15 قاڭتار, 15:08 461 0 جاڭالىقتار اسىل تۇمار

مەملەكەتتىك قۇرىلىمدا 500-دەن اسا وزگەرىس بولدى – توقاەۆ

سۋرەت عالامتوردان الىندى
سۋرەت عالامتوردان الىندى

مەملەكەت باسشىسى قاسىم-جومارت توقاەۆ سوڭعى جىلدارى مەملەكەتتىك اپپارات قۇرىلىمىندا 500-دەن اسا وزگەرىس بولعانىن ايتتى.

Tengrinews.kz سايتىنىڭ مالىمەتىنشە، تۇراقتى قايتا قۇرۋ شارالارى مامانداردىڭ جىلىستاۋىنا ىقپال ەتىپ، سالدارىنان ساباقتاستىق بولماعان، بۇل مەملەكەتتىك ورگاندار قىزمەتىنىڭ تيىمدىلىگىنە تەرىس اسەر بەردى. «مەملەكەتتىك اپپارات ءۇشىن ينستيتۋتسيونالدىق ەستە ساقتاۋ اسا ماڭىزدى. ەگەر بولىمشەلەر مەن ۆەدومستۆولاردىڭ باسشىلارى ءبىر لاۋازىمنان ەكىنشىسىنە شەگىرتكەدەي سەكىرىپ جۇرسە، ەستە ساقتاۋ تۋرالى قانداي اڭگىمە بولۋى مۇمكىن؟ ءبىر جىل جۇمىس ىستەيدى دە، سول مينيسترلىكتەن، نە باسقا مينيسترلىكتەن باسقا لاۋازىم تالاپ ەتەدى»، – دەدى توقاەۆ.

پرەزيدەنت ەلىمىزگە مەملەكەتتىك باسقارۋدىڭ جاڭا مودەلى قاجەت دەي كەلە، شەنەۋنىكتەردىڭ حالىق الدىندا اشىق بولۋى كەرەكتىگىن باسا ايتتى.

«مەملەكەتتىك قىزمەتكەرلەر – حالىقتىڭ ءبىر بولىگى، حالىق ءۇشىن ءارى حالىق اراسىندا جۇمىس ىستەيدى دەپ قايتالاۋدان شارشامايمىن. بۇل قىزىل ءسوز ەمەس. مۇنىڭ ءبارىن جۇزەگە اسىرىپ، ومىرشەڭ ەتۋ كەرەك. مەملەكەتتىك قىزمەتكەرلەردىڭ جۇمىسىنا تۇپكىلىكتى باعانى ازاماتتار بەرۋى ءتيىس، بۇل تۋرالى جولداۋىمدا دا ايتتىم. بۇعان قالاي كەلۋگە بولادى؟ وزدەرىڭىز بىلەسىزدەر، ۇلتتىق قوعامدىق سەنىم كەڭەسى اياسىندا مەملەكەتتىك باسقارۋ جۇيەسىندە ازاماتتىق قوعامنىڭ ءرولىن كۇشەيتۋ جونىندەگى رەفورمالار پاكەتى باستاما كوتەردى. بۇل جۇمىس، ارينە، جالعاساتىن بولادى»، – دەدى مەملەكەت باسشىسى.

سوڭعى جاڭالىقتار