9 جەلتوقسان, 17:28 391 0 ادەبيەت انار لەپەسوۆا

شەتەلدەگى كوشباسشى قازاقتار جايلى قوس تومدىق جارىق كوردى

تاياۋدا «وتانداستار» قورىنىڭ باستاماسىمەن  جارىق كورگەن «قازاق الەمى» (2 توم قازاق تىلىندە) - «مير كازاحوۆ» (2 توم ورىس تىلىندە) كىتاپتارى جوباسىنىڭ تۇساۋكەسەرى ءوتتى.
ومىرباياندىق تسيكلدىڭ قازاق-ورىس تىلدەرىندە جازىلعان ەكى تومدىق العاشقى ەكى جيناعىندا شەت ەلدەردە تۇراتىن، ءوز سالاسىندا كوش باسىنان كورىنىپ جۇرگەن تانىمال 50 قازاقتىڭ اڭگىمە-سۇحباتى قامتىلعان. عالىمدار، بيزنەسمەندەر، سپورتشىلار، ارتيستەر، كومپانيا جەتەكشىلەرى - ولاردىڭ ارقايسىسىنىڭ وزىندىك تاريحى بار.
وزگە ەلدەردە ەلەۋلى جەتىستىكتەرگە قول جەتكىزگەن قانداستارىمىز ءوز ءومىرى، تاڭداعان جولى مەن بولاشاققا جوسپارلارى تۋرالى وزدەرى اڭگىمەلەيدى.
تۋعان جەردەن شالعايدا جۇرسە دە، ولار شەتتەگى قازاقتاردىڭ باسىن قوسىپ، اركەز قولداۋ كورسەتۋگە دايىن. ولار الەمنىڭ تۇپكىر-تۇپكىرىندە: انگليا، گەرمانيا، نيدەرلاندى، اقش، جاپونيا، قىتاي، تۇركيا، ت.ب. مەملەكەتتەردە قازاق قوعامدارىن قۇرۋدا. قازىر جولىڭىز ءتۇسىپ، قاي ەلگە بارا قالساڭىز دا، بەلسەندى ءھام ءبىلىمدى قانداستارىمىز قۇرعان بىرلەستىكتەردى تاۋىپ الۋعا مۇمكىندىك بار.
“وسى كىتاپ ارقىلى ءبىز قازاق دەگەن قاسيەتتى ۇلتتىڭ ءبىرتۇتاس، مىزعىمايتىن مىقتى ءارى اسا قابىلەتتى حالىق ەكەنىن، قاي ەلدى، قاي جەردى مەكەن ەتسە دە، ۇلتتىق بولمىس-ءبىتىمىن، ءتۇپ-تامىرىن جوعالتپايتىنىنا وتانداستارىمىزدىڭ نازارىن اۋدارعىمىز كەلدى. سونداي-اق، قازاقتاردىڭ الەمدىك قاۋىمداستىقتاعى وزىندىك بىرەگەي ورنىنا، قوناقجايلىلىق، كەڭپەيىلدىلىك، ۇلكەنگە قۇرمەت، كىشىگە ىزەت سىندى قۇندىلىقتارىن الەمگە ءوز سالت-ءداستۇرى، مۋزىكاسى مەن كوركەمونەرى، مىنەز-قۇلقى ارقىلى تانىتىپ كەلە جاتقانىنا كەڭىرەك توقتالىپ، كوبىرەك كوڭىل ءبولۋدى ماقسات ەتتىك” - دەيدى ۇيىمداستىرۋشىلار.

سوڭعى جاڭالىقتار