12 جەلتوقسان, 13:46 899 0 الەۋمەت انار لەپەسوۆا

قازاقستاندا قانداي كولىكتەرگە سۇرانىس كوپ؟

بيىلعى جىلدىڭ قاڭتار-قاراشاسىندا قازاقستاندا رەسمي ديلەرلەر 63 404 اۆتوموبيل ساتتى. بۇل وسىدان ءبىر جىل بۇرىنعى كورسەتكىشتەن 20,8 پايىزعا جوعارى. بۇل تۋرالى «قازاۆتووندىرىس» قازاقستان اۆتوموبيل سالاسى كاسىپورىندارى وداعىنىڭ وكىلدەرى حابارلادى. 

قازاقستاندىقتار جاڭا جەڭىل كولىك ساتىپ الۋعا 588,8 ملرد تەڭگە قاراجاتتارىن جۇمساعان. بۇل 2018 جىلعى كورسەتكىشتەن 31,1 پايىزعا كوپ. ال وسى جىلدىڭ قاراشا ايىنىڭ وزىندە عانا 66,4 ملرد تەڭگەنىڭ 7 373 كولىگى ساتىلدى. 2019 جىلدىڭ 11 ايىندا قازاقستاندىق اۆتوزاۋىتتاردا شىعارىلعان ونىمگە 36 726 ادامنىڭ تاڭداۋى تۇسسە، ساتىلعان 26 678 كولىك شەتەلدە قۇراستىرىلعان.

«وسى جىلدىڭ قاڭتار-قاراشاسىنىڭ قورىتىندىسى بويىنشا سۇرانىسى جوعارى قازاقستاندىق برەندتەردىڭ رەيتينگىن Lada باستاپ تۇر. رەسپۋبليكا اۋماعىندا رەسەيلىك ماركانىڭ 13 671 ءاۆتوموبيلى ساتىلعان. 13 105 Hyundai مودەلى ءوز يەسىن تاپتى. ءۇشىنشى ورىندا 13 031 بىرلىگى ساتىلعان Toyota ماركاسى تۇر. ۇزدىك بەستىك قاتارىندا KIA (3 192 بىرلىك) مەن Ravon (2 899) كولىكتەرى دە بار. سونىمەن قاتار تور-10 ءوتىمدى ماركالاردىڭ قاتارىنا Renault (2 383), GAZ (2 239), Nissan (2 145), UAZ (1 735 ) جانە Volkswagen (1 605) كىرەدى»، - دەپ اتاپ ءوتتى «قازاۆتووندىرىستەن».

بيىلعى جىلى مىنا وڭىرلەردىڭ تۇرعىندارى جاڭا اۆتوكولىكتەردى كوپ ساتىپ العان: الماتى قالاسى (16 981 اۆتوموبيل ساتىلدى), نۇر-سۇلتان (12 447), شىمكەنت (4 998), اتىراۋ (4 048), قاراعاندى (3 883), قوستاناي (3 648), ورال (2 713), وسكەمەن (2 564), پاۆلودار (2 286) جانە اقتاۋ (2 266).

سوڭعى جاڭالىقتار