6 قاڭتار, 13:44 461 0 مادەنيەت "تۇركىستان" گازەتىنىڭ اۆتورلارى

«ماڭگىلىك ءومىر سيمفونياسى»

بىشكەكتەگى گ.ايتيەۆ اتىنداعى قىرعىز ۇلتتىق بەينەلەۋ ونەرى مۇراجايىنا قويىلعان قازاقستاندىق سۋرەتشى-ءمۇسىنشى امانات نازارقۇلدىڭ «ماڭگىلىك ءومىر سيمفونياسى» اتتى كورمەسى ونەر سۇيەر قاۋىمنىڭ قىزىعۋىن جاراتۋدا. كورمەنى بىشكەكتىكتەر جانە قالا مەيماندارى 15 قاڭتارعا دەيىن تاماشالاي الادى،

كورەرمەندەرمەن كەزدەسۋ بارىسىندا سۋرەتشى جاس كەزىنەن باستاپ ۇلى جازۋشى شىڭعىس ايتماتوۆتىڭ اڭگىمە-پوۆەستەرىن وقىپ كەلە جاتقانىن، ودان العان اسەرلەرى شىعارماشىلىعىنا ارقاۋ بولعانىن بايانداپ بەردى. ءتىپتى، ونىڭ سوناۋ1988 جىلى ماسكەۋدەگى ي.سۋريكوۆ اتىنداعى كوركەمونەر ينستيتۋتىن ءتامامداۋ كەزىندەگى ديپلومدىق جۇمىسى ايتماتوۆ كەيىپكەرلەرى تاقىرىبىنا ارنالعان. سوندىقتان دا، ش.ايتماتوۆقا تاعزىم رەتىندە كورمەسىن ونىڭ ەسىمىنە باعىشتاعان. ايتماتوۆتىڭ جەكە وزىنە بايلانىستى سۋرەتشىنىڭ ءتريپتيحى جازۋشىنىڭ ءوسپىرىم، ورتا جاس جانە ۇلعايعان قۇراعىنداعى بولمىسىن بەينەلەيدى.

ال ەندى تۇركى حالىقتارىنىڭ تاريحي تۇلعالارىنا ارنالعان پولوتنولارى وزىنشە ءبىر گالەرەيا: ءال-فارابي، بالاساعۇن، ماحمۇت قاشقاري، اتيللا، بەيبارىس سۇلتان، توميريس ج.ب. تۇيىندەپ ايتقاندا، ۇلى وقىمىستى بابالارىمىزدىڭ بىلىمگە ۇندەگەن جانە جاۋجۇرەك باتىرلارىمىزدىڭ ەرلىككە شاقىرعان اماناتىن امانات نازارقۇل بۇگىنگى ۇرپاققا تابىستاپ وتىرعانداي.

ال ەندى سۋرەتشىنىڭ مونۋمەنتالدىق ەڭبەكتەرى ءوز الدىنا اڭگىمە ەتۋگە تاتيدى. سولاردىڭ ىشىنەن ەكى ءمۇسىنىن ءبولىپ قاراستىرۋعا بولادى. بىرىگشىسى «تۇرك اپوگەيى». ءبادىز بەس كومپونەنتتەن تۇرادى. تۇعىردىڭ ۇستىندەگى تاسباقا – تۇركى جۇرتىنىڭ بەرىكتىلىگى، ونىڭ ۇستىندە قاسقىر-قۇرتقا انا – توتەم، ونىڭ ۇستىندە بالا – العاشقى تۇركى پەرزەنتى، ول شاڭىراق كوتەرىپ تۇر – قازىرگى تاۋەلسىزدىگىمىزدىڭ بەلگىسى، شاڭىراقتىڭ بەلدەۋلەرىندە قارلىعاشتار قونىپ، كەيبىرەۋلەرى اينالشاقتاپ ۇشىپ ءجۇر – زامان تىنىشتىعى. ەكىنشىسى – «بەيبىتشىلىك مەموريالى». بيىك تۇعىردىڭ ۇستىندە «التىن ادام» الاقانىن كوككە جايىپ، ەلگە مامىراجاي تىرشىلىكتى تاڭىردەن تىلەۋدە. تۇعىردىڭ وڭ جاعىندا – اتتىلى تۇركى جاۋىنگەرى. كونە ءداۋىر بەدەرى. ەر-توقىم، ابزەلدەرى التىنمەن كومكەرىلگەن سايگۇلىكتىڭ باسىنا قوشقاردىڭ ءمۇيىزى كيگىزىلگەن – وجەتتىلىك كورىنىسى. تۇعىردىڭ سول جاعىندا – اتتىلى اڭشى. قازىرگى ۋاقىت. قولىنداعى بۇركىت – اتا داستۇرگە ورالۋ.

سۋرەتشىنىڭ قيالى ىسكە اسىپ، «بەيبىتشىلىك مەموريالى» سالىنسا، كەشەننىڭ ورتاسىنداعى «التىن ادام» 25 مەترلىك بيىكتىكتە بولماقشى.

كورمە «رۋحاني جاڭعىرۋ» باعدارلاماسىنىڭ اياسىندا قازاقستاننىڭ مادەنيەت جانە سپورت مينيسترلىگىنىڭ، سونداي-اق قىرعىزستانداعى ەلشىلىكتىڭ دەمەۋلىگىمەن ۇيىمداستىرىلىپ وتىر.

نازاربەك بايجىگىتوۆ،

«تۇركىستاننىڭ» قىرعىزستانداعى ءتىلشىسى

بىشكەك قالاسى.   

سوڭعى جاڭالىقتار