10 جەلتوقسان, 21:02 383 0 جاھان انار لەپەسوۆا

امەريكانىڭ اتاقتى Tyson Foods كومپانياسى قازاقستانعا ەت وڭدەۋدى ۇيرەتپەك

اقش-تىڭ ايگىلى كومپانيالارى قازاقستاننىڭ اۋىل شارۋاشىلىعى سالاسىنا ينۆەستيتسيا سالۋعا نيەتتى. 

پرەمەر-مينيستر اسقار مامين قۇراما شتاتتارعا  جۇمىس ساپارى كەزىندە وسى ەلدىڭ اگروبيزنەس وكىلدەرىمەن كەلىسىم جاساپ، ەت وڭدەۋ كاسىپورىندارىن جانە سۋارۋ جۇيەلەرى ءوندىرىسىن اشۋ تۋرالى ۋاعدالاستىققا قول جەتكىزدى، دەپ حابارلايدى «حابار 24».

Tyson Foods جانە Valmont Industries كومپانيالارى كوپ ۇزاماي ەلىمىزدە قۇرىلىس باستاپ، ءوز تەحنولوگياسىمەن جۇمىس ىستەۋگە كوشپەك. ءسويتىپ، قازاقستاندىقتار دا بۇل بيزنەستىڭ قىر-سىرىنا قانىعىپ، ءىسىن ىلگەرىلەتەتىن بولادى. بۇل كومپانيالار امەريكانىڭ اگروبيزنەس سالاسىندا كوش باستاپ تۇر. اتى تانىمال، تاجىربيەسى مول، ءونىمى ساپالى كومپانيالار ەندى قازاقستانعا قارجى قۇياتىن بولدى.

ۇكىمەت باسشىسى اسقار مامين ءىرى ەت ءوندىرۋشى Tyson Foods كومپانياسىنىڭ باسشىلارىمەن كەزدەسىپ، قازاقستاندا زاماناۋي اگرو-مۋلتيپروتەين يندۋسترياسىن دامىتۋ باعدارلاماسىن ىسكە اسىرۋ تۋرالى كەلىسىم جاسادى. امەريكالىق بۇل ايگىلى كومپانيانىڭ قۇرىلعانىنا عاسىرعا جۋىق ۋاقىت بولعان. جىلدىق اينالىمى 42,4 ملرد دوللار. الىپ كاسىپورىندا 141 ادام جۇمىس ىستەيدى.

ستيۆ ستوۋففەر، Tyson fresh كومپانيالار توبىنىڭ پرەزيدەنتى:

بۇل – ءبىر كۇندىك جۇمىس ەمەس. بارلىق ءىستى ءبىر ىزگە ءتۇسىرۋ ءۇشىن كوپ ەڭبەك كەرەك. تەحنولوگيالىق پروتسەستى ءتيىمدى قالىپتاستىرۋىمىز قاجەت. جالپى، قازاقستان تابيعي رەسۋرستارعا باي ەل. سىرتتان باراتىن ينۆەستورلار ونى ءتيىمدى پايدالانا ءبىلۋى ءتيىس.

اراداعى كەلىسىم بويىنشا ەلىمىزدە تاۋلىگىنە 2 مىڭ ءىرى قارانىڭ ەتىن وڭدەيتىن كەشەن سالىنادى.  بۇل كاسىپورىن ىشكى سۇرانىستى قامتاماسىز ەتىپ قانا قويماي، شەتەل نارىعىنا ءونىم شىعارۋعا دا مۇمكىندىك بەرەدى. جوبا ىسكە اسقان كەزدە اۋىل شارۋاشىلىق سالاسىنىڭ جىلدىق كىرىسى 1 ملرد دوللاردان  اسادى دەگەن بولجام بار. سونداي-اق، ءىرى كەشەننىڭ اينالاسىندا وزگە دە قىزمەت تۇرلەرى كورسەتىلەدى.  Tyson Foods قازاقستاندىق Kusto Group كومپانياسىمەن بىرلەسكەن جوبانى جۇزەگە اسىرماق.  «ەكستەنشن» امەريكالىق قىزمەت ۇلگىسى بويىنشا قازاقستاندىق فەرمەرلەرگە اقپاراتتىق كەڭەس بەرۋ، جەرگىلىكتى جەرلەردە كادرلاردىڭ بىلىكتىلىگىن ارتتىرۋ جانە كاسىپتىك-تەحنيكالىق وقىتۋ قارالعان.

ساپارحان وماروۆ، قر اۋىل شارۋاشىلىعى ءمينيسترى:

«تايسون فۋدز» دەگەن الەمگە تانىلعان ماركا. ولار قۇس، سيىر مەن دوڭىز ەتىن 68 ەلگە ەكسپورتتايدى. ەندى قازاقستان نارىعىنا شىقپاق. ءبىزدىڭ ەلدە 3 زاۋىت سالۋدى جوسپارلاپ وتىر. جوبا قۇنى 1 ملرد 250 ملن دوللارعا جەتەدى. 100 مىڭعا جۋىق جاڭا جۇمىس ورىنى اشىلادى دەگەن جوسپار بار.

 

سوڭعى جاڭالىقتار