2 جەلتوقسان, 17:36 429 0 جاھان انار لەپەسوۆا

ترامپ يمپيچمەنت بويىنشا تىڭداۋعا قاتىسپايتىنىن مالىمدەدى

اقش پرەزيدەنتى دونالد ترامپ 4 جەلتوقساندا بەلگىلەنگەن وكىلدەر پالاتاسىنداعى يمپيچمەنت بويىنشا تىڭداۋعا قاتىسپايدى. بۇل تۋرالى اق ءۇيدىڭ زاڭدىق كەڭەسشىسى پەت چيپوللونەنىڭ سوت كوميتەتىنىڭ توراعاسى دجەررولد نادلەرگە جولداعان حاتىندا جازىلعان، دەپ حابارلايدى ورتالىق ازيانىڭ جاڭالىقتار قىزمەتى

ء"بىز بۇل ءىس بويىنشا كۋالەر اشىق ايتىلعانعا دەيىن تىڭداۋعا قاتىسا المايمىز. ازىرشە سوت كوميتەتى كوسىمشا تىڭداۋلاردى بەلگىلەپ، پرەزيدەنتتى ادىلەتتى پروتسەسسپەن قامتاماسىز ەتۋ-ەتپەسى بەلگىسىز بولىپ تۇر. سول سەبەپتەن پرەزيدەنت سارسەنبىدەگى تىڭداۋعا قاتىسپايدى", - دەپ جازىلعان حاتتا.

چيپوللونە كوميتەت وتىرىسى ترامپ ناتو-نىڭ وتىرىسىنا قاتىسۋ ءۇشىن لوندونعا باراتىن كۇنگە بەلگىلەنگەنىن ايتتى. ال دەموكراتتار وتىرىستى ادەيى وسى كۇنگە بەلگىلەدى دەپ ەسەپتەيدى.

4 جەلتوقساندا وكىلدەر پالاتاسىنىڭ زاڭ جانە سوت كوميتەتتەرىندە ترامپقا يمپيچمەنت جاريالاۋعا كونستيتۋتسيالىق نەگىز بار-جوعى تالقىلانادى. بۇل ءۇشىن كونگرەسسكە كونستيتۋتسيالىق قۇقىق بويىنشا زاڭگەر مەن ساراپشىلار شاقىرىلعان.

ترامپ 2020 جىلى وتەتىن سايلاۋداعى ىقتيمال باسەكەلەسى دجو بايدەنگە زيان كەلتىرۋ ءۇشىن ۋكراينا پرەزيدەنتىنە قىسىم جاساعان دەپ ايىپتالىپ جاتىر.

پرەزيدەنت دەموكراتتاردىڭ ايىپتاۋلارىن سىنعا الىپ، وعان قارسى باستالعان يمپيچمەنت "امەريكا ساياساتى تاريحىنداعى ەڭ ۇلكەن الاياقتىق" دەپ اتاعان.

سوڭعى جاڭالىقتار