29 جەلتوقسان, 16:16 631 0 الەۋمەت انار لەپەسوۆا

ساقتاندىرۋ كومپانياسى ۇشاق اپاتىنان مەرت بولعانداردىڭ وتباسىنا قانشا قاراجات بەرىلەتىنىن حابارلادى

Amanat ساقتاندىرۋ كومپانياسى Bek Air ۇشاق اپاتىنان جاپا شەككەن ادامدارعا تولەمدەر بەرەدى. بۇل تۋرالى كومپانيانىڭ  Facebook-تەگى پاراقشاسىندا حابارلاندى. 

حابارلامادا Amanat كومپانياسى Bek Air كومپانياسىنىڭ UP-F1007 بورتتىق ءنومىرى بار Fokker 100 ۇشاعىنىڭ ساقتاندىرۋشىسى ەكەنى ايتىلعان. كولىك قۇرالى يەسىنىڭ جاۋاپكەرشىلىگى Amanat-تا تاسىمالداۋشىنىڭ جولاۋشىلار الدىنداعى ازاماتتىق-قۇقىقتىق جاۋاپكەرشىلىگىن مىندەتتى ساقتاندىرۋ شارتى بويىنشا ساقتاندىرىلعان.

"تاسىمالداۋشىنىڭ جولاۋشىلار الدىنداعى ازاماتتىق-قۇقىقتىق جاۋاپكەرشىلىگىن مىندەتتى ساقتاندىرۋ تۋرالى" زاڭى بويىنشا ساقتاندىرۋ تولەمدەرىن دەنساۋلىعىنا زيان كەلگەن جولاۋشىلار، سونداي-اق قازا تاپقان جولاۋشىلاردىڭ اسىراۋىندا بولعان تۋىستارى الادى.

ء"بىز قازا بولعانداردىڭ تۋعان-تۋىستارىنا كوڭىل ايتامىز. تولەمدەردى رەسىمدەۋ جەدەل ءارى ەش قيىندىقسىز ءوتۋ ءۇشىن بارلىق كۇشىمىزدى سالامىز. ءبىز قاراجاتتى Bek Air مەن جولاۋشىلاردان قاجەتتى بارلىق قۇجاتتى العاننان كەيىن 7 كۇن ىشىندە تولەيمىز", – دەلىنگەن حابارلامادا.

وسىعان قوسا ساقتاندىرۋ كومپانياسىندا كىمگە قانداي تولەمدەر بەرىلەتىنىن حابارلادى:

- مەرتىككەن، جاراقات العان نەمەسە دەنساۋلىعىنا باسقا دە زاقىم كەلگەن جولاۋشىلار ەمدەلۋگە جۇمسالعان ناقتى شىعىندار بويىنشا 200 اەك-كە دەيىن (بۇگىنگى كۇنى بۇل 505 000 تەڭگە) تولەمدەر الادى;

- ەگەر اپات سالدارىنان ادام مۇگەدەك بولىپ قالسا، Amanat مۇگەدەكتىك توبىنا قاراي 2 500-دەن 5 000 اەك-كە دەيىن (6 312 000 – 12 625 000 تەڭگە) تولەيدى;

- تۋعان-تۋىستارىنان ايىرىلعان ادامدارعا 5000 اەك (12 625 000 تەڭگە) تولەنەدى.

تولىق اقپارات الۋ ءۇشىن 7310 تەلەفونى ارقىلى حابارلاسۋعا بولادى.

سوڭعى جاڭالىقتار