30 قاراشا 2019, 17:23 708 0 الەۋمەت انار لەپەسوۆا

قالا تازالاۋشىلاردىڭ جالاقىسى وسەدى

ەلوردادا 2020 جىلدان باستاپ قالانى تازارتۋمەن اينالىساتىن جۇمىسشىلاردىڭ جالاقىسى وسەدى. بۇل تۋرالى نۇر-سۇلتان اكىمدىگىنىڭ ءباسپاسوز قىزمەتى حابارلايدى.

ەلوردادا كوممۋنالدىق قىزمەتتەر پاركى جاڭا ارنايى تەحنيكامەن تولىقتى. جولدار مەن تروتۋارلاردى قاردان تازالاۋ ءۇشىن 67 ارنايى تەحنيكا ساتىپ الىندى: ولار اۆتوگرەيدەرلەر، قار تيەگىشتەر، تراكتورلار جانە باسقالار. كەلەسى كەزەكتە الداعى جىلدىڭ باسىندا 90 ارنايى تەحنيكا الۋ جوسپارلانىپ وتىر.

پارك تەحنيكاسىن جاڭارتۋ قىزمەتكەرلەر ءۇشىن قولايلى ەڭبەك جاعدايىن جاساۋعا جانە سانيتارلىق تازالاۋدىڭ ساپاسىن ارتتىرۋعا مۇمكىندىك بەرەدى. ارنايى تەحنيكا قاراجاتتى وڭتايلاندىرۋ مەن «قدب ليزينگ» اق-مەن بىرلەسە ساتىپ الۋ ەسەبىنەن الىندى. تەحنيكانىڭ باسىم بولىگى - وتاندىق ءونىم. كوممۋنالدىق قىزمەتكەرلەر جاڭا تەحنيكانى ساتىپ الۋدىڭ ماڭىزىن اتاپ ءوتتى، سەبەبى قولدا بار تەحنيكانىڭ 30-50% توزعان. جۇمىسشىلار ەسكى تەحنيكانىڭ بىرنەشە رەت بۇزىلىپ، جۇمىس كەزىندە دە ىستەن شىققانىن ايتتى.

ەلوردا اكىمى التاي كولگىنوۆتىڭ تاپسىرماسى بويىنشا «استانا تازالىق» قىزمەتكەرلەرى قالانى تازارتۋداعى ەرەن ەڭبەگى ءۇشىن سىياقى الدى، جىل سوڭىندا تاعى دا سىياقى بەرىلەدى. ال 2020 جىلدىڭ باسىنان باستاپ جۇمىسشىلاردىڭ جالاقىسى وسەدى.

سوڭعى جاڭالىقتار