28 جەلتوقسان, 16:41 629 0 قوعام انار لەپەسوۆا

"ناعىز پاتريوت ومىردەن ءوتتى": داريعا نازارباەۆا رۇستەم قايداروۆتىڭ وتباسىنا كوڭىل ايتتى

سەنات توراعاسى داريعا نازارباەۆا ۇشاق اپاتىنا قازا بولعان گەنەرال-مايور رۇستەم قايداروۆتىڭ وتباسىنا جوعارعى ۇكىمەتتىك جەدەلحات جولدادى.

«اسا قۇرمەتتى رۇستەم ەسىمحانۇلى قايداروۆتىڭ قايعىلى قازاسىنا بايلانىستى كوڭىل ايتامىن. كوپتەگەن جازىقسىز قۇرباندارعا سەبەپ بولعان قارالى حاباردى قاتتى قايعىرىپ ەستىدىك. بۇكىل ءومىرىن وتانىمىزعا ادال قىزمەت ەتۋگە ارناعان ناعىز پاتريوت ءارى تاماشا ادام ومىردەن ءوتتى» - دەلىنگەن جەدەلحاتتا.
سونىمەن قاتار، ول رۇستەم ەسىمحانۇلىن كوپتەن بەرى تانيتىنىن ايتا كەلىپ، "ول قازاقستاندى ارقاشان قۋاتتى ءارى وركەندەگەن ەل رەتىندە كورگىسى كەلەتىن، سوندىقتان دا ەلىمىزدىڭ قوعامدىق ومىرىنە بەلسەنە اتسالىستى" - دەپ ەسكە الادى.
«رۇستەم ەسىمحانۇلى تاۋەلسىز قازاقستاننىڭ قالىپتاسۋى مەن دامۋىنا باعا جەتپەس ۇلەس قوستى. ونىڭ مەملەكەتتىك جانە قوعامدىق ەڭبەگى كوپتەگەن ناگرادالارمەن اتاپ ءوتىلدى. قوعامداعى وزگەرىستەرگە سەرگەك، ومىردە بەلسەندى كوزقاراستا بولدى. گەنەرال قايداروۆتىڭ وفيتسەرلەر مەن گەنەرالدار اراسىنداعى بەدەلى زور بولاتىن. قازاقستان رەسپۋبليكاسى گەنەرالدار كەڭەسىنە باسشىلىق ەتتى. "اسار" پارتياسى ساياسي كەڭەسىنىڭ مۇشەسى بولدى، جاستاردى پاتريوتتىق تۇرعىدا تاربيەلەۋگە بەلسەنە قاتىستى» - دەدى داريعا نازارباەۆا ءوز حاتىندا.
سەنات توراعاسى تانىمال گەنەرالدىڭ وقىس قازاسى ەلىمىز ءۇشىن اۋىر قايعى ەكەنىن اتاپ ءوتتى.
«قۇرمەتتى گەنەرال ر.قايداروۆتىڭ كەنەتتەن قازا تاپقانى بارىمىزگە اۋىر ءتيدى. جىلى ءجۇزدى جۇزدەسۋلەرى مەن جارقىن سوزدەرى ەسكە ءتۇستى. ارداقتى ازامات، بىلىكتى مامان، ەلىمىزدىڭ ناعىز پاتريوتى – وسى بەينەدە جۇرەگىمىزدە ماڭگى قالادى. بۇكىل ەلىمىز ورنى تولماس ازاماتتان ايىرىلدى. وسىناۋ اۋىر قازاعا وراي ونىڭ وتباسىنا، تۋعان-تۋىستارىنا قايعىلارىنا ورتاقتاسىپ، كوڭىل ايتامىن» - دەدى داريعا نازارباەۆا.

سوڭعى جاڭالىقتار