17 جەلتوقسان 2019, 20:40 878 0 نۇر وتان انار لەپەسوۆا

«التىن دومبىرا» كىمگە بۇيىرادى؟

تاۋەلسىزدىك كۇنىنە وراي ورال قالاسىندا «تۇعىرى بيىك تəۋەلسىزدىك!» اتتى «التىن دومبىرا» رەسپۋبليكالىق اقىندار ايتىسى وتۋدە. ايتىس بارىسىندا «Nur Otan» پارتياسىنىڭ ۇسىنىسى بويىنشا مەملەكەت باسشىسىنىڭ جارلىعىمەن بەلگىلى اقىن، ايتىستىڭ ۇلكەن جاناشىرى ءجۇرسىن ەرمان «پاراسات» وردەنىمەن جانە دارىندى ايتىسكەر ايبەك قاليەۆ «قۇرمەت» وردەنىمەن ماراپاتتالدى. ەكى كۇنگە ارنالعان بۇل ونەر سايىسى «Nur Otan» پارتياسىنىڭ قولداۋىمەن، مادەنيەت جانە سپورت مينيسترلىگى مەن باتىس قازاقستان وبلىسى اكىمدىگىنىڭ ۇيىمداستىرۋىمەن وتۋدە.

ايتىس شىمىلدىعىن باتىس قازاقستان وبلىسىنىڭ اكىمى عالي ەسقاليەۆ پەن «Nur Otan» پارتياسىنىڭ حاتشىسى عابيدوللا وسپانقۇلوۆ اشىپ بەردى.

«اق جايىقتا العاش وتكەلى تۇرعان «التىن دومبىرا» اقىندار ايتىسىنىڭ اشىلۋىمەن قۇتتىقتايمىن. تاريحى مول، تابيعاتى كوركەم اق جايىققا قوش كەلدىڭىزدەر. ايتىس - بابالار اماناتى. اقىندارعا شالقار تابىس تىلەيمىن»، - دەدى وبلىس اكىمى عالي ەسقاليەۆ.

ودان كەيىن ءسوز العان «Nur Otan» پارتياسىنىڭ حاتشىسى عابيدوللا وسپانقۇلوۆ ەلىمىزدىڭ جەر-جەرىندە پارتيا قولداۋىمەن وتكىزىلىپ جاتقان ايتىستاردىڭ ماڭىزىنا توقتالدى.

«Nur Otan» پارتياسىنىڭ توراعاسى نۇرسۇلتان نازارباەۆ يۋنەسكو-نىڭ ماتەريالدىق ەمەس مادەني مۇرالار تىزىمىنە ەنگەن ايتىس ونەرىنە قولداۋ كورسەتۋدى تاپسىردى. تاۋەلسىزدىگىمىز ماڭگى بولىپ، ايتىستىڭ تۇعىرى بيىكتەي بەرسىن»،- دەدى عابيدوللا وسپانقۇلوۆ.

جىر دوداسىن اقىن، حالىقارالىق ايتىس اقىندارى مەن جىرشى-تەرمەشىلەر وداعىنىڭ توراعاسى ءجۇرسىن ەرمان جۇرگىزدى.

ايتا كەتەيىك، «Nur Otan» قولداۋىمەن سوڭعى 4 ايدىڭ ىشىندە اتىراۋ، قاراعاندى، قوستاناي، الماتى جانە نۇر-سۇلتان قالالارىندا ايتىستار وتكەن بولاتىن. تاۋەلسىزدىك كۇنىنە وراي ورال قالاسىندا ءوتىپ جاتقان بۇل «التىن دومبىرا» رەسپۋبليكالىق اقىندار ايتىسى بيىلعى جىلى «Nur Otan» پارتياسىنىڭ قولداۋىمەن ەلدىڭ وڭىرلەرىندە ۇيىمداستىرىلعان ايتىستاردى قورىتىندىلاماق.

پارتيا ايتىس وتكىزۋدى بيىلمەن عانا شەكتەمەي، بۇل ءۇردىس كەلەسى جىلى عۇلاما عالىم ءابۋ ناسىر ءال-ءفارابيدىڭ 1150 جىلدىعى مەن ابايدىڭ 175 جىلدىعىنا وراي وتكىزىلەتىن الامان ايتىستارعا ۇلاسپاق.

وسىمەن سەگىزىنشى رەت ۇيىمداستىرىلىپ وتىرعان «التىن دومبىرا» ايتىسىنا جىل بويى وتكەن دودالاردا جەڭىمپاز بولعان 20 اقىن قاتىسۋدا. ولاردىڭ قاتارىندا جانداربەك بۇلعاقوۆ، اسەم ەرەجەقىزى، بەكزات اسقاروۆ، ارۋنا كەرىمبەك، رۇستەم قايىرتاي، شۇعايىپ سەزىمحان، قانات مىرزاحان، حازىرەت بەردىحان، مۇحتار نيازوۆ، ايبەك قاليەۆ اسپانبەك شۇعاتاەۆ، شالقارباي ءىزباساروۆ، ديدار قاميەۆ، ءومىرجان كوپبوسىنوۆ، سەرىك قۇسانباەۆ، جۇلدىزاي ماراتبەكقىزى، ءبىرجان بايتۋوۆ، جانسايا مۋسينا، تالعات مىقي، باۋىرجان شيرمەدينۇلى سىندى ايتىسكەرلەر بار.

سوڭعى جاڭالىقتار