6 جەلتوقسان, 12:08 337 0 جاڭالىقتار اسىل تۇمار

«نۇرلى تاۋداعى» توتەنشە جاعداي: كۋاگەرلەر نە دەيدى؟

كەشە «نۇرلى تاۋ» بيزنەس ورتالىعىنىڭ 12 قاباتىنان سەكىرىپ، مەرت بولعان 48 جاستاعى ازاماتتى كورگەن كۋاگەرلەر ءمان-جايدى «استانا» ارناسىنىڭ جۋرناليستەرىنە بايانداپ بەردى.

ولاردىڭ ايتۋىنشا، بايقاماساڭ، بۇل بيزنەس ورتالىقتاعى بالكون-تەرەزەلەردىڭ بارلىعى قاۋىپتى.  ونىڭ ۇستىنە، عيماراتقا كىرىپ-شىعۋ ەشقانداي قيىندىق تۋدىرمايدى.

«جۇمىسقا كەلگەن بەتىم سول ەدى. سىرتتا ايقاي-شۋ بولا كەتتى. شىعىپ قاراسام، ورتا جاستاعى ەر-ازامات جوعارىدان قۇلاپ، مەرت بولعان ەكەن»، – دەيدى تەمىرلان دۇكەنبەك.

وقيعا ورىن العان ۋاقىتتا 24 جاستاعى جاس جىگىت وسى ماڭداعى كافەلەردىڭ بىرىندە جۇمىسىنا كىرىسىپ جاتقان. كۋاگەر ءبىراز ۋاقىتقا دەيىن شۋ باسىلماعانىن ايتادى.

قالا تۇرعىنى الىشەر باتىرعاليەۆ: «كۇزەت جۇيەسى دۇرىس قۇرىلماعان. ماسەلەن، كىرەبەرىستە باقىلاۋ كامەرالارى جوق. كەز كەلگەن ادام كۇزەتتەگى كەزەكشىگە اتى-ءجونىن ايتىپ-اق، عيماراتقا كىرە الادى. بالكونعا شىعۋ ءتىپتى وڭاي، ءبارى اشىق جاتادى»، – دەگەن پىكىردە.

كۋاگەرلەردىڭ ويىنشا، مارقۇم بۇل ورىندى الدىن-الا قاراپ، بەلگىلەپ العان.

ەستەرىڭىزگە سالايىق، 5 جەلتوقسان كۇنى تاڭەرتەڭ بەلگىسىز ءبىر ازامات «نۇرلى تاۋ» بيزنەس ورتالىعىنىڭ 12 قاباتىنان سەكىرىپ، جەدەل-جاردەم كەلگەنشە كوز جۇمدى. مارقۇمنىڭ جەكە دەرەكتەرى مەن وقيعانىڭ  مان-جايى انىقتالۋدا.

سوڭعى جاڭالىقتار