18 جەلتوقسان 2019, 09:55 801 0 نۇر وتان اسىل تۇمار

"التىن دومبىرا" رۇستەم قايىرتايعا بۇيىردى

سۋرەت عالامتوردان الىندى
سۋرەت عالامتوردان الىندى

تاۋەلسىزدىك كۇنىنە وراي ورال قالاسىندا وتكەن «تۇعىرى بيىك تəۋەلسىزدىك!» اتتى VIII «التىن دومبىرا» رەسپۋبليكالىق اقىندار ايتىسى مارەسىنە جەتتى. «Nur Otan» پارتياسىنىڭ قولداۋىمەن، مادەنيەت جانە سپورت مينيسترلىگى مەن باتىس قازاقستان وبلىسىنىڭ اكىمدىگى ۇيىمداستىرعان ونەر سايىسى ەكى كۇنگە سوزىلدى.

جىر دوداسىنا بارلىعى 20 اقىن قاتىسىپ، ونى اقىن، حالىقارالىق ايتىس اقىندارى مەن جىرشى-تەرمەشىلەر وداعىنىڭ توراعاسى ءجۇرسىن ەرمان جۇرگىزدى.

سونىمەن، «التىن دومبىرا» الماتىلىق اقىن رۇستەم قايىرتايۇلىنا بۇيىردى. ال ءبىرىنشى جۇلدەنى مۇحتار نيازوۆ السا، ەكىنشى ورىنعا جانسايا مۋسينا مەن قازىرەت بەردىحان ولجالادى. ءۇشىنشى تۇعىردان ايبەك قاليەۆ پەن ءومىرجان كوپبوسىنوۆ كورىندى. ارنايى جۇلدە اسەم ەرەجەقىزى، قانات مىرزاحان، اسپانبەك شۇعاتاەۆقا تاپسىرىلدى. ال فينالعا شىقپاعان اقىندار شابىتتاندىرۋ سىيلىعىن الدى.

سونىمەن قاتار شىعىس قازاقستان وبلىسىنان كەلگەن ايتىس ونەرىنىڭ ءىرى قولداۋشىسى، «Tass Group» كومپانياسىنىڭ ديرەكتورى دۋلات تاستەكەەۆ قاراعاندىلىق ديدار حامزيەۆكە ات مىنگىزسە، ورالدىق باۋىرجان شيمەردەنۇلىنا ءبىر جىلدىق 2 ميلليون 400 مىڭ تەڭگە كولەمىندە ستيپەنديا تاعايىندادى.

ايتىستىڭ العىشقى كۇنى «Nur Otan» پارتياسىنىڭ ۇسىنىسى بويىنشا مەملەكەت باسشىسىنىڭ جارلىعىمەن بەلگىلى اقىن، ايتىستىڭ جاناشىرى ءجۇرسىن ەرمان «پاراسات» وردەنىمەن جانە دارىندى ايتىسكەر ايبەك قاليەۆ «قۇرمەت» وردەنىمەن ماراپاتتالدى.

ەسكە سالا كەتسەك، «Nur Otan» پارتياسى توراعاسىنىڭ ءبىرىنشى ورىنباسارى باۋىرجان بايبەك ۇستىمىزدەگى جىلدىڭ شىلدە ايىندا قىزىلوردا وبلىسىنا بارعان جۇمىس ساپارى بارىسىندا ايماقتىڭ بەلسەندى جاستارىمەن ارنايى كەزدەسەن-ءدى. كەزدەسۋدە باۋىرجان بايبەك جاستاردىڭ ەل دامۋىنداعى ءرولى جانە ۇلتتىق قۇندىلىقتاردى دارىپتەۋ تۋرالى اشىق اڭگىمە ءوربىتىپ، قازىرگى جاھاندانۋ جاعدايىندا ءاربىر ۇلت ءوزىن ساقتاپ قالۋ ءۇشىن كۇرەسىپ جاتقانىنا جانە بۇل ىستە جاستارعا ۇلكەن مىندەت جۇكتەلىپ وتىرعانىنا نازار اۋدارعان بولاتىن. وسى رەتتە ول: «ءبىز تاۋەلسىزدىك العان كەزدە بولاشاعىمىزعا سەنىمسىزدىكپەن قاراعاندار بولدى. ەلباسىنىڭ دانا ساياساتىنىڭ ارقاسىندا ءبىز مەملەكەت قۇرىپ، بۇكىل الەمگە ءوزىمىزدىڭ ەل بولا الاتىنىمىزدى دالەلدەدىك. ەندى وسى ەلدىگىمىزدى كۇشەيتىپ، ءوز قۇندىلىقتارىمىزدىڭ اياسىن كەڭەيتۋىمىز كەرەك. انا ءتىلىمىز بەن تاريحىمىزدى دارىپتەپ، الەمدىك دەڭگەيگە الىپ شىعۋ ءبىزدىڭ مىندەتىمىز. بۇل ىستە جاستارىمىز بەلسەندىلىك تانىتۋى ءتيىس. پارتيانىڭ قولداۋىمەن ەندى اي سايىن ءار وڭىردە ايتىس ۇيىمداستىرىلادى. ونىڭ العاشقىسى كۇزدە الماتىدا وتەدى. اقىندارىمىز قوعامداعى وزەكتى ماسەلەلەردى اشىق ايتۋى ءتيىس. بىراق بارلىعى كونسترۋكتيۆتى بولۋى قاجەت»، – دەگەن ەدى.

مىنە، سودان بەرى «Nur Otan»-نىڭ قولداۋىمەن وسىعان دەيىن ەلوردادا ۇلتتىق سپورت سالاسىنداعى ۇزدىكتەردى انىقتايتىن «التىن تۇعىر – 2019» كەشى، سونداي-اق، جىرشى-تەرمەشىلەردىڭ «JYR AMANAT» كونتسەرت-سپەكتاكلى ءوتتى. سونداي-اق، «Nur Otan» پارتياسىنىڭ جانىنداعى «ميراس» رەسپۋبليكالىق قوعامدىق كەڭەسى مۇشەلەرىنىڭ باستاماسىمەن مەملەكەتتىك ءتىلدى دامىتۋ تەتىكتەرىن پىسىقتاۋ ءۇشىن ارنايى كوميسسيا قۇرىلدى. بيىل كۇزدە اتىراۋ، قاراعاندى، قوستاناي، الماتى جانە نۇر-سۇلتان قالالارىندا ايتىستار ءوتىپ، «التىن دومبىرا» رەسپۋبليكالىق اقىندار ايتىسى وسى جىلى پارتيانىڭ قولداۋىمەن وڭىرلەردە ۇيىمداستىرىلعان ايتىستاردى قورىتىندىلادى.

پارتيا ايتىس وتكىزۋدى بيىلمەن عانا شەكتەمەي، بۇل ءۇردىس كەلەسى جىلى عۇلاما عالىم ءابۋ ناسىر ءال-ءفارابيدىڭ 1150 جىلدىعى مەن ابايدىڭ 175 جىلدىعىنا وراي وتكىزىلەتىن الامان ايتىستارعا ۇلاسپاق.

سوڭعى جاڭالىقتار