15 قاڭتار, 10:49 450 0 جاڭالىقتار اسىل تۇمار

اقشا ايىرباستاعان ادامنىڭ اتى-ءجونى تىركەلەدى – جاڭا قاۋلى

سۋرەت عالامتوردان الىندى
سۋرەت عالامتوردان الىندى

ۇلتتىق بانك «قر قولما-قول شەتەل ۆاليۋتاسىمەن ايىرباستاۋ وپەراتسيالارىن ۇيىمداستىرۋ ەرەجەلەرىنە وزگەرىستەر ەنگىزۋ تۋرالى» قاۋلىعا تۇسىنىكتەمە بەردى.

قازاقپاراتتىڭ جازۋىنشا، جاڭا ەرەجەگە سايكەس، قازىر ايىرباستاۋ پۋنكتىنىڭ ەڭ تومەنگى جارعىلىق كاپيتالى نۇر-سۇلتان قالاسى، رەسپۋبليكالىق ماڭىزى بار قالالار مەن وبلىس ورتالىقتارىندا ورنالاسقان ايىرباستاۋ پۋنكتەرى ءۇشىن 100 ميلليون تەڭگە.

قولما-قول اقشانى ايىرباستاۋ وپەراتسيالارىن جۇرگىزۋ ءۇشىن ايىرباستاۋ پۋنكتى ءوز شوتتارىندا نەمەسە ايىرباستاۋ پۋنكتىنىڭ كاسساسىندا تەڭگە نەمەسە شەتەلدىك ۆاليۋتامەن ەسەپتەگەندە 100 پايىزدان كەم ەمەس مولشەردە تازارتىلعان التىن قۇيماسىنىڭ (بار بولسا) بولۋىن قامتاماسىز ەتۋى كەرەك.

بارلىق بانكتىك ەمەس ايىرباستاۋ پۋنكتتەرى ورنالاسقان جەرىنە قاراماستان 100 ملن تەڭگە مولشەرىندە جارعىلىق كاپيتالىن قۇرۋى كەرەك. اۋىلدار مەن شاعىن قالالاردا ورنالاسقان نىساندار ءۇشىن جارعىلىق كاپيتالدىڭ مولشەرى 50 ميلليون تەڭگەگە دەيىن ازايتىلدى. سونىمەن قاتار، بۇل نورمانى ەنگىزۋ ۋاقىتى اۋىستىرىلدى. باستاپقىدا ولار تالاپتى 2020 جىلدىڭ 1 قاڭتارىنان باستاپ ەنگىزۋ جوسپارلاندى.

تۇزەتىلگەن نۇسقاعا سايكەس، رەسپۋبليكالىق ماڭىزى بار قالالاردا ورنالاسقان ۇيىمدار ءۇشىن نورما 2020 جىلدىڭ 1 ساۋىرىنەن باستاپ كۇشىنە ەنەدى. وبلىستاردىڭ جانە وبلىستىق ماڭىزى بار قالالاردىڭ اكىمشىلىك ورتالىقتارىندا 2020 جىلدىڭ 1 شىلدەسىنەن باستاپ كۇشىنە ەنەتىن بولادى»، – دەپ ءتۇسىندىردى ۇلتتىق بانك قولما-قول اقشا اينالىمى دەپارتامەنتىنىڭ ديرەكتورى جومارت قاجىمۇراتوۆ.

سونىمەن قاتار، جاڭا ەرەجەگە سايكەس، ايىرباستاۋ پۋنكتتەرى 1 اقپاننان باستاپ 9:00-دەن 20:00-گە دەيىن جۇمىس ىستەيدى.

جومارت قاجىمۇراتوۆتىڭ ايتۋىنشا، جۇمىس كەستەسى ايىرباستاۋ پۋنكتتەرى مەن ولاردىڭ كليەنتتەرىنىڭ قاۋىپسىزدىگىن جاقسارتۋعا بايلانىستى وزگەرىپ وتىر.

ونىڭ پايىمداۋىنشا، بۇل شارا كەشكى جانە تۇنگى ۋاقىتتا قولما-قول شەتەلدىك ۆاليۋتا ساتىپ الۋدا ۆاليۋتا كۋرسىنىڭ ءوسۋ فاكتىلەرىن بولدىرماۋعا، حالىق اراسىندا نەگىزسىز دۇرلىگۋدىڭ الدىن الۋعا كومەكتەسەدى. اۋەجاي، تەمىرجول ارقىلى قازاقستانعا كەلەتىن/كەتەتىن جانە مەملەكەتتىك شەكارا ارقىلى وتكىزۋ پۋنكتىندەگى ادامدار ءۇشىن ايىرباستاۋ پۋنكتتەرى تاۋلىك بويى جۇمىس ىستەيدى. ءبىرىنشى ساناتتاعى ءىرى ساۋدا ورتالىقتارىندا ساعات 9:00-دەن 22:00-گە دەيىن جۇمىس ىستەيدى.

سونداي-اق، ەندى اقشا ايىرباستاۋ پۋنكتەرى ءار وپەراتسيانى جۋرنالعا تىركەپ وتىرادى. ياعني اقپاننان باستاپ اقشا ايىرباستاعان ادامنىڭ اتى-ءجونى مەن جەكە كۋالىگىنىڭ ءنومىرى جازىلادى.

«ءار ايىرباستاۋ وپەراتسياسىنان كەيىن قىزمەتكەرلەر جۋرنالعا ادامنىڭ جەكە كۋالىگىندەگى مالىمەتتەردى (تەگى، اتى، اكەسىنىڭ اتى), بەرىلگەن كۇنىن، قۇجاتتىڭ ءنومىرىن، جارامدىلىق مەرزىمىن جازىپ الادى. سونىمەن قاتار، جاڭا تالاپ بويىنشا ايىرباستايتىن اقشانىڭ كولەمى 500 مىڭ تەڭگەدەن اسپاۋى كەرەك»، – دەيدى جومارت قاجىمۇراتوۆ.

ونىڭ ايتۋىنشا، بۇل – حالىقارالىق تاجىريبە.

سوڭعى جاڭالىقتار