11 جەلتوقسان, 10:40 377 0 جاڭالىقتار اسىل تۇمار

وسكەمەنگە تاسىپ جاتقان ۋراننىڭ ەكولوگياعا زيانى قانداي؟

وسكەمەندەگى ءۇلبى مەتاللۋرگيالىق زاۋىتىنا تومەن بايىتىلعان ۋراننىڭ ەكىنشى جانە سوڭعى پارتياسى جەتكىزىلدى، دەپ حابارلادى «حابار 24» ارناسى.

العاشقىسى شامامەن 2 اي بۇرىن تاسىمالدانعان. قازىر زاۋىت اۋماعىندا ورنالاسقان «تومەن بايىتىلعان ۋران بانكىندە» 90 تونناعا جۋىق ۋران قورى بار. ۋران بانكىن اتوم ەنەرگياسى جونىندەگى حالىقارالىق اگەنتتىك باقىلايدى. ماماندار «ونىڭ قالا ەكولوگياسى مەن حالىقتىڭ دەنساۋلىعىنا كەرى اسەرى بار دەۋگە ەشقانداي نەگىز جوق» دەيدى.

«تومەن بايىتىلعان ۋران بانكى» جوباسىنىڭ ديرەكتورى مارتا فەرراري: «بۇل – بالاماسى جوق  بىرەگەي جوبا. تومەن بايىتىلعان ۋران بانكى  ول جەكەلەگەن مەملەكەتتەرگە يادرولىق وتىن ءوندىرۋ ءۇشىن شيكىزات قورىن قالىپتاستىرادى. قازاقستان اۋماعىندا اتالعان بانكتىڭ ورنالاسۋى بەكەر ەمەس ەكەنى انىق، ويتكەنى بۇل ەلدىڭ ۋران ءوندىرۋ تاجىريبەسى مول»، – دەيدى.

ال ۋراننىڭ «قورشاعان ورتاعا اسا قاۋپى تۋرالى اڭگىمە قوزعاۋدىڭ ءوزى ارتىق» دەگەن باسشىلار قاۋىپسىزدىكتى ساقتاپ وتىرعانىن ايتادى.

ەنەرگەتيكا مينيسترلىگى اتومدىق جانە ەنەرگەتيكالىق قاداعالاۋ مەن باقىلاۋ كوميتەتى توراعاسىنىڭ ورىنباسارى گۋمار سەرعازين: «بۇل – ەشقانداي دا قالدىق ەمەس، كادىمگى گەكسافتوريدتى ۋران. مىنا تسيليندرلەردىڭ ىشىندە قاتتى كۇيدە ساقتالعان. بۇلاردىڭ بارلىعى ۇلكەن سىناقتان وتكەن»، – دەيدى. تەلەارنانىڭ مالىمەتىنشە، قازاقستان الەمدەگى يادرولىق قاۋىپسىزدىكتى ساقتاۋعا ەلەۋلى ۇلەس قوسۋعا ءازىر ەكەنىن دالەلدەپ وتىر.

سوڭعى جاڭالىقتار