8 جەلتوقسان 2019, 12:41 1305 0 سۇحبات Túrkistan Gazeti

التىنگۇل سەركەباەۆا: ءاربىر قويىلىم الدىندا قاتتى قوبالجيمىن

التىنگۇل سەركەباەۆا – ق.قۋانىشباەۆ اتىنداعى اكادەميالىق قازاق مۋزىكالىق دراما تەاترىنىڭ اكتريساسى. 2016 جىلى اكتريسا دارياش ءرولىن بەينەلەگەن ا.چەحوۆتىڭ «شيە» كومەدياسى تاۋەلسىزدىكتىڭ 25 جىلدىعىنا ارنالعان قازاقستان دراما تەاترلارىنىڭ XXIV رەسپۋبليكالىق فەستيۆالىنەن «ۇزدىك سپەكتاكل» نوميناتسياسى يەگەرى اتانسا، ورتا ازيا مەملەكەتتەرىنىڭ «قازاقستان – ەۋرازيا جۇرەگى» VI حالىقارالىق قازاقستان دراما تەاترلارىنىڭ فەستيۆالىنەن گران-پري جۇلدەسىن ۇتىپ العان. اتالعان قويىلىم حالىقارالىق ساراپشىلاردىڭ جوعارى باعاسىن العان بولاتىن. بيىل اكتريسا التىنگۇل ەربولقىزى «دارىن» مەملەكەتتىك جاستار سىيلىعىنىڭ يەگەرى اتاندى. وسى ورايدا اكتريسامەن كەزدەسىپ، اڭگىمەلەسكەن بولاتىنبىز.

 

– التىنگۇل، «دارىن» مەملەكەتتىك سىيلىعىن الۋىڭىزبەن قۇت­تىقتايمىز. مەملەكەتتىك سىيلىققا ۇسىنىلىپ جاتقانىڭىزدى ءبىلدىڭىز بە؟

– «دارىن» سىيلىعىنا ۇسىنىلىپ جاتقانىمدى بىلگەن جوقپىن. بۇل مەن ءۇشىن كۇتپەگەن جاعداي بول­دى. ءوز ەسىمىمدى جەڭىمپازدار قا­تارىنان ەستىگەندە تاڭعالدىم. ءىش­تەي «مەن ءالى ونداي دارەجەگە جەت­پەدىم» دەگەن قورقىنىش بولدى. ءارىپ­تەستەرىم «سەن لايىقتىسىڭ، ءبىز سەنىڭ جەڭىپ شىعاتىنىڭدى ءبىل­دىك» دەگەننەن كەيىن كوڭىلىم ور­نىنا تۇسە باستادى. سىيلىقتى الۋ – ءبىر ەڭبەك، ارى قاراي سىيلىق اتى­نا لايىق بولۋ تىپتەن بولەك جۇ­مىس. ەندىگى جەردە تەك تالماي ەڭ­بەكتەنۋىم قاجەت دەپ ويلايمىن. ءويت­كەنى جاس اكتريسا رەتىندە ماعان ءالى كوپ ىزدەنىس كەرەك.

– ءوزىڭىز حالىق اسپاپتار ءبو­لى­مىن قىل-قوبىز كلاسى بويىن­شا ۇزدىك ءبىتىرىپسىز. اكتريسالىق ونەرگە بەت بۇرۋىڭىزعا نە سەبەپ بولدى؟

– مەن اكتريسا بولۋدى بالا كۇ­نىم­نەن ارمانداعانمىن. وسى جول­دا اتا-انام دا بەتىمنەن قاقپا­دى، اكتريسا بولىپ قالىپتاسۋىما قولدارىنان كەلگەنشە بار جاعدايدى جاسادى. انام «اكتريسا بولعىڭ كەلسە، جان-جاقتى بولۋىڭ كەرەك» دەپ ايتاتىن. سوندىقتان   مەكتەپ كەزىنەن سپورتپەن اينالىسىپ، بيگە، حورعا قاتىستىم. ءان ايتۋدى بىلەمىن، بيلەي الامىن، سپورتتان حابارىم بار، ەندى ماعان نوتا تانۋ كەرەك دەگەن ويمەن 9-سىنىپتان سوڭ جەزقازعان قالاسىنداعى مۋزىكالىق كوللەدجگە «قىل-قوبىز» كلاسىنا وقۋعا تاپسىردىم. بويىمداعى تالانتىمدى بايقاعان بولار، ستۋدەنت اتانعان جىلى-اق، اكتريسا رايحان يبراەۆا مەن اكتەر دوسجان جانبوتاەۆ س.قوجامقۇلوۆ اتىنداعى مۋزىكالىق دراما تەاترىندا اكتريسا بولىپ جۇمىس ىستەۋگە ۇسىنىس جاسادى. مەن قۋانا-قۋانا كەلىستىم. وسىلايشا ءتورت جىل بويى قوبىز كلاسى مەن اكتريسالىق شەبەرلىگىمدى بىرگە شىڭدادىم.

كوللەدج بىتىرگەن سوڭ ەلورداداعى قازاق ۇلتتىق ونەر ۋنيۆەرسيتەتىن «دراما تەاتر جانە كينو اكتەرى» ماماندىعى بويىنشا ءبىتىردىم. 4-كۋرستا ارنايى كاستينگ ارقىلى ق.قۋانىشباەۆ اتىنداعى اكادەميالىق قازاق مۋزىكالىق دراما تەاترىنا جۇمىسقا قابىلداندىم. تەاتردا جۇمىس ىستەگەن وزىمە ۇنايدى، ويتكەنى تەاتر ارزان شوۋدىڭ ورنى ەمەس، پافوس ەمەس. بۇل جەردە ساحنالاناتىن قويىلىمدار حالىققا وي سالاتىن، ادام­نىڭ ءوز تاريحىن تانۋىنا ىق­پال ەتەتىن دۇنيەلەر.

– تەاتر رەپەرتۋارىنداعى كوپتەگەن قويىلىمدا وينايسىز. ءوزىڭىزدىڭ جانىڭىزعا جاقىن ءرولىڭىز بار ما؟

– وسى تەاتردا جۇمىس ىستەگەنىمە بەس جىلدىڭ كولەمىندەي ۋاقىت بولدى. رولدەرىمدى ۇلكەن-كىشى دەپ ءبولىپ-جارا المايمىن، ماعان بارلىق ءرولىم ىستىق. مەن ءۇشىن ۇلكەن جانە ورتا بۋىنمەن ءبىر ساحنادا ويناۋ ۇلكەن مارتەبە. ءوز زامانداستارىممەن دە جۇمىس ىستەۋ وڭاي، جۇمىس بارىسىندا قينالىپ كورگەن جوقپىن.

مەن ءۇشىن ماڭىزدىسى – حالىقتىڭ قويىلىمدى ىزدەپ، تەاترعا كەلگەنى. وسى كۇنى كورەرمەندەر سانى ارتىپ كەلەدى. تۇراقتى تۇردە قويىلىمداردى تاماشالايتىن كورەرمەنگە قاراپ سۇيسىنەمىز. ساحنادا ءرول ويناپ جاتساق تا، كورەرمەننىڭ وزىمىزگە دەگەن ىقىلاسى مەن ماحابباتىنىڭ ەنەرگەتيكاسىن سەزىنىپ تۇرامىز.

– ءوزىڭىزدىڭ ساحناداعى ويىنىڭىزعا كوڭىلىڭىز تولمايتىن، كورەرمەنگە كەيىپكەردىڭ وبرازىن اشا الماعان ساتتەر ءجيى بولا ما؟

– ءوز ويىنىما كوڭىلىم تولمايتىن ساتتەر وتە كوپ. ونداي ءسات­تەردە جان بالاسىمەن سويلەسكىڭ كەلمەيدى، ەسىكتى جاۋىپ الىپ، قويىلىم بارىسىنداعى ءوزىڭنىڭ قاتەلىكتەرىڭ تۋرالى ويلانىپ، ايناعا قاراپ ءوز-وزىڭمەن سويلەسىپ، ىشتەي وي ارپالىسىنا تۇسەسىڭ. «وزىمە كوڭىلىم تولدى، كەرەمەت وينادىم دەگەن كۇننەن ارى قاراي وسپەيسىڭ» دەگەن ۇستازدارىمىزدىڭ ءسوزى ميىمىزدا جاتتالىپ قالدى. جالپى، ءاربىر كاسىبي اكتەردىڭ وزىنە ەشقاشان كوڭىلى تولمايتىن سياقتى. كەيدە ءرولىڭ وزىڭە جاقسى شىققان سياقتى بولادى. بىراق ارقاشان ودان دا جاقسى ىستەۋگە بولاتىن ەدى دەگەن ويدا بولامىن. بۇل دەگەنىمىز – ونەرگە دەگەن قۇشتارلىقتان تۋىندايتىن تالپىنىس، ىزدەنىس دەپ بىلەمىن.

– ءوزىڭىز باستى رولدەردىڭ ءبىرىن ويناعان «ارپالىس» تەلەحيكاياسى قاراشا ايىنان باستاپ كورەرمەنگە جول تارتتى. جاڭا سەريالدى كورەرمەن قالاي قابىلداپ جاتىر؟

– «ارپالىس» – مەنىڭ كينو الەمىندەگى باستى رولدەردىڭ ءبىرىن وينايتىن العاشقى سەريالىم. بۇرىن ەپيزودتىق رولدەرگە ءتۇسىپ جۇرگەن مەن ءۇشىن بۇل تەلەحيكايا ۇلكەن تاجىريبە مەكتەبى بولدى. ءبىزدىڭ وتاندىق مەديا نارىقتا كاسىپكەرلەردىڭ ءومىرى مەن تىرلىگىن كورسەتەتىن تەلەحيكايالار از. سەريال بارىسىندا كورەرمەن دوستىق پەن ساتقىندىققا كۋا بولىپ، ادەمى ماحاببات حيكاياسىن تاماشالاي الادى. «ارپالىس» سەكىلدى جاڭا دۇنيەلەر قازىرگى كورەرمەنگە كەرەك دەپ ويلايمىن.

جالپى، ءاربىر قويىلىم الدىندا قاتتى قوبالجيمىن. بىراق ساحناعا شىققاندا ءبارىن ۇمىتىپ كەتەمىن. ءالى ەكرانعا ۇيرەنبەگەندىكتەن بولار، كينو ءتۇسىرىلىمى بارىسىندا بويىمداعى قوبالجۋ ءرولدى ويناپ بىتكەنشە كەتپەدى. قولىمنان كەلگەنشە جاقسى ويناپ شىعۋعا تىرىستىم. كورەرمەن جىلى قابىلداپ، كينو الەمىنە دەگەن تالپىنىسىمدى جاقسى باعالاپ جاتىر. الداعى ۋاقىتتا كينوعا ءتۇسۋ تۋرالى ۇسىنىس بولىپ جاتسا، قابىلداۋعا دايىنمىن.

– قازاق كينو اكتريسالارى جاساندى وينايدى، سوزدەرى جات­تاندى، ەموتسياسى جوق دەگەن سىن-پىكىرلەرمەن كەلىسەسىز بە؟

– ونداي پىكىردى ءجيى ەستىپ ءجۇرمىز. كينو الەمى – ۇلكەن سالا. وندا تەك اكتەرلەر عانا جۇمىس ىستەمەيدى. بۇل جاعدايعا بىرجاقتى قاراۋعا بولمايدى دەپ ويلايمىن. كوپ جاعدايدا رەجيسسەر اكتريساعا دايىندىققا وتە از ۋاقىت بەرىپ جاتادى، ءسوزىن جاتتاۋعا مۇمكىندىك بولمايدى. مۇنداي جاعدايدا
اكتري­سا قانداي وبراز شىعارا الادى؟ ارينە، وبرازدى ءوز بويىنا تو­لىق سىڭىرە الماعان سوڭ ەكراننان جاساندى بولىپ كورىنۋى ءمۇم­كىن. بىراق ءوز ءرولىن ادەمى الىپ شى­عۋدى قالامايتىن اكتەر بولمايدى.

ارايلىم

جولداسبەكقىزى

سوڭعى جاڭالىقتار