10 جەلتوقسان, 18:04 389 0 جاھان انار لەپەسوۆا

الكوگولدىڭ قاتەرلى ىسىك تۋدىراتىنى دالەلدەندى

الكوگولدى از مولشەردە تۇتىنۋدىڭ ءوزى ونكولوگيالىق اۋرۋلاردىڭ پايدا بولۋ قاۋپىن ارتتىرادى. بىرلەسە زەرتتەۋ جۇرگىزگەن جاپونيا مەن اقش عالىمدارى وسىنداي قورىتىندى جاسادى. 

عالىمدار جاپونياداعى 33 اۋرۋحانانىڭ 2005-2016 جىلدار ارالىعىنداعى كلينيكالىق مالىمەتتەرىن زەرتتەپ شىقتى، دەپ حابارلايدى ريا نوۆوستي.

ولار جالپى ونكولوگيالىق اۋرۋلارعا شالدىققان 63,2 مىڭ ناۋقاستىڭ جانە وسىنشاما دەنى ساۋ ەرىكتىلەردىڭ دەنساۋلىعىنا بايلانىستى مالىمەتتەردى ساراپتامادان وتكىزدى. زەرتتەۋگە قاتىسقانداردىڭ بارلىعى قانداي مولشەردە جانە قانشا ۋاقىت بويى الكوگولدى ىشىمدىك ىشكەندەرىن ايتىپ بەرگەن.

ناتيجەسىندە الكوگولدى ىشىمدىك ىشپەيتىن ادامداردىڭ قاتەرلى ىسىككە شالدىعۋ قاۋپى تومەن بولىپ شىققان. ال ىشىمدىكتى از نەمەسە ورتاشا مولشەردە تۇتىناتىنداردىڭ ونكولوگيالىق دەرتكە شالدىعۋ قاۋپى ەلەۋلى تۇردە جوعارى ەكەنى انىقتالدى.

وسىلايشا، ون جىل بويى كۇنىنە ءبىر نەمەسە بەس جىل بويى كۇنىنە ەكى الكوگولدى سۋسىن ءىشۋ تىك ىشەك، اسقازان، كەۋدە، پروستاتا نەمەسە وڭەشتىڭ قاتەرلى ىسىگىنە جانە باسقا دا ونكولوگيالىق اۋرۋلارعا شالدىعۋ قاۋپىن 5 پايىزعا ارتتىراتىنى بەلگىلى بولدى.

"بۇگىنگى تاڭدا قاتەرلى ىسىك اۋرۋلارىنىڭ كەڭ تارالۋىنا بايلانىستى الكوگولدىڭ اتالعان دەرتتى قوزدىرۋ قاۋپىن بارىنشا ناسيحاتتاۋ قاجەت", – دەپ مالىمدەدى توكيو ۋنيۆەرسيتەتىنىڭ مەديتسينا عىلىمدارىنىڭ دوكتورى ماساەشي زايتسۋ.

سوڭعى جاڭالىقتار