشىلىك جۇگى جەڭىل بولمايتىنىن ۇقتىردى.

وتكەن جىلى ۇلىقتاۋ راسىمىندە مەملەكەت باسشىسى قاسىم-جومارت توقاەۆ پرەزيدەنتتىك كادر رەزەرۆى قۇرى­لاتىنىن مالىمدەگەن ەدى. سول جىل­دىڭ تامىز ايىنىڭ سوڭىندا ق.توقاەۆتىڭ جارلىعىمەن قازاقستان پرەزيدەنتىنىڭ جانىنداعى جاستار كادر رەزەرۆى جونىندەگى ۇلتتىق كوميسسيا قۇرىلدى. قىركۇيەك ايىندا پرەزيدەنتتىڭ جاستار كادر رەزەرۆىنە ءوتىنىم قابىلداۋ باستالدى. رەزەرۆ قۇرامىنا ەنۋگە وتىز بەس جاستان اس­پا­عان، جوعارى ءبىلىمى جانە بەس جىلدان كەم ەمەس ەڭبەك ءوتىلى بار 13 مىڭ­عا جۋىق قازاقستان ازاماتى ءوتى­نىش ءبىلدىردى. ۇلتتىق كوميسسيا كەل­گەن وتىنىمدەردى ىرىكتەپ، بارلىق تا­لاپ­تارعا ساي كەلەتىن 300 جاستى انىق­تادى.

قاسىم-جومارت توقاەۆ ەل باسقارۋ ءىسى­نە ارالاساتىن تاڭداۋلى جاستار­دىڭ قاتارىنا قوسىلۋ زور مارتەبە ەكەنىن باسا ايتتى.

– وزدەرىڭىز سياقتى وزىق ويلى، ءبا­سەكەگە قابىلەتتى ماماندار ەلىمىزگە وتە قاجەت. جالپى، بۇل – جاس بۋىن وكىل­دەرىنىڭ جاۋاپتى قىزمەتكە كەلۋى ءۇشىن جاسالىپ وتىرعان يگى باستاما. وسى رەتتە وزدەرىڭىز سياقتى ءبىلىمدى ءارى تالاپتى ازاماتتارعا ۇلكەن ءۇمىت ار­تامىز. سىزدەر جاڭا قازاقستاننىڭ دامۋى­نا ايانباي ۇلەس قوساسىزدار دەپ سەنە­مىن. ەلىمىزدىڭ الدىندا بيىك ماق­ساتتار تۇر. ەڭ الدىمەن مەملەكەتى­مىز­دى ودان ارى وركەندەتىپ، تاۋەلسىز­دىگى­مىزدى نىعايتۋعا ءتيىسپىز. سونداي-اق ازا­ماتتاردىڭ ءال-اۋقاتىن ارتتىرىپ، تۇرمىس ساپاسىن جاقسارتۋىمىز كەرەك، – دەدى قاسىم-جومارت توقاەۆ.

مەملەكەت باسشىسىنىڭ ايتۋىنشا، ەل الدىندا تۇرعان تاعى ءبىر مىندەت – مەملەكەتتىك باسقارۋدىڭ جاڭا مو­دەلىنە كوشۋ.

– نورۆەگيا، جاڭا زەلانديا، اقش مەم­لەكەتتىك اپپارات قىزمەتىنە اقىل­عا قونىمدى يكەمدىلىك جانە ەپتى­لىك پرينتسيپتەرىن ەنگىزۋ پرەسپەكتيۆاسىن بەلسەنە زەرتتەپ جاتىر. كوپ­تەگەن ەل ۇلىبريتانيا ۇلگىسىندە ۇكى­مەت جانىنان جوبالىق كەڭسەلەر قۇرۋ ارقىلى پرودجەكت-مەنەجدمەنت­كە كوشۋدە. بىزدە دە سوعان كۇش سالىنىپ جاتىر. ولاردىڭ تيىمدىلىگىن تىڭ­عىلىقتى زەردەلەۋ قاجەت، – دەدى پرەزيدەنت.

قاسىم-جومارت توقاەۆتىڭ اتاپ ءوتۋىن­شە، مۇنداي جاڭاشىلدىقتاردىڭ نە­گىزگى ماق­ساتى – حالىققا جاقىن بولۋ.

– ءسوز مەملەكەتتىك قىزمەتتىڭ سەرۆيس­تىك مودەلى جايىندا بولىپ وتىر. قازاق­ستان­عا دا قوعامنىڭ سۇرانىسىنا بارا-بار، ءتيىم­دى ءارى ءادىل مەملەكەتتىك باسقارۋدىڭ جاڭا مودەلى كەرەك. بۇل رەتتە ول ەڭ زاماناۋي تەحنولوگيالاردى پايدالانۋعا نەگىز­دەلۋى ءتيىس. وسىنىڭ بارلىعىن ەسكەرە كەلە، ءبىز مەملەكەتتىك باسقارۋ جۇيەسىن رەفور­ما­لاۋعا كىرىستىك، – دەدى مەملەكەت باسشىسى.

سونداي-اق پرەزيدەنت وسى جىلدان باس­تاپ مەملەكەتتىك قىزمەتشىلەردىڭ سانى ءبىر­تىندەپ قىسقارتىلاتىنىن ەسكەرتتى.

– بوساعان قاراجات بارىنشا پايدالى قىز­مەتكەرلەردى ماتەريالدىق ىنتا­لان­دىرۋعا جۇمسالاتىن بولادى. جولداۋىمدا اي­تىلعانداي، 2024 جىلعا قاراي مەملەكەت­تىك قىزمەتشىلەردىڭ سانىن ۇلتتىق كوم­پانيالاردىڭ قىزمەتكەرلەرىمەن قوسا ال­عاندا 25 پايىزعا قىسقارتۋ جوسپار­لان­عان، – دەدى قاسىم-جومارت توقاەۆ.

مەملەكەتتىك قىزمەتكەرلەر تۋرالى ءسوز قوز­عالعاندا پرەزيدەنت ۇكىمەتتە مينيستر نە اكىم اۋىسسا ۆەدومستۆوداعى كادرلىق قۇرام دا وزگەرەتىنىن سىنعا الدى.

«كورسەتكىشتەر ەسەبىندە مەملەكەتتىك ور­گاندارداعى اۋىسپالىلىق تولىقتاي العاندا 6-10 پايىز نورماسى شەگىندە ەكە­نىن كورسەتتى. بىراق مينيستر نەمەسە اكىم اۋىسقان كەزدە كادرلىق قۇرامنىڭ دا اي­تارلىقتاي وزگەرەتىنى ايقىن. باسشى قىز­مەتكەرلەردىڭ سانىنا قاتىستى نورماتيۆتەر جوق. مەريتوكراتيا پرينتسيپتەرى دە بار­لىق ۋاقىتتا ساقتالا بەرمەيدى. ءالى كۇن­گە دەيىن قامقورلىق جانە تانىس ارقى­لى، ىقپالدى قامقورشىنىڭ كومەگىمەن قىزمەت ساتىسىندا ىلگەرىلەۋ جايتتارى بار»، – دەي كەلە، مەملەكەت باسشىسى مۇنداي جاعدايلاردى قوعام تالقىسىنا شى­عارۋ قاجەتىن باسا ايتتى. – بۇعان جول بەرۋ­گە بولمايدى. مۇنداي جۇيەنى قو­عامدىق پىكىر ارقىلى دا سىني ساراپ­تاماعا ۇشىراتۋ قاجەت. باسقاشا مۇمكىن ەمەس. ويتكەنى ەڭ باستىسى – ناتيجە. قازاقستان قارقىندى دامىپ، العا قاراي ىلگەرىلەۋى ءتيىس.

بۇعان قوسا، پرەزيدەنت ەل باسقارۋ ىسىنە ارالاساتىن جاستارعا  «اقپاراتقا قول جەت­كىزۋ تۋرالى» زاڭنىڭ نورمالارىن باس­شى­لىققا الۋدى ەسكەرتتى.

«وزدەرىڭىزگە ءمالىم، مەن سايلاۋ بارىسىندا «حالىق ۇنىنە قۇلاق اساتىن مەملەكەت» تۇجىرىمداماسىن ۇسىندىم. ول باس­تى ءۇش قاعيداعا نەگىزدەلگەن. ءبىرىنشىسى – اشىقتىق جانە جاريالىلىق. سونىڭ اياسىندا مەملەكەتتىك ورگاندارداعى جۇمىس­تىڭ اشىقتىعىن قامتاماسىز ەتۋ مىندەتى تۇر. ءبىزدىڭ ءاربىر قادامىمىز بەن ءاربىر شە­شىمىمىز ازاماتتارعا تۇسىنىكتى بولۋى ءتيىس»، – دەگەن مەملەكەت باسشىسى قوعام وكىل­دەرىنىڭ بيلىكتىڭ ءىس-ارەكەتىمەن كەلىس­پەگەن جاعدايدا، پىكىرىن ەركىن ايتۋعا ءمۇم­كىندىگى بولۋى قاجەتىن باسا ايتتى.

قاسىم-جومارت توقاەۆتىڭ ايتۋىنشا، پرە­زيدەنتتىك جاستار كادر رەزەرۆى جا­ساق­تاۋ ءىسى ارى قاراي جالعاسىن تابادى.

«بۇگىن مەن ەلىمىزدىڭ بارلىق جاستارىنا ۇندەۋ جولداعىم كەلەدى. جاڭعىرۋ پرو­تسە­سى مەنىڭ ىشكى ساياسي باعىتىمنىڭ نەگىزگى باسىمدىقتارىنىڭ ءبىرى سانالادى. كادر رەزەرۆىن جاساقتاۋ جۇمىسى وسىمەن ءبىتىپ قال­مايدى. ول جالعاساتىن بولادى. الداعى كە­زەڭدە ءححى عاسىردىڭ تابىستى مەملەكەتىن قۇرۋعا دايىن كاسىپكەرلەردى، عالىمداردى، مادەنيەت قايراتكەرلەرىن، يننوۆاتورلار مەن وزگە دە تالانتتى جاس ادامداردى جان-جاقتى قولدايتىن بولامىز. بىزگە ءتۇرلى سالادا جاۋاپكەرشىلىكتەن، ستاندارتتان تىس ءارى ءتيىمدى شەشىمدەر قا­بىل­داۋدان قورىقپايتىن جاڭا كوزقاراستى باسقارۋشىلاردىڭ كومانداسى قاجەت. ءدال سونداي ادامدار ەلىمىز قاجەت ەتىپ وتىرعان ناتيجەلەردى بەرۋگە قابىلەتتى»، – دەپ مەملەكەت باسشىسى جاستاردى جىگەرلى ىستەرگە ىنتالاندىردى.

سوڭعى جاڭالىقتار