3 جەلتوقسان, 15:04 423 0 تۇلعا انار لەپەسوۆا

تاراز قالاسىنا جاڭا اكىم تاعايىندالدى

جامبىل وبلىسى اكىمىنىڭ وكىمىمەن قارابالاەۆ ايتقازى داۋلەتقۇلۇلى تاراز قالاسىنىڭ اكىمى بولىپ تاعايىندالدى. 

ايماق باسشىسى اسقار مىرزاحمەتوۆ قالا اكتيۆىنە شاھاردىڭ جاڭا باسشىسىن تانىستىرىپ، بىرقاتار ناقتى تاپسىرمالار جۇكتەدى. ءوڭىر باسشىسى وبلىس ورتالىعى بولعان سوڭ قالا اكىمىنە جۇكتەلەتىن جاۋاپكەرشىلىكتىڭ سالماعى دا جەڭىل بولمايتىنىن اتاپ ءوتىپ، الەۋمەتتى ماسەلەلەردى شەشۋدە، ەكونوميكانى كوتەرۋدە تاباندىلىق پەن جۇيەلى جۇمىستىڭ كەرەكتىگىن باسا ايتتى.

اسىرەسە، قالا ماڭىنداعى ساياجاي-القاپتاردى گازداندىرۋ مەن تازا اۋىز سۋ تارتۋ، قالاداعى جولداردى رەتتەۋ، جولاۋشىلار تاسىمالىنداعى قوعامدىق كولىكتەردى ەلەكتروندى بيلەتتەندىرۋ، ايالدامالاردى بىرىڭعاي تيپكە كەلتىرۋ بويىنشا حاتتامالىق تاپسىرمالاردىڭ ءالى كۇنگە ورىندالماعانىن تىلگە تيەك ەتىپ، جاڭا اكىمگە وسى ورايدا ناقتى شارالار قابىلداۋ كەرەكتىگىنە نازار اۋدارتتى. ونىڭ ءوز ەڭبەك جولىن قالا اكىمدىگىنەن باستاعاندىعىن، سونداي-اق، جۋالى، تالاس اۋداندارىنىڭ اكىمى، بۇگىنگە دەيىن «قازترانسگاز ايماق» تۇركىستان وبلىستىق وندىرىستىك فيليالىنىڭ ديرەكتورى لاۋازىمدارىندا قىزمەت اتقارىپ كەلگەندىگىن ەسكەرىپ، تاجىريبەسىن ەلەپ، سەنىم ءبىلدىردى. ءوز كەزەگىندە ايتقازى داۋلەتقۇلۇلى ارتىلعان جاۋاپكەرشىلىكتى سەزىنەتىنىن، سەنىم ۇدەسىنەن شىعۋعا بارىن سالاتىنىن جەتكىزدى.

ايتا كەتەيىك، ايتقازى قارابالاەۆ 1966 جىلى تۋعان، ءبىلىمى جوعارى. ەڭبەك جولىن 1989 جىلى الماتى قالاسىنداعى №54 تۇرعىن ءۇي پايدالانۋ باسقارماسىنىڭ ينجەنەر-تەحنيگى بولىپ باستاعان. ءار جىلدارى «حاير يحسان» قايىرىمدىلىق قورى ديرەكتورىنىڭ ورىنباسارى، «تيگرو حاۋد» ساۋدا-وندىرىستىك قاۋىمداستىعى ءبولىمىنىڭ مەڭگەرۋشىسى، ديرەكتور ورىنباسارى، تاراز قالالىق ساۋدا، شاعىن جانە ورتا بيزنەس باسقارماسىنىڭ باستىعى، قالا اكىمىنىڭ ورىنباسارى، جامبىل وبلىستىق جەرگىلىكتى بيۋدجەتتەرگە الىمدار جانە جەكەلەگەن سالىق تولەمدەرىن جيناۋ اگەنتتىگىنىڭ ديرەكتورى، وبلىس اكىمدىگىنىڭ جۇمىسپەن قامتۋدى ۇيلەستىرۋ جانە الەۋمەتتىك باعدارلامالار دەپارتامەنتىنىڭ ديرەكتورى، جامبىل وبلىسى اكىمى اپپاراتى جەتەكشىسىنىڭ ورىنباسارى، جۋالى اۋدانىنىڭ اكىمى، «وڭتۇستىك» اكك» اق ۇك» وكىلدىگىنىڭ جامبىل وبلىسىنداعى ديرەكتورى، تالاس اۋدانىنىڭ اكىمى، «قازترانسگاز ايماق» جامبىل وبلىستىق وندىرىستىك فيليالى ديرەكتورىنىڭ كەڭەسشىسى قىزمەتتەرىن اتقارعان. ال، 2019 جىلدىڭ ساۋىرىنەن باستاپ «قازترانسگاز ايماق» تۇركىستان وبلىستىق وندىرىستىك فيليالىنىڭ ديرەكتورى لاۋازىمىندا قىزمەت اتقارىپ كەلدى.

 

سوڭعى جاڭالىقتار