9 جەلتوقسان, 08:26 403 0 شوۋ-بيزنەس انار لەپەسوۆا

قازاقتىڭ تۋىن ۇستاعان امەريكالىقتار: ديماشتى نيۋ-يورك قالاي قارسى الدى؟

امەريكالىق  جانكۇيەرلەرى ديماشتى نيۋ-يوركتەگى دجون كەننەدي اتىنداعى حالىقارالىق اۋەجايىندا قازاقستاننىڭ جالاۋىمەن قارسى الدى. بۇل تۋرالى dimashnews.com حابارلادى. 

نيۋ-يوركتەگى دجون كەننەدي اتىنداعى حالىقارالىق اۋەجايى ءوزىنىڭ تاريحىندا كوپتەگەن تانىمال تۇلعالار مەن جارقىن كەزدەسۋلەردىڭ كۋاسى بولعانى انىق. الايدا اقش-تىڭ ەڭ ءىرى اۋەجايلارىنىڭ بىردە-بىرىندە الىستاعى قازاقستانان كەلگەن ءانشىنى ءدال بۇلاي، ۇلكەن سالتاناتپەن قارسى الماعان بولار.

ديماش قۇدايبەرگەندى الەمنىڭ تۇكپىر-تۇكپىرىنەن كەلگەن 150-گە تارتا جانكۇيەرى گۇل شوقتارىمەن كۇتىپ الدى. ءارتۇرلى مەملەكەتتەن جينالعان كوپشىلىكتىڭ اراسىندا جاسى دا، كارىسى دە بار. ديماشتى قارسى الۋشىلاردىڭ كوپشىلىگىنىڭ قولدارىندا قازاقستاننىڭ كوك تۋى جەلبىرەيدى. سونىمەن قاتار سۇيىكتى انشىلەرىنىڭ پورترەتتىك سۋرەتتەرىن دە ۇستاپ شىققاندار كەزدەسەدى. جانكۇيەرلەرى قازاقستاندىق تانىمال ءانشىنىڭ كونتسەرتىنە ساتتىلىك تىلەسە، بىرنەشە ساعاتتىق ۇشۋدان كەيىن شارشاسا دا، ديماش ولارعا ادەتتەگىدەي العىس ايتىپ، بىرگە ەستەلىك ءۇشىن فوتوعا ءتۇستى.

ايتا كەتسەك، كونتسەرت قازاقستاننىڭ اقش-تاعى مادەنيەت كۇندەرى اياسىندا ۇيىمداستىرىلىپ وتىر. «Arnau tour ENVOY» - ماۋسىم ايىندا «قازاقستان» رترك» اق ۇيىمداستىرۋىمەن نۇر-سۇلتان قالاسىندا وتكەن «ARNAU» كونتسەرتىنىڭ جاڭارعان نۇسقاسى. الەم تىڭدارماندارى بۇل كەشتە جاڭا باعدارلامامەن قاتار، «ARNAU» باعدارلاماسىنىڭ ۇزدىك نومىرلەرىن كورەتىن بولادى.

ديماشتىڭ نيۋ-يوركتەگى كونتسەرتىنە بيلەتتەر ءبىر جارىم ايدا ساتىلىپ كەتكەن. سونداي-اق، ءانشىنىڭ نيۋ-يوركتە 10 جەلتوقساندا وتەتىن جەكە كونتسەرتىنە الەمنىڭ 51 ەلىنەن جانكۇيەرلەر كەلەدى.

سوڭعى جاڭالىقتار