12 جەلتوقسان, 13:00 512 0 ايماق انار لەپەسوۆا

پەدوفيلدى اشكەرەلەگەن پسيحولوگ

الماتى وبلىسىنىڭ اكىمى اماندىق باتالوۆ جاسوسپىرىمدەرگە زورلىق كورسەتۋ فاكتىسىن انىقتاپ، كىنالىنىڭ جازاعا تارتىلۋىنا مۇرىندىق بولعان، ەڭ باستىسى ءجابىر كورگەن جاسوسپىرىمگە دەر كەزىندە پسيحولوگيالىق كومەك كورسەتىپ، جارقىن ومىرگە بەت بۇرعىزعان ماتاي ورتا مەكتەبىنىڭ پسيحولوگى اجار دۇيسەنبەكوۆانى قابىلدادى، دەپ حابارلايدى  وبلىس اكىمىنىڭ ءباسپاسوز قىزمەتى. 

وبلىس اكىمى اجار دۇيسەنبەكوۆا جايلى بلوگەر جاننا احمەتوۆانىڭ Facebook پاراقشاسىنان بىلگەنىن ايتتى. وقيعادان بەرى ءبىراز ۋاقىت وتكەنىمەن، بۇل پسيحولوگتى كاسىبيلىگى ءۇشىن ماراپاتتاۋعا كەدەرگى ەمەس ەكەنىن دە جەتكىزدى.

«بۇگىنگى كۇنى ءاربىر پەداگوگ، ءاربىر پسيحولوگ وسىلاي جۇمىس ىستەۋى كەرەك. بالالار ءسۋيتسيدىنىڭ الدىن الىپ، قيىن جاعدايدا ولارعا كاسىبي مامان رەتىندە كومەكتەسە ءبىلدىڭ. قازىرگى كەزدە سۋيتسيد نەگە ءوسىپ كەتتى؟ قيىن جاعدايعا تاپ بولعاندا جاسوسپىرىمدەر تۇيىققا تىرەلىپ، جارقىن ومىرگە شىعاتىن جول تاپپاي قالادى. اينالاسىندا ادام تولىپ جۇرسە دە، پروبلەماسىمەن جالعىز ءوزى بەتپە-بەت كەلەدى. سونداي كەزدەردە بالانىڭ كوڭىل كۇيىن بايقاپ، اڭگىمەلەسىپ، تىعىرىقتان شىعاتىن جول كورسەتۋ – وتباسىندا ارقايسىمىزدىڭ مىندەتىمىز، ال مەكتەپتە مۇعالىمنىڭ جاۋاپكەرشىلىگىندە. سول جاۋاپكەرشىلىكتى ۇلكەن ابىرويمەن اتقاردىڭ. سەنىڭ وسى كاسىبي بىلىكتىلىگىڭ بارلىق پەداگوگتارعا ۇلگى بولۋى كەرەك»، - دەپ ريزاشىلىعىن بىلدىرگەن وبلىس اكىمى ا. باتالوۆ اجار دۇيسەنبەكوۆاعا قۇرمەت گراموتاسىن ۇسىنىپ، نوۋتبۋك سىيعا تارتتى.

اجار دا ءوز كەزەگىندە وبلىس باسشىسىنا العىسىن ءبىلدىردى. «مەنىڭ ورنىمدا بولسا، كەز كەلگەن پسيحولوگ وسىلاي جاسايدى دەپ ويلايمىن. مەن ءبىر ەرەكشە ءىس جاسادىم دەمەيمىن، تەك ءوزىمنىڭ كاسىبي مىندەتىمدى ورىندادىم. ءاربىر بالا مەيىرىم مەن ماحابباتقا بولەنىپ ءوسۋى كەرەك، بالاعا زورلىق جاساۋعا ەشكىمنىڭ دە حاقى جوق. سوندىقتان ءبىز ءاربىر بالانىڭ تاعدىرىنا جاۋاپتىمىز. مەنى ەلەپ-ەسكەرىپ شاقىرعانىڭىزعا، ماراپاتتاپ جاتقانىڭىزعا شىن جۇرەكتەن العىس ايتامىن»، - دەدى ا. دۇيسەنبەكوۆا.

اتاپ وتسەك، اجار دۇيسەنبەكوۆا 11 جىلدان بەرى ماتاي ورتا مەكتەبىندە پسيحولوگ بولىپ جۇمىس ىستەيدى. وتباسىندا ءۇش ۇل تاربيەلەپ وتىرعان باقىتتى انا. 2018 جىلى ەكى بىردەي ءجاسوسپىرىم قىزدىڭ تاعدىرىنا اراشا ءتۇسىپ، ءجابىر كورسەتۋشىنىڭ زاڭعا سايكەس جازاسىن الۋىنا، ال قىزداردىڭ جاڭا ءومىر باستاۋىنا مامان رەتىندە اتسالىسقان.

 

سوڭعى جاڭالىقتار